މޯލްޑިވްސް ބިޒްނަސް އެވޯޑްސްއަށް ވާދަކުރާ ފައިނަލިސްޓުންގެ އިވެލުއޭޝަންތައް ފަށައިގެން ކުރިއަށް އެބަ ދެއެވެ.
ޕީއާރު އަދި މާކެޓިންގްގެ އިތުރުން ބިޒްނަސް ޑިވެލޮޕްމެންޓް ކުންފުނި ބްލޭޒަން އިންކުން އިންތިޒާމުކުރާ މޯލްޑިވްސް ބިޒްނަސް އެވޯޑްސްއަކީ ރާއްޖޭގެ ވިޔަފާރީގެ ދާއިރާއަށް ޚާއްސަކޮށްގެން ދޭ ފުރަތަމަ އެވޯޑެވެ. މިއަހަރަކީ މޯލްޑިވްސް ބިޒްނަސް އެވޯޑްސް ދޭ ފުރަތަމަ އަހަރެވެ.
ބިޒްނަސް އެވޯޑްސްގެ އެވޯޑުތަކަށް 100 އަށް ވުރެ ގިނަ ފަރާތުން ކުރިމަތިލީ އިރު، އެވޯޑުތަކަށް ނޮމިނޭޓުވި ފައިނަލިސްޓުން މިދިޔަ ހަފްތާ ތެރޭގައި ވަނީ އިއުލާނުކޮށްފައެވެ.
ބްލޭޒަންއިން މައުލޫމާތު ދޭ ގޮތުގައި، މިދިޔަ ހަފްތާގައި ފައިނަލިސްޓުން އިއުލާނުކުރުމާއެކު ފައިނަލިސްޓުންގެ އިވެލުއޭޝަންގެ މަސައްކަތްތައް ވަނީ ފަށާފައެވެ.
އެގޮތުން، ފައިނަލިސްޓުންގެ ގޮތުގައި އިއުލާނުކުރި ކުންފުނިތަކުން ޖަޖުންގެ ޕެނަލަށް ޕްރެޒެންޓޭޝަން ދިނުމުގެ މަސައްކަތް މިހާރު ކުރިއަށް ދާނެއެވެ.
ބްލޭޒަންއިން ބުނީ ބިޒްނަސް އެވޯޑްސް ދޭ ކެޓެގަރީތަކުގެ ތެރެއިން އިންޑިވިޖުއަލް އެކްސެލެންސް ވިޔަފާ އެހެން ކެޓަގަރީތަކުގެ ފައިނަލިސްޓުން ޕްރެޒެންޓޭޝަން ދިނުމާއި ޖަޖުންނާ އެކު އިންޓަވިއުކުރުން އޮންނާނެ ކަމަށެވެ.
އިންޑިވިޖުއަލް އެކްސެލެންސާއި އެންޓަޕްރައިޒް އެކްސެލެންސް ކެޓަގަރީގެ ފައިނަލިސްޓުންގެ ތެރެއިން އެވޯޑު ލިބޭ ފަރާތްތައް ކަނޑައަޅާނީ އާންމުންގެ ވޯޓާއެކު ކަމަށް ބްލޭޒަންއިން ބުންޏެވެ.
ބިޒްނަސް އެވޯޑްސްގެ ޖަޖިން ޕެނަލްގައި ހިމެނެނީ ހަމްދޫން އަބްދުﷲ ހަމީދު (ހެޑް އޮފް ޖަޖެސް ޕެނަލް)، ޑރ. އާއިޝަތު މުނީޒާ، ޑރ. މަރިޔަމް ވަސީމާ، ޑރ. އަޒްމިރަލްޑާ ޒާހިރު އަދި އަހްމަދު މާޒިންގެ އިތުރުން އަލްއުސްތާޒް އަޝްރަފް ރަޝީދު، އަބްދުﷲ ގިޔާސް ރިޔާޒް، ފާތިމަތު ޝާނާ ފާރޫގު އަދި އިބްރާހިމް އާތިފް ޝަކޫރެވެ.