ޖަކާޓާ (ޑިސެމްބަރު 23): އިންޑޮނޭޝިއާގެ ޕަންޑެގްލަންގް، ސެރަންގް އަދި ދެކުނު ލަމްޕަންގަށް ރޭ ސުނާމީއެއް އަރައި 43 މީހަކު މަރުވެއްޖެއެވެ.
އިންޑޮނޭޝިއާގެ ނެޝަނަލް ޑިޒާސްޓާ މިޓިގޭޝަން އޭޖެންސީން ބުނި ގޮތުގައި އެސުނާމީގެ ސަބަބުން 582 މީހުންނަށް އަނިޔާވެ، 430 ގެއަކަށާއި ނުވަ ހޮޓަލަށް ބޮޑެތި ގެއްލުންތައް ލިބިފައިވެއެވެ.
އެގައުމުގެ މީޓިއޮރޮލޮޖިކަލް އޭޖެންސީން ބުނި ގޮތުގައި އެސުނާމީ އެރީ ޖާވާ އާއި ސުމަތުރާގެ މެދުގައި އޮންނަ ރަށެއްގެ އަލިފާން ފަރުބަދައެއް ގޮވުމާ ގުޅިގެން ކަމަށް ލަފާ ކުރެވެއެވެ.
އަދި ސުނާމީ އެރުމުގެ ކުރިން ބިންހެލުމެއް އައިސްފައި ނުވާތީ، ސުނާމީ އަރާފާނެ ކަމުގެ އިންޒާރު ނުދޭ ކަމަށްވެސް އެއޭޖެންސީއާ ހަވާލާދީ ރިޕޯޓުކޮށްފައިވެއެވެ.
މިދިޔަ ސެޕްޓެމްބަރު މަހު އިންޑޮނޭޝިއާގެ ސުލަވެސީއަށް އައި ބާރުގަދަ ބިންހެލުމެއްގެ ސަބަބުން ސުނާމީ އަރައި، 2،000އަށް ވުރެ ގިނަ މީހުން މަރުވެފައިވެ އެވެ.