ރިޔާސީ ލޯންޗު ކޮޅުގައި އެއްޗެއް ގޮއްވާލި މައްސަލާގައި 10 އަހަރަށް ޖަލަށް ލުމަށް ހުކުމް ކޮށްފައިވާ، ކުރީގެ ނައިބް ރައީސް އަހްމަދު އަދީބުގެ އޭރުގެ ދެ ބޮޑީގާޑުން ކަމަށްވާ އަހްމަދު އާމިރު އާއި އަހްމަދު ރިކާޒް ވަގުތީ ގޮތުން ގޭ ބަންދަށް ބަދަލުކޮށްފި އެވެ.
އެނގިފައިވާ ގޮތުގައި އާމިރު އާއި ރިކާޒު ވަގުތީ ގޮތުން ގޭ ބަންދަށް ބަދަލުކޮށްފައި ވަނީ ހޯމް މިނިސްޓަރަށް ލިބިވަޑައިގަންނަވާ ބާރުގެ ދަށުންނެވެ. އެކަމާ ގުޅިގެން ތަކުރާރުކޮށް ކަރެކްޝަންގެ މީޑިއާ އޮފިޝަލަށް ގުޅުމުން ވެސް ފޯނަށް ޖަވާބު ނުދެއްވާތީ ކަރެކްޝަންގެ ބަހެއް ވަނީ ލިބޭ ގޮތް ނުވެފަ އެވެ.
އެ މައްސަލާގައި ދައުލަތުން އުފުލި ޓެރަރިޒަމްގެ ދައުވާ ސާބިތުވެ އަދީބުގެ މައްޗަށް ވަނީ 15 އަހަރުގެ ޖަލު ހުކުމެއް އިއްވައިފަ އެވެ.
ރިޔާސީ ލޯންޗުކޮޅުގައި ގޮއްވާލި އައިއީޑީ އަދީބު ތައްޔާރުކުރީ ސިފައިންގެ މީހަކު ލައްވައިކަން ވަނީ ޝަރީއަތަށް ސާބިތުވެފަ އެވެ. އެ ސިފައިންގެ މީހާ ވަނީ މީގެ ކުރިން ބޭއްވި ޝަރީއަތުގެ މަޖިލީހެއްގައި ސިއްރުން ހެކިބަސްދީ، ކަން ހިނގައި ދިޔަ ގޮތް ތަފްސީލުކޮށް ކިޔައިދީފަ އެވެ.