އަނބިމީހާ ވިހައިގެން ހޮސްޕިޓަލުގައި އެޑްމިޓްކޮށްފައި އޮއްވައި ރ. އުނގޫފާރު ގެއެއް ފަޅާލައި ކޮޓެރި ތެރޭގައި އިން ތިޖޫރީއެއް ގިނަ އަދަދެއްގެ ފައިސާއާ އެކު ވަގަށް ގެންގޮސްފި އެވެ.
ރ. އުނގުފާރު ހިތް ފަސޭހަ ގޭ ހަސަން މޫސާ 'ސަން' އަށް ބުނީ ދެ ފޫޓުގެ އެ ތިޖޫރީ ވަގަށް ގެންގޮސްފައި ވަނީ އެގޭގެ ކޮޓެރީ ތެރޭގައި އިން އަލަމާރީ ތެރޭގައި ހުއްޓާ ކަމަށެވެ. އަދި ތިޖޫރީ ވަގަށް ގެންދިޔައިރު އޭގައި މަދުވެގެން ފަސް ލައްކަ ފަންސާސް ހާސް ރުފިޔާ ހުންނާނެ ކަމަށް ވެސް އޭނާ ބުންޏެވެ.
"އަޅުގަނޑު އަންހެނުން ވިހައިގެން ހޮސްޕިޓަލުގައި އެޑްމިޓް ކޮށްގެން އެތަނުގައި އެންމެން މި އުޅެނީ. މިއަދު ހެނދުނު ހޮސްޕިޓަލަށް ދިޔައިރު ވެސް ތިޖޫރީ އިން. ހުކުރު ވަގުތާ ޖެހެން ދެން ގޭގައި މީހުން އުޅޭނެ. ބޮޑަށް ލަފާ ކުރެވެނީ ހުކުރު ވަގުތު ކަމަށް ތިޖޫރީ ގެންގޮސްފަ އެ އިނީ،" ރިސޯޓް ސަޕްލައި ކުރަމުން އަންނަ ހަސަން މޫސާ ބުންޏެވެ.
ތިޖޫރީ ވަގަށް ގެންގޮސްފައިވަނީ ރިސޯޓެއްގެ ޕޭމަންޓް ފައިސާ ޖަމާވުމުން ބޭންކުން ނަގައިގެން ގެ އަށް ގެންގޮސްފައި ހުއްޓާ ކަމަށް ހަސަން މޫސާ ބުންޏެވެ.
އެ މައްސަލަ މިހާރު ވަނީ ފުލުހުންނަށް ރިޕޯޓް ކޮށްފަ އެވެ. އުނގޫފާރު ގެއަކުން ތިޖޫރީ ވަގަށް ނަގައިގެން އުޅޭކަން ފުލުހުންވެސް ކަށަވަރުކޮށްދެ އެވެ.