ސްކޫލުދަރިވަރުންގެ މައުލޫމާތު ބަލަހައްޓާ ޕްލެޓްފޯމު، މޯލްޑިވްސް އެޑިއުކޭޝަން މޭނޭޖްމަންޓް އިންފޮމޭޝަން ސިސްޓަމް (މީމީސް) އަށް ދިމާވި ޓެކްނިކަލް މައްސަލައެއްގެ ސަބަބުން 10 ސްކޫލެއްގައި ފުރަތަމަ ޓާމުގެ ރިޕޯޓު ފޮތް ދޭނީ ޑިިޖިޓަލްކޮށް ކަމަށް އެޑިއުކޭޝަން މިނިސްޓްރީ އިން ބުނެފި އެވެ.
އެ މިނިސްޓްރީ އިން މިއަދު ނެރުނު ނޫސްބަޔާނެއްގައި ބުނީ މީމިސް ބޭނުންކޮށްގެން ރިޕޯޓުފޮތް ޖެނެރޭޓު ކުރުމުގައި ދިމާވި މައްސަލައެއްގެ ސަބަބުން ސަރުކާރުގެ 213 ސްކޫލުގެ ތެރެއިން 10 ސްކޫލުގައި ރިޕޯޓު ފޮތް ދޭނީ ޑިޖިޓަލްކޮށް ކަމަށެވެ.
މި 10 ސްކޫލުގެ ދަރިވަރުންނަށާއި ބެލެނިވެރިންނަށް، ދަރިވަރުންގެ ނަތީޖާ އާއި އެހެނިހެން މައުލޫމާތު އޮންލައިންކޮށް ބެލޭނެ ކަމަށް އެ ބަޔާނުގައި ވެއެވެ. ސްކޫލުން ދޭ ހާއްސަ ލޮގެއް ބޭނުންކޮށްގެން މި މައުލޫމާތުތައް ބެލޭނެ ކަމަށާއި ބޭނުން ބެލެނިވެރިންނަށް ސްކޫލަށް ގޮސްގެން ވެސް މި މައުލޫމާތު ބަލާލެވޭނެ ކަމަށް އެޑިއުކޭޝަނުން ބުންޏެވެ.
ޑިޖިޓަލް ކޮށް ރިޕޯޓު ދޫކުރާ ސްކޫލުތަކުގެ ތެރޭގައި މާލެ އާއި ރާއްޖޭގެ އެހެން ރަށްރަށުގެ ސްކޫލުތައްވެސް ހިމެނެއެވެ.
މީގެ ކުރިންވެސް މީމިސް ބޭނުން ކުރުމުގައި ދަތިތައް ދިމާވެ ރިޕޯޓު ފޮތް ޖެނެރޭޓު ކުރުމަށް ހުރަސް އެޅުނެވެ. މިދިޔަ އަހަރުގެ ފުރަތަމަ ސެމިސްޓާގެ ރިޕޯޓު ފޮތް ޖެނެރޭޓު ކުރުމުގެ މަސައްކަތް ކުރިރު އެތައް ބައިވަރު ޓީޗަރުންނެއް އެއްފަހަރާ މީމިސް އަށް އެކްސެސް ވުމުން ލޯޑުބޮޑުވެ، މަސައްކަތަށް ދަތިވިއެވެ.
މިއަހަރުގެ ފުރަތަމަ ޓަމުގެ ރިޕޯޓު ދޭން ހަމަޖެހިފައިވަނީ މެއި 30 ވާ ބުރާސްފަތި ދުވަހުއެވެ.
މީމިސް ސިސްޓަމަކީ ދަރިވަރުންގެ ތައުލީމީ ހަޔާތާ ގުޅޭ ތަފާތު މައުލޫމާތު އެއްކުރުމަށާއި މައުލޫމާތުތައް ބެލެހެއްޓޭނެ ގޮތަކަށް ދެކުނު އޭޝިއާގައި ވެސް ގާއިމްކުރި ފުރަތަމަ ސިސްޓަމެވެ.