ހދ. ކުމުންދޫގެ ހުރިހާ ގޭބީސީއަކުން ރޯދަ މަހު އުކާލާ ކުނި ހިލޭ އުކައިދިނުމަށް އެރަށު ކައުންސިލުން ނިންމައިފި އެވެ.
ކުމުންދޫ ކައުންސިލުން ކުރި އިއުލާނެއްގައި ބުނީ ކައުންސިލުން ކަނޑައާޅާ ވަކި އުސޫލެއްގެ ތެރެއިން ރަށުގެ ގޭބީސީތަކުގައި އުފެދޭ ކުނި ހިލޭ އުކައިދޭން ނިންމާފައިވާ ކަމަށެވެ. މިގޮތަށް ނިންމާފައިވަނީ އެކައުންސިލުގެ ބައްދަލުވުމަކުން ކަމަށް އެ އިއުލާނުގައި ބުންޏެވެ.
މި ހިދުމަތް ދެނީ ކުމުންދޫ ކައުންސިލްގެ ކުނި މެނޭޖު ކުރުމާ ގުޅޭ ޕްލޭންގެ ދަށުން ފެށުމަށް ހަމަޖެހިފައިވާ ގޭބީސީތަކުގައި އުފެދޭ ކުނި އުފުލައި ދިނުމުގެ ހިދުމަތް ފެށުމުގެ ގޮތުންނެވެ. މިއީ އަލަށް ފަށާ ޕްރޮގްރާމަކަށް ވުމުން ރައްޔިތުންގެ އެއްބާރުލުން އެކަމަށް ބޭނުންވާނެކަމަށް ކައުންސިލުގެ އިއުލާނުގައި ބުންޏެވެ.
އެ އިއުލާނުގައިވާގޮތުން ކުނި ހުންނަންވާނީ ވަކި ކުރެވިފަ އެވެ. އެގޮތުން ބަދިގޭގައި އުފެދޭ ކުނިވާ ޒާތުގެ ކުންޏާއި،ދަޅު، ޕްލާސްޓިކް، ގޭގައި އުފެދޭ ފަތްކުނޑި، ގާ ކުނޑި، ނެޕީ އަދި ބިއްލޫރި ފަދަ ތަކެތި ހުންނަންވާނީ ވަކި ކުރެވިފައި ކަމަށް އިއުލާނުގައި ބުނެފައިވެ އެވެ.
ކުނި އުކުމުގެ ހިދުމަތް ދޭން ނިންމާފައިވަނީ ހުކުރުދުވަސް ފިޔަވައި ކޮންމެ ދުވަހެއްގެ ހެނދުނު 9:00 އިން 11:30 އަށް ކަމަށާއި މި ހިދުމަތް ހިލޭ ދޭނީ މެއި މަހުގެ ހަތަކުން ޖޫން 15 އަށް ކަމަށް ކުމުންދޫ ކައުންސިލްގެ އިއުލާނުގައި ބުންޏެވެ.