ޕެޑާއި ޓެމްޕެކްސްއިން ޓެކްސް ކަނޑާލުމަށްޓަކައި މުދަލާއި ޚިދުމަތްތަކުގެ އަގުން ޓެކްސް ނެގުމުގެ ބިލު މަޖިލީހަށް ބަލައިގެނެ މުޅި މަޖިލީހުގެ ކޮމެޓީއަށް ފޮނުވައިފި އެވެ.
މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހު ގެނައުމުގެ ބިލް މަޖިލީހަށް ބަލައިގަތީ ވޯޓުގައި ބައިވެރިވި 65 މެންބަރުންގެ އިއްތިފާގުންނެވެ.
ޕެޑުން ނަގާ ޓެކްސް ކަނޑާލުމަކީ ރައީސް އިބްރާހިމް މުހައްމަދު ސޯލިހްގެ ރިޔާސީ ވައުދެކެވެ. އެ ބިލް ސަރުކާރުގެ ފަރާތުން މަޖިލީހަށް ހުށަހެޅުއްވީ ކުރެންދޫ ދާއިރާގެ އަބްދުލްބާރީ އަބްދުﷲ އެވެ.
އެ ބިލަށް ބަހުސްކުރެއްވި ހުރިހާ މެންބަރުން ވެސް ވަނީ ޕެޑުން ޓެކްސް ނެގުން ހުއްޓާލުމަށް ތާއިދުކޮށް ވާހަކަ ދައްކަވައިފަ އެވެ. އަދި މިފަދައިން ޓެކްސް ކަނޑާލުމަށް ފަހު ވިޔަފާރިވެރިން އޭގެ އަގަށް ބަދަލުގެނޭތޯ ބަލައި ފާރަވެރިވާން ޖެހޭ ކަމަށް ބައެއް މެންބަރުން ވިދާޅުވި އެވެ.
މައްސަރު ދުވަސްވަރު ބޭނުންކުރާ ތަކެތިން ޓެކްސް ނެގުން ހުއްޓާލުމަށް މީގެ ކުރިން ވަނީ ޕެޓިޝަނެއް ވެސް ތައްޔާރުކޮށްފަ އެވެ. އެ ތަކެއްޗަކީ ޒަރޫރީ ތަކެތި ކަމަށާއި އެތަކެއްޗަކީ އާދައިގެ މީހުންނަށް ވެސް ބޭނުންކުރެވޭނެ، ހެޔި އަގެއްގައި ލިބެން ހުންނަ ތަކެއްޗަށް ހެދުމަށް ގޮވަލާ ސޯޝަލް މީޑިއާގައި ވަނީ ކެމްޕެއިންތައް ވެސް ހިންގައިފަ އެވެ.