ސިޔާސީ ޕާޓީތަކުގެ ޕްރައިމަރީގައި ވާދަކޮށް، ނާކާމިޔާބުވާ ފަރާތްތަކަށް ރައްޔިތުންގެ މަޖިލީހުގެ އިންތިހާބުގައި ވާދަކުރެވޭނެކަމަށް ސުޕްރީމް ކޯޓުން މިއަދު ހުކުމްކޮށްފިއެވެ.
ޕްރައިމެރީގައި ވާދަކުރުމުން ބަލިވާ ފަރާތްތަކުން އިންތިހާބުގައި ވާދަ ނުކުރެވޭ ގޮތަށް ސިޔާސީ ޕާޓީތަކުގެ ގާނޫނަށް ގެނައި އިސްލާހު ބާތިލް ކުރުމަށް ސުޕްރީމް ކޯޓަށް ހުށަހެޅީ، އެމްޑީޕީން ބޭއްވި މަޖިލިސް ޕްރައިމަރީގައި ކާށިދޫ ދާއިރާއިން ނާކާމިޔާބުވި އަބްދުﷲ ޖާބިރު އާއި ހިތަދޫ އުތުރު ދާއިރާގެ ޕްރައިމަރީން ބަލިވި އަހްމަދު މުހައްމަދުގެ އިތުރުން ގާނޫނީ ވަކީލު އަބްދުލް މާނިއު ހުސައިން އެވެ. ޖާބިރު އާއި މާނިއުއާ އެއްކޮށް އެ މައްސަލަ ހުށަހެޅި އިރު އަހްމަދު މުހައްމަދު ހުށަހެޅީ ވަކިންނެވެ.
ސުޕްރީމް ކޯޓުގެ މުޅި ބެންޗުން ބެއްލެވި އެ މައްސަލައިގެ ރިޔާސަތުގައި އިންނެވީ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ އެވެ. އަދި މިއަދުގެ އަޑުއެހުމުގައި ހުކުމް އިއްވެވީ ވެސް އުއްތަމަ ފަނޑިޔާރެވެ.
އެ ހުކުމުގައި ބުނެފައިވަނީ ސިޔާސީ ޕާޓީތަކުގެ ގާނޫނުގެ 10 ވަނަ މާއްދާ އަކީ ގާނޫނު އަސާސީއާ ތައާރުޒުވާ މާއްދާއެއް ކަމަށް ވުމުން އެ މައްދާ ބާތިލްކޮށް މަޖިލިސް އިންތިހާބަށް ކުރިމަތިލުމުގެ ފުރުސަތު ބަންދުވެފައިވީ ނަމަވެސް، ޕްރައިމަރީތަކުން ބަލިވި މީހުންގެ ތެރެއިން އިންތިހާބުގައި ވާދަކުރަން ބޭނުންވާ މީހުން އިންތިހާބަށް ކުރިމަތިލުމުގެ ފުރުސަތު މާޗު ހަތަރަކާ ހަމައަށް ހުޅުވާލުމަށެވެ. އަދި އެ މުއްދަތުގައި ވާދަކުރުމަށް ހުށަހެޅޭނީ ހަމަ އެކަނި، ޕާޓީއެއްގެ އެތެރޭގެ ޕްރައިމަރީއެއްގައި ވާދަކޮށްފައިވާ ފަރާތަކަށް އެކަނި ކަމަށް ވެސް ހުކުމުގައި ބުނެފައިވެ އެވެ.
ސިޔާސީ ޕާޓީއެއްގެ ޕްރައިމަރީއެއްގައި ވާދަކޮށް ބަލިވާ މީހުނަށް އެއްވެސް ހައިސިއްޔަތަކުން އިންތިހާބްގައި ވާދަ ނުކުރެވޭ ގޮތަށް އޮތުމަކީ ގާނޫނު އަސާސީން ލިބިދޭ އިންތިހާބްތަކުގައި ވާދަ ކުރުމުގެ އަސާސީ ހައްގުން މަހުރޫމްވާ ކަމެއް ކަމަށާއި އެހެން ކަމުން އެ ކަމަކީ ގާނޫނު އަސާސީއާ ތައާރުޒު ކަމެއް ކަމަށް ހުކުމުގައި ވެއެވެ.
ޕްރައިމަރީތަކުން ބަލިވާ ކެންޑިޑޭޓުންނަށް އިންތިހާބްގައި ވާދަ ނުކުރެވޭ އުސޫލެއް އެމެރިކާގެ ގިނަ ސްޓޭޓްތަކެއް އޮތް ކަން ބަންޑާރަ ނައިބުގެ ވަކީލުން ފާހަގަ ކުރި ހުކުމުގައި ބުނެފައިވަނީ، އެމިރިކާގައި ޕްރައިމަރީތަކުން ބަލިވާ ފަރާތްތަކަށް ވާދަނުކުރެވޭ ގޮތަށް އޮތުމުން އެކަމާ ބޮޑެތި ހިޔާލުތަފާތުވުންތައް އުފެދި ކޯޓުތަކަށް ވެސް މައްސަލަ ހުށަހަޅާފައިވާ ކަމަށެވެ. އަދި ރާއްޖެއާ ހިލާފަށް އެމެރިކާގެ ބައެއް ސްޓޭޓްތަކުގައި ޕާޓީތަކުގެ މެންބަރުން ނޫން ފަރާތްތަކަށް ވެސް ޕްރައިމަރީތަކުގައި ވޯޓު ލެވޭ ކަން ހުކުމުގައި ފާހަގަކޮށްފައިވެ އެވެ.
ރާއްޖޭގެ ސިޔާސީ ޕާޓީކުން ބާއްވާ އެތެރޭގެ ޕްރައިމަރީތައް ރެގިއުލޭޓްކޮށް ބަލާނެ ރަނގަޅު ނިޒާމެއް ނެތް ކަން ވެސް ހުކުމުގައި ބުނެފައިވެ އެވެ.
ޕްރައިމެރީގައި ވާދަކުރުމުން ބަލިވާ ފަރާތްތަކުން އިންތިހާބުގައި ވާދަ ނުކުރެވޭ ގޮތަށް ކަނޑައެޅީ 2016 ވަނަ އަހަރު އެވެ. ވިލިނގިލި ދާއިރާގެ އޭރުގެ ޕީޕީއެމް މެމްބަރު ސައުދު ހުސެއިން މަޖިލީހަށް ހުށަހަޅައި ފާސްކުރި އިސްލާހުގައި ވަނީ، ސިޔާސީ ޕާޓީއެއްގައި ރަޖިސްޓަރީ ކޮށްފައިވާ މެމްބަރަކު، ގާނޫނު އަސާސީން ނުވަތަ ގާނޫނަކުން ބާރު ލިބިގެން ބާއްވާ އެއްވެސް އިންތިހާބެއްގައި ސިޔާސީ ޕާޓީއެއްގެ ޓިކެޓް ހޯދަން އެ ޕާޓީގެ ޕްރައިމަރީގައި ވާދަކޮށް، ބަލިވުމަށް ފަހު، އެ އިންތިހާބެއްގައި އެހެން އެއްވެސް ހައިސިއްޔަތަކުން ބައިވެރި ނުވެވޭނެ ކަމަށެވެ. އަދި އެފަދަ މީހަކު ކެންޑިޑެސީ ހޯދަން އިލެކްޝަންސް ކޮމިޝަނަށް ހުށަހަޅައިފި ނަމަ، އެ މެމްބަރެއްގެ ކެންޑިޑެސީ އެ ކޮމިޝަނުން ބާތިލު ކުރަން ވާނެ ކަމަށް ވެސް އިސްލާހުގައިވެ އެވެ.