ކިންޝާސާ (ފެބްރުއަރީ 5): ޑިމޮކްރެޓިކް ރިޕަބްލިކް އޮފް ކޮންގޯގައި މިނިސްޓަރުކަން ކުރާ ފަރާތްތަކަށް އުމުރު ދުވަހަށް މުސާރަ އާއި އިނާޔަތްތައް ދޭން ނިންމައިފިއެވެ.
މި ކަމާ ގުޅިގެން ގިނަ ބަޔަކު ފާޑު ކިޔަން ފެށުމުން، ސަރުކާރުން ވަނީ އެނިންމުން ދިފާއުކޮށް ވާހަކަ ދައްކައިފައެވެ.
ކޮންގޯގެ ސަރުކާރުން ނެރުނު ބަޔާނެއްގައިވާ ގޮތުން އެމުސާރަ ދެނީ މިނިސްޓަރުން "މުއްސަނދި ކުރުމަށްޓަކައެއް" ނޫނެވެ. ނަމަވެސް އެއީ މިނިސްޓަރުން "ފަގީރުވުން ހުއްޓުވުމަށް" ދޭ މުސާރަ އާއި އިނާޔާތްތަކެވެ. އަދި އެއީ "ކެއުމާއި ގެދޮރާއި ބޭސް ފަރުވާ ފަދަ އަސާސީ ބޭނުންތައް ފުއްދުމަށްދޭ" ފައިސާ އެވެ.
ކޮންގޯގެ ބޮޑުވަޒީރު ބްރޫނޯ ޝިބާލާގެ ސަރުކާރުން އެއަމުރު ނެރެފައި ވަނީ މިދިޔަ ނޮވެމްބަރު މަހުގަ އެވެ. ނަމަވެސް އެގައުމުގެ މީޑިއާތަކުން އެކަން ރިޕޯޓު ކުރީ މިދިޔަ ހަފްތާތެރޭގަ އެވެ.
ފުރަތަމަ އަމުރުގައި ވަނީ ކުރީގެ ބޮޑުވަޒީރުންނަށް، މިހާރުގެ ބޮޑުވަޒީރަށްދޭ މުސާރައިގެ 30 ޕަސެންޓަށްވާ ވަރަށް މުސާރަ ދިނުމަށާއި ކޮންމެ އަހަރަކު ބިޒްނަސް ކްލާސް އެއް ޓިކެޓު ހިލޭ ދިނުމަށާއި ކޮންމެ މަހަކު ގޭގެ ހަރަދަށް 5،000 ޑޮލަރު ދިނުމަށެވެ.
ދެވަނަ އަމުރުގައި ވަނީ ކުރީގެ މިނިސްޓަރުންނަށް، މިހާރުގެ މިނިސްޓަރުންނަށް ދޭ މުސާރައިގެ 30 ޕަސެންޓަށްވާ ވަރަށް މުސާރަ ދިނުމަށާއި ކޮންމެ މަހަކު ގޭގެ ހަރަދަށް 1،000 ޑޮލަރު ދިނުމަށާއި ކޮންމެ އަހަރަކު ބިޒްނަސް ކްލާސް އެއް ދަތުރު ހިލޭ ދިނުމަށް އަންގާފަ އެވެ. އެގައުމުގެ މިނިސްޓަރަކަށް ކޮންމެ މަހަކު ދޭ މުސާރަ 4،000 ޑޮލަރަށް އަރަ އެވެ.
އެއަމުރަށް ކޮންގޯގެ ގިނަ އަދަދެއްގެ މީހުން ވަނީ ފާޑު ކިޔާފަ އެވެ. އޭގެ ތެރޭގައި ކުރީގެ ރައީސް ޖޯސެފް ކަބީލާގެ މުޝީރު ޕެޓްރިކް އެންކަންގާ ހިމެނެ އެވެ. އޭނާ ވަނީ ގައުމުގެ އިޖުތިމާއި އަދި އިގުތިސާދީ ހާލަތަށް ބަލާ އިރު އެއިނާޔަތްތައް މާބޮޑު ކަމަށް ވިދާޅުވެފަ އެވެ.
ކޮންގޯގެ އާ ރައީސް ފީލިކްސް ޝައިސްކެޑީ ވަނީ މިދިޔަ މަހުގެ 24ގައި ވެރިކަމުގެ ހުވާ ކުރައްވާފަ އެވެ. އަދި އާ ސަރުކާރެއް ގާއިމު ކުރުމަށް ބޮޑުވަޒީރު ޝިބާލާ ކުރިއަށް އޮތް ދުވަސްތަކުގެ ތެރޭގައި އިސްތިއުފާ ދެއްވާނެ އެވެ.