ހޭޝްޓެގް "ދަ ބިގެސްޓް މޫވީ އޮފް ދަ 2019"ގެ ގޮތުގައި ޕްރޮމޯޓްކުރަމުން އަންނަ ދިވެހި ފިލްމު "40 ޕްލަސް"ގެ ރަސްމީ ޓްރެއިލާ ދައްކާލައިފި އެވެ.
ފިލްމު އެޅުވުމުގެ ވަގުތު ކުޑަތަންވެފައިވާ އިރު ފިލްމުގެ ފަހު އަދި ރަސްމީ ޓްރެއިލާ ދައްކާލި އިރު ތަރިންގެ އިތުރުން ބެލުންތެރިންގެ މޫނުމަތިން ވެސް ހިތްހަމަޖެހުން ފެނިގެންދެ އެވެ.
ޓްރެއިލާއިން ހެއްވާ މަޖާ ކަންތައްތަކެއް ފެނިގެން ދިޔަ އިރު ބިރުވެރި މަންޒަރު ވެސް ފެނިގެންދެ އެވެ.
ފިލްމުގެ ރަސްމީ ޓްރެއިލާ އާންމުކުރި އިރު ފިލްމުގެ ޓީޒާކޮޅުތައް މީގެ ކުރިން ވަނީ ދައްކާލައިފަ އެވެ.
ފިލްމު ސިނަމާއަށް އަންނާނީ މިމަހުގެ ފަސް ވަނަ ދުވަހު އެވެ.
އެ ފިލްމަކީ ޔޫސުފް ޝަފީއު (ޔޫއްޕެ) ޑައިރެކްޓްކުރާ އިސްމާއިލް ޝަފީގު ޕްރޮޑިއުސްކުރާ ފިލްމެކެވެ.
ތ. ބުރުނީގައި މަންޒަރުތައް ނެގި އެ ފިލްމަކީ "ނޯޓީ 40"ގެ ސީކުއެލްއެކެވެ.
އެ ފިލްމު މާލޭގެ އިތުރުން އަތޮޅުތަކުގައި ވެސް ދެއްކުމަށް ވަނީ ނިންމައިފަ އެވެ.
ހެއްވާ މަޖާ އަދި ބިރުވެރި އެތައް މަންޒަރެއް "40 ޕްލަސް"ގެ ޓިޒާއިން ފެންނަ އިރު އެ ފިލްމު ވާނީ ރާއްޖޭގެ ސިނަމާތަކަށް އަންނާނެ ފުރަތަމަ ބިރުވެރި މަޖާ ފީޗާ ފިލްމަށެވެ.
ކުޅަދާނަ ބަޠަލާ ފާތިމަތު އާޒިފާ (އަޒޫ)، ޝީލާ ނަޖީބު، އަލީ އާޒިމް (ދޮންއައްޔަ)، މުޙައްމަދު ފައިސަލް އަދި ޔޫއްޕެގެ "ދެވަންސޫރަ"އިން ފިލްމީ ދާއިރާއަށް މުޅިން އަލަށް ތައާރަފްވި މަރިޔަމް ޝިފާ، އާނަންދު، މަރިޔަމް ޝަކީލާ އަދި އަލަށް ތައާރަފްވާ ބަތަލާ އިރްފާނާ އިބްރާހީމް ފަދަ ތަރިންގެ އެކްޓިން ވެސް އެ ފިލްމުން ފެންނާނެ އެވެ.
އެ ފިލްމަކީ ކޮންމެހެން ވެސް ބަލާލަން ޖެހޭ ފިލްމެއް ކަމަށް ފިލްމުގެ ތަރި އަލީ ސީޒަން މީގެ ކުރިން 'ސަން'އަށް ވަނީ ބުނެފަ އެވެ.
ފިލްމުގެ ޓިކެޓް ވިއްކުން ބާރު ސްޕީޑުގައި ކުރިއަށް އެބަދެ އެވެ.