އިނގިރޭސި ޕްރިމިއާ ލީގުގައި ޗެލްސީން އާސެނަލް ބަލިކުރި މެޗަށް ފަހު، ޗެލްސީއާ ވާދަވެރި ކްލަބުތައް ކަމަށްވާ، މެންޗެސްޓާ ސިޓީ، މެންޗެސްޓާރ ޔުނައިޓެޑް، ލިވަޕޫލް އަދި ޓޮޓެންހަމް ފަދަ ޓީމުތަކަށް އެޓީމުގެ ސްޕެނިޝް ފޯވާޑް އަލްވާރޯ މޮރާޓާ އިންޒާރުގެވަރު ގަދަ މެސެޖެއް ދީފި އެވެ.
ޗެލްސީގެ ދަނޑުގައި ހޮނިހިރު ދުވަހުގެ އާސެނަލް އަތުން އެޓީމު މޮޅުވީ، 3-2ގެ ނަތީޖާއަކުންނެވެ. ފޯރިގަދަ ކުޅުމެއް ފެނިގެން ދިޔަ އެމެޗުގައި ޗެލްސީގެ ލަޑުތައް ޖަހައިދިނީ، ޕެޑްރޯ މޮރާޓާ އަދި އަލޮންސޯ އެވެ. ޗެލްސީ ކޮޅަށް ލަނޑު ޖެހީ އާސެނަލްގެ މިކިތާރިޔަންއާއި އިވޮބީ އެވެ.
ޗެލްސީ ޓީވީއަށް ދިން އިންޓަވިއުއެއްގައި މޮރާޓާ ބުނީ، މައުރީޒިއޯ ސަރީގެ އިރުޝާދުގެ ދަށުން ޗެލްސީއަކީ އަނެއްކާ ވެސް އަމިއްލަ ދަނޑުގައި ބަލިކުރާން އުނދަގޫ ޓީމަކަށް ވެގެންދާނޭ ކަމަށެވެ. އެގޮތުން މި ސީޒަންގައި ވާދަވެރި ޓީމުތަކުން ޗެލްސީއާ މެދު ވަރަށް ބޮޑަށް ވިސްނަން ޖެހޭނެ ކަމަށް ވެސް އޭނާ ބުންޏެވެ.
"އެހެންޓީމުތަކުން މި ދަނޑުގައި ޕޮއިންޓެއް ހޯދަން ވަރަށް ވަރުގަދަ ކުޅުމެއް ކުޅެން މަޖުބޫރުވާނެ،" ޗެލްސީގެ އެންމެ އަގުބޮޑު ކުޅުންތެރިޔާ ބުންޏެވެ.
މޮރާޓާ ބުނީ، އޭނާ އެހެން ކްލަބުތަކަށް ދޭން ބޭނުންވާ މެސެޖަކީ، "މީ އަހަރެމެންގެ ދަނޑު. އެހެން ބަޔަކަށް މިތަނުން ޕޮއިންޓެއް ހޯދުމަކީ ވަރަށް އުނދަގޫ ކަމަކަށް ވާނެ،" ކަމަށެވެ.
އާސެނަލްއާ ދެކޮޅަށް ކުޅުނު މެޗުގައި ވަރަށް މޮޅަށް ހުރިހާ ކުޅުންތެރީން ވެސް ކުޅުނު ކަމަށާއި އަދި މިއީ ޗެލްސީއަށް ހައްގު މޮޅެއް ކަމަށް އޭނާ ބުންޏެވެ.
"އަހަރެމެން ރަނގަޅުކޮށްލަން ޖެހޭ ބައެއް ކަންކަން އެބަހުރި. މިއީ ވަރަށް މުހިއްމު ތިން ޕޮއިންޓް."
މޮރާޓާ ބުނީ، މޮޅުވުމަކީ ސަޕޯޓަރުން އުފަލުގައި ބައިތިއްބަން ދެވޭނެ އެންމެ ރަނގަޅު ހަދިޔާ ކަމަށާއި އެހެންކަމުން ޓީމުގެ ހުރިހާ ކުޅުންތެރީންގެ ވެސް އަޒުމަކީ މި ސީޒަންގައި މެޗުތަކުން މޮޅުވެ ބައިކޮޅަށް ވަންނަ ގޯލްތައް މަދުކުރުން ކަމަށެވެ.
ޗެލްސީ ވަނީ، މިސީޒަންގެ ލީގުގައި އެޓީމު ކުޅުނު ފުރަތަމަ މެޗު ހަޑާސްފީލްޑްއާ ދެކޮޅަށް ވާދަކޮށް 3-0ގެ ނަތީޖާއަކުން މޮޅުވެފަ އެވެ.
އަންނަ އާދީއްތަ ދުވަހު ޗެލްސީ ވާދަކުރާން ޖެހޭނީ ރަށުން ބޭރުގައި ނިއުކާސަލް ޔުނައިޓެޑާ އެވެ. އެމެޗުގެ ވެސް ފުރަތަމަ 11ގައި ހިމެނުމަކީ މޮރާޓާގެ އުންމީދެކެވެ.