ޓީވީއެމްއިން ހޮވި ލާމަސީލު ކާފަގެ މަގާމު ހާސިލު ކުރެއްވި، ހ.ރީތިގަސްދޮށުގެ, ސަޢީދު ޙުސައިން މިއަދު އަވަހާރަވެއްޖެއެވެ.
ޢާންމުޚިދުމަތުގެ އިނާމު ވެސް ހާސިލު ކުރައްވާފައިވާ ސަޢީދު، 80، އަވަހާރަވީ މިއަދު އޭޑީކޭ ހޮސްޕިޓަލްގައި ފަރުވާ ދެމުން ދަނިކޮށެވެ.
ސައީދަކީ މަޝްހޫރު ނޫސްވެރިޔާ އަދި މި ފަހުން ރައީސް އޮފީހުގެ ޗީފް ސްޕޯކްސްޕާސަންއަކަށް ހުންނެވުމަށް ފަހު މިހާރު ފޮރިން މިނިސްޓްރީގެ ސްޓޭޓް މިނިސްޓަރަކަށް ހުންނެވި މުޙައްމަދު ޝަހީބުގެ ބައްޕައެވެ.
ދެހާސް ހަތް ވަނަ އަހަރު ޓީވީއެމްއިން ގެނެސްދިން އަދި އާއްމުންގެ މެދުގައި ވަރަށް މަގުބޫލުވި ލާމަސީލު މާމަ، ކާފަ ޕްރޮގްރާމުން ލާމަސީލު ކާފަގެ މަގާމު ހާސިލު ކުރެއްވީ ސައީދެވެ. އޭނާ އެ މަގާމު ހާސިލު ކުރެއްވީ ބެލުންތެރިން ފޮނުވި 18،316 މެސެޖާއެކު 26،584 ޕޮއިންޓް ހޯއްދަވައިގެންނެވެ.
ސައީދު 2006 ވަނަ އަހަރު އާއްމު ހިދުމަތުގެ އިނާމު ހާސިލު ކުރެއްވީ ފެހުމުގެ މަސައްކަތުގެ ދާއިރާއިންނެވެ. އޭރު ފެހުމުގެ މަސައްކަތް އޭނާ ކުރައްވާތާ 37 އަހަރު ވަނީ ވެފައެވެ.
ފިރިހެނުން އާންމުކޮން ލައިއުޅޭ ހުރިހާ ވައްތަރެއްގެ ހެދުމެއް ސަޢީދު ފެއްސެވިއެވެ. ފެހުމުގެ މަސައްކަތް ގިނަބަޔަކަށް ދަސްކޮށްދެއްވައި، އިތުރު މީހުންނަށް ވަޒީފާ ދެއްވައިގެންވެސް މަސައްކަތް ކުރެއްވިއެވެ. ބައެއް ރިޒޯޓްތަކުގައި އަމިއްލަ ގެސްޓް ޝޮޕްތައް ހިންގަވައި، ޓޫރިސްޓުންނަށް ބޭނުންވާ ބައެއްކަހަލަ ހެދުންތައް ފައްސަވައި، އެ ފިހާރަތަކަށް ފޮނުއްވައެވެ.
ސައީދު ފަހުން އެންމެ ފުޅާ ދާއިރާއެއްގައި ކުރެއްވި މަސައްކަތަކީ، ކަނޑުމަތީ އުޅަނދުފަހަރުގެ ލައިފްޖެކެޓް ފެއްސެވުމުގެ މަސައްކަތެވެ. ސަރުކާރުން ގަބޫލުކުރައްވާ މިންގަނޑަށް ސަޢީދު މިމަސައްކަތް ކުރެއްވިއެވެ.