ކުރީގެ މަޝްހޫރު ޑައިރެކްޓަރު އަބްދުލް ފައްތާފު ޑައިރެކްޓްކޮށް މިދިޔަ އަހަރު ސިނަމާތަކަށް ގެނައި ފިލްމު "ހައްދު"ގެ މަންޒަރެއް ނަގަން އުޅުމުގެ ތެރޭގައި، ހަމަ އަސްލަށް ރޮވުނު ކަމަށް އެ ފިލްމުގެ ލީޑު ތަރިއެއްގެ ގޮތުގައި ފެނިގެންދިޔަ އައިމިނަތު ރިޝްފާ ބުނެފިއެވެ.
"ސަން" އަށް ދިން އިންޓަވިއެއްގެ ތެރެއިން ރިޝްފާ ބުނީ އެ ފިލްމުގައި އޭނާގެ ފިރިމީހާ މަރުވެގެން އުޅޭ މަންޒަރު ޝޫޓް ކުރަން އުޅުމުގެ ތެރޭގައި އަސްލަށް ރޮވިގެން ގިނަ އިރު ތަކެއް މަންޒަރު ނުނަގާ ލަސްވެގެން ދިޔަ ކަމަށެވެ.
"ހައްދު" ގެ ޕޯސްޓަރެއްގައި ރިޝްފާ...
"ރިޝް އަށް ހަމަ ރަނގަޅަށް ވެސް ރޮވުން އެ ޝޮޓްގަ، ބައްޕަ ކައިރީ ހުންނަ ސީނެއް އެއީ، ފިރިމީހާ މަރުވެގެން ރޯން ޖެހޭނީ، އެގަޑީ ހިތަށް އެރީ އަމިއްލަ ކޮއްކޮ މަރުވެގެން ވީ ގޮތް، ފަހުން ވަރަށް ލަދުވެސް ގަތް އަސްލަށް ރޮވުނީމަ،" ދިވެހި ގިނަ ޑްރާމާ ސީރީޒް ތަކަކުން ވެސް ފެނިފައިވާ ރިޝްފާ ބުންޏެވެ.
"ހައްދު" ގައި ފުރަތަމަ ރިޝްފާ ފެނިގެންދިޔައީ ނޫސްވެރިޔާ އަހުމަދު ފައިރޫޒުގެ އަންހެނުންގެ ރޯލުންނެވެ. ނަމަވެސް ފިލްމު ނިމުނު އިރު އޭނާ ފެނިގެންދިޔައީ އެ ފިލްމުގެ ބަތަލް އަހުމަދު ޝިބާންގެ އަންހެނުންގެ ރޯލުންނެވެ.
އެ ފިލްމުގައި ރިޝްފާ ފެންނަނީ ވަރަށް މުއްސަނދި އާއިލާ އަކަށް އުފަން އަންހެން ކުއްޖެއްގެ ރޯލުންނެވެ. ރިޝްފާ އެ ފިލްމު ކުޅެން ބަރުދަން އިތުރު ވެސް ކުރިއެވެ.
"ހައްދު" ގެ ޕޯސްޓަރެއްގައި ރިޝްފާ އާއި ފައިރޫޒު....
"ހަމަ ވަރަށް ބަރު ކުރިން ބަރުދަން، އަނެއްކާ ޝޫޓިން ނިންމާފަ ހިކުނީ،" ރިޝްފާ ބުންޏެވެ.
"ދޭށެ މިބުނާ ލޯބި" ލަވައިން ފިލްމީ ދުނިޔެއަށް ނުކުތް ރިޝްފާ އަކީ މިހާރު ފިލްމީދާއިރާގެ އުހުގައި ފިޔަޖަހަމުން އަންނަ ބަތަލާއެކެވެ. ގިނަ ފިލްމު ތަކަކާއި ޑްރާމާ ތަކެއް ކުޅެފައިވާއިރު ދެން އެންމެ އަވަހަށް އޭނާ ފެންނާނީ ފާތިމަތު ނަހުލާގެ ކުރިޔަށް އޮތް ވެބް ސީރީޒް "ހުވާ" އިންނެވެ.