ސަރުކާރުގެ ބައެއް ލިޔެކިޔުންތައް ނައްތާލަމުންދާ ކަމަށް އަޑުފެތުރިފައި ވަނިކޮށް އެއްވެސް މުއައްސަސާއެއްގެ ލިޔެކިޔުމެއް ނައްތާ ނުލާނެ ކަމަށް ސަރުކާރުން ބުނެފި އެވެ.
ސަރުކާރުގެ ލިޔެކިޔުންތައް ނައްތާލުމަށް މަސައްކަތް ކުރަމުންދާކަމުގެ އަޑު ފެތުރުމުން އެ މައްސަލަ ފުލުހުންނަށް ހުށަހަޅާފައިވާ ކަމަށް އިންތިހާބީ ރައީސް އިބްރާހިމް މުހައްމަދު ސޯލިހު (އިބޫ)ގެ ތަރުޖަމާނު މާރިޔާ އަހުމަދު ދީދީ އިއްޔެ ވަނީ ވިދާޅުވެފަ އެވެ.
އެކަމާ ގުޅިގެން، އިއްޔެ ރައީސް އޮފީހުގެ ތަރުޖަމާނު އިބްރާހިމް މުއާޒް އަލީ ކުރެއްވި ޓްވީޓެއްގައި ވިދާޅުވީ ސަރުކާރުގެ އެއްވެސް މުއައްސަސާއެއްގައި ހުރި މުހިންމު ލިޔެކިޔުމެއް ނައްތާ ނުލާނެ ކަމަށެވެ. އަދި ކަރުދާސް ކުނި ނައްތާލުމަށް ކޮންމެ އޮފީހެއްގައި ވެސް އަބަދުވެސް ޝްރެޑަރު ހުންނަ ކަމަށް އޭނާ ވިދާޅުވި އެވެ.
ސަރުކާރުގެ އެއްވެސް ލިޔެކިޔުމެއް ނައްތާ ނުލާ ކަމަށް މުއާޒް ވިދާޅުވި އިރު، ފިތުނަ އާއި ބައިބައިވުން އުފެދޭ ކަހަލަ ވާހަކަ ނުދެއްކުމަށް ވެސް އޭނާ އިއްޔެ ވަނީ އިލްތިމާސްކޮށްފަ އެވެ.
"Sarukaaru ge evves mua'ssasaa ehgai huri muhimmu evves liyekiyumeh natthaeh nulaane. Kuneege gothugai beynun nethigendhaa karudhaas natthaalumah, paper shredder abadhuves sarukaaru office thakugai hurey. Fithunaveri, baibaivun ufedhey vaahaka nufethurumah ilthimaas kuran" -im
— ɪʙʀᴀʜɪᴍ ᴍᴜᴀᴢ ᴀʟɪ (@SpokespersonMV) September 25, 2018
އިއްޔެ ބޭއްވި ނޫސްވެރިންގެ ބައްދަލުވުމެއްގައި މާރިޔާ ވަނީ ސަރުކާރުގެ އެއްވެސް ލިޔުމެއް ނައްތާލާ ނަމަ އެކަމުގެ ޒިންމާ ކުރިއަށް އޮތް ސަރުކާރުގައި އުފުލަންޖެހޭނެ ކަމުގެ އިންޒާރު ދެއްވައިފަ އެވެ.