އައްޑޫ ސިޓީ ހަންކެޑެ މައްސަލައިގައި ގޮތެއް ނިންމައި މާދަމާ އާންމުކުރާނެ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
"ސަން" އަށް ދެއްވި އިންޓަވިއުއެއްގަިއ މިނިސްޓަރު ވިދާޅުވީ ހަންކެޑެ ތަރައްގީކުރުމާ ގުޅޭގޮތުން އެޓާނީ ޖެނެރަލްގެ ލަފާ ލިބިފައިވާ ކަމަށާއި އެކަމާ ގުޅޭގޮތުން މާދަމާ ގޮތެއް ނިންމަވާނެ ކަމަށެވެ.
އައްޑޫ ސިޓީ ހަންކެޑެ ހަންކެޑެ ތަރައްގީ ކުރުން ހުއްޓުމަކަށް އައިސްފައި އޮތަސް އެ މަސައްކަތް މި މަސް ނިމުމުގެ ކުރިން ކޮޅެއްގައި ޖައްސަވާނެކަމުގެ ޔަގީންކަން މިނިސްޓަރު އަލީ ވަހީދު ދެއްވާފައިވަނީ މި މަހުގެ ތެރޭގައި އައްޑޫ ސިޓީއަށް ކުރެއްވި ދަތުރުފުޅުގައެވެ.
ހަންކެޑެގައި ސިޓީ ހޮޓަލެއް ތަރައްގީ ކުރުމުގެ މަސައްކަތް އެންމެ ފުރަތަމަ ހަވާލުކުރީ 2005 ވަނަ އަހަރު ފުވައްމުލަކުގެ ކުންފުންޏެއް ކަމަށްވާ ތޫނޑު ޕްރައިވެޓް ލިމިޓެޑާއެވެ. 18 މަސް ތެރޭ ނިންމަން ހަވާލުކުރި އެ މަސައްކަތް އެ ކުންފުނިން ނިންމާފައިނުވާތީ ކުންފުނި ޖޫރިމަނާކޮށް 2008 ވަނަ އަހަރު މަސައްކަތް ހަވާލު ކުރީ ހާފް ޑިގްރީ ކިޔާ ކުންފުންޏަކާއެވެ. ނަމަވެސް އެ ކުންފުންޏާ ހަވާލުކުރި މަސައްކަތްވެސް ކުރިއަކަށް ނުދިޔައެވެ.
ދެހާސް ތޭރަވަނަ އަހަރު ހަންކެޑެ ތަރައްގީކުރަން އަނެއްކާވެސް ސިންގަޕޫރުގެ ކުންފުންޏަކާ ހަވާލުކުރިއެވެ. އެ ކުންފުނިން ހަންކެޑެ ތަރައްގީކުރާނެ ގޮތުގެ ޕްލޭންތައްވެސް އާންމު ކުރިއެވެ. ސިންގަޕޫރު ކުންފުނިން ނިންމާފައި އޮތީ ހަތަރެއް ނުވަތަ ފަސް ތަރީގެ ރިސޯޓެއްގެ ގޮތުގައި ހަންކެޑެ ތަރައްގީ ކުރުމަށެވެ.
ހަންކެޑެއަކީ އައްޑޫ ސިޓީގެ ފަތުރުވެރިކަމާ ގުޅިފައިވާ ރަށަކަށްވާއިރު އެތަން ތަރައްގީ ނުވެ ދިގުލައިގެން ދިއުމަކީ ރައްޔިތުންގެ ބޮޑު ކަންބޮޑުވުމެކެވެ.