ބޮގޮޓާ (އޮގަސްޓު 27): ކޮލޮމްބިއާގައި އިއްޔެ ކޮރަޕްޝަނާ ދެކޮޅަށް ނެގި ފެންނަ ނުފެންނަ ވޯޓުގައި ކޯރަމް ހަމަވާ މިންވަރަށް މީހުން ވޯޓުލާފައި ނުވާ ކަމަށް އެގައުމުން ބުނެފިއެވެ.
އެވޯޓުގެ ނަތީޖާ ގާނޫނީ ގޮތުން ބަލައިގަނެވޭނީ، އެވޯޓުގައި 12.1 މިލިއަން މީހުން ބައިވެރިވި ނަމައެވެ. ނަމަވެސް އެގައުމުގައި ވޯޓުލުމަށް ޝަރުތު ހަމަވާ 36.4 މިލިއަން މީހުންގެ ތެރެއިން އެވޯޓުގައި ބައިވެރިވެފައި ވަނީ 11.6 މީހުންނެވެ.
އެ ވޯޓުގައި ކޮރަޕްޝަނާ ދެކޮޅަށް އެޅިދާނެ ހަތް ފިޔަވަޅަކަށް ރައްޔިތުންގެ ހިޔާލު ހޯދާފައިވެއެވެ. އޭގެ ތެރޭގައި ކޮރަޕްޝަނުގެ ކުށް ސާބިތުވާ ފަރާތްތަކަށް ގޭ ބަންދުގައި ބެހެއްޓުން ފަދަ ކުޑަ ހުކުމް ކުރުން ހުއްޓުވުމާއި، އިންތިހާބަކުން ހޮވިފައިވާ އޮފިޝަލުންގެ ޓެކްސް ރިޓާންސް އާންމުކުރުން މަޖުބޫރުކުރުވުމާއި ގާނޫނު ހަދާ މަޖިލީހުގެ މެމްބަރުންނަށް އެމަގާމުގައި ހުރެވޭނީ ތިން ދައުރަށްކަން ކަނޑައެޅުން ހިމެނެއެވެ.
އަދި އެވޯޓުގައި ބައިވެރިވި މީހުންގެ ތެރެއިން 99 ޕަސެންޓު މީހުން ވަނީ ވޯޓު ކަރުދާހުގައި ހިމެނޭ ފިޔަވަޅުތަކަށް ތާއިދުކޮށްފައެވެ.
ކޮލޮމްބިއާގެ ކޮންޓްރޯލާ ޖެނެރަލްގެ އޮފީހުން ބުނި ގޮތުގައި ކޮރަޕްޝަނުގެ ސަބަބުން އެގައުމަށް ކޮންމެ އަހަރަކު 15 ބިލިއަން ޑޮލަރުގެ ގެއްލުން ލިބެއެވެ. (ބީބީސީ)