ބަންޖުލް (މާޗް 31): ގެމްބިއާގެ ކުރީގެ ރައީސް ޔަހުޔާ ޖަމޭހް ދައުލަތުން 362 މިލިއަން ޑޮލަރު ވަގަށް ނެންގެވި ކަމަށް އެގައުމުގެ ޖަސްޓިސް މިނިސްޓަރު ވިދާޅުވެއްޖެ އެވެ.
ޖަސްޓިސް މިނިސްޓަރު އަބޫބަކުރު ޓަމްބަދޫ ވިދާޅުވި ގޮތުގައި ޖަމޭހްގެ ނަމުގައި އެގައުމުގައި 281 ބިން ރެޖިސްޓާކޮށްފައިވެ އެވެ. އަދި ޖަމޭހްގެ އުފަން އަވަށުގައި ހުރި، އޭނާގެ މިލްކިއްޔާތުގައި ހިމެނޭ ތަކެތީގެ އަގު އެކަނި ވެސް 28.2 މިލިއަން ޑޮލަރަށް އަރަ އެވެ.
ގެމްބިއާގެ ސަރުކާރުން ގަބޫލު ކުރާ ގޮތުގައި 2017 ވަނަ އަހަރު ރިޔާސީ އިންތިހާބުން ބަލިވުމުން ގައުމުން ފިއްލެވި އިރު ޖަމޭހް ވަޑައިގެންނެވީ އޭނާގެ ކާރުތަކާއި އަގުހުރި މުދާ ހިއްޕަވައިގެންނެވެ. އަދި މިހާރުގެ ރައީސް އެޑަމާ ބަރޯގެ މުޝީރު އޭރު ވިދާޅުވި ގޮތުގައި ޖަމޭހް ގައުމު ދޫކުރައްވާ ވަޑައިގަތް ފަހުން ދައުލަތުގެ ހަޒާނާއިން ވަނީ 11 މިލިއަން ޑޮލަރު ގެއްލިފަ އެވެ.
ޓަމްބަދޫ ވިދާޅުވި ގޮތުގައި ޖަސްޓިސް މިނިސްޓްރީން ދަނީ ކުރީގެ ސަރުކާރުން ނެގި ފައިސާ ހޯދުމުގެ މަސައްކަތް ކުރަމުންނެވެ. އަދި އެގައުމުން ވަނީ ޖަމޭހްގެ މީގެ ކުރިން ގެންގުޅުއްވި ބައެއް ކާރުތަކާއި މަތިންދާބޯޓު ވިއްކާފަ އެވެ.
ގެމްބިއާއަށް 1994 ވަނަ އަހަރު ގެނައި ބަޣާވާތަކަށް ފަހު ވެރިކަމަށް ވަޑައިގެންނެވި ޖަމޭހް ވަނީ 2017 ވަނަ އަހަރުގެ ރިޔާސީ އިންތިހާބުގެ ނަތީޖާ ގަބޫލު ކުރައްވަން ފުރަތަމަ ދެކޮޅު ހައްދަވައިފަ އެވެ. ނަމަވެސް އަސްކަރީ ބާރު ބޭނުންކޮށްގެން ނަމަވެސް ޖަމޭހް މަގާމުން ދުރު ކުރާނެ ކަމުގެ އިންޒާރު ހުޅަނގު އެފްރިކާގެ ބައެއް ގައުމުތަކުން ދިނުމުން އޭނާ އިސްތިއުފާ ދެއްވަން ނިންމެވީ އެވެ. އޭގެ ފަހުން ޖަމޭހް ދިރިއުޅުއްވަނީ އިކުއިޓޭރިއަލް ގިނީގަ އެވެ.