ޒުވާނުންނަށް ތަފާތު ހުނަރުތައް ދަސްކޮށްދީ، ވަޒީފާގެ ބާޒާރަށް ނުކުތުމަށް ތައްޔާރުކުރުމުގެ ގޮތުން ރާއްޖޭގައި މިހާތަނަށް ގާއިމްކުރި އެންމެ ބޮޑު ވޮކޭޝަނަލް ޓްރެއިނިން ސެންޓަަރު (ޓިވެކް) ބ. ކިހާދޫގައި އިއްޔެ ހުޅުވައިފިއެވެ.
ކިހާދޫގައި ގާއިމްކޮށްފައިވާ ވޮކޭޝަނަލް ސެންޓަރުގައި އިއްޔެ ހަވީރު ބޭއްވި ރަސްމިއްޔާތުގައި އެ ސެންޓަރު ހުޅުވައިދެއްވި އެޑިއުކޭޝަން މިނިސްޓަރު ޑރ. އައިޝަތު ޝިހާމްއެވެ.
މިއީ ރާއްޖޭގެ ކުންފުންޏެއްް ކަމަށްވާ ކޯސްޓްލައިންއިން ހިންގާ ކޯސްޓަލައިން ފައުންޑޭޝަންގެ ފަރާތުން ގާއިމްކުރި ޓްރެއިނިން ސެންޓަރެކެވެ.
ޓިވެކްގައި ކިޔަވަމުންދާ ދަރިވަރުންތަކެއް-- ފޮޓޯ: އެޑިއުކޭޝަން މިނިސްޓްރީ
އެ ޓްރެއިނިން ސެންޓަރު ހިންގުމަށް އެޑިއުކޭޝަން މިނިސްޓްރީން އެ ފައުންޑޭޝަނަށް ވަނީ 223،500 އަކަ ފޫޓުގެ ބިމެއް، 20 އަހަރު ދުވަހުގެ މުއްދަތަކަށް ދޫކޮށްފަ އެވެ.
އެ ޓްރޭނިން ސެންޓަރާ ބެހޭގޮތުން މައުލޫމާތު ދެއްވަމުން ޓިވެކްގެ އެގްޒެކެޓިވް ޑިރެކްޓަރު މުހައްމަދު ނަޒީފް "ސަން" އަށް ވިދާޅުވީ އެ ޓްރެއިނިން ސެންޓަރުގައި ކިޔަވާ ދަރިވަރުންގެ އިތުރުން ޓްރެއިނަރުންނާއި އަދި ސްޓާފުންނަށްވެސް އެ ތަނުގައި ތިބުމުގެ އިންތިޒާމްވެސް ހަމަޖައްސައިފައިވާ ކަމަށެވެ.
"މި ތަނުގައި ހުންނާނެ ޕަވާ ހައުސްއާ، ފެން ޕްލާންޓަކާ އަމިއްލަ ނަރުދަމާ ނިޒާމްވެސް ގާއިމްކޮށްފައި،" ނަޒީފް ވިދާޅުވިއެވެ.
ނަޒީފް ވިދާޅުވީ އެ ސެންޓަރުގެ މިވަގުތު ޖާގަ ހުރި ގޮތުން މިހާރު ކިޔަވައިދޭނީ ހަމައެކަނި ފަންސާސް ކުދިންނަށް ކަމަށެވެ. އެ ސެންޓަރުގައި ކިޔެވުމަށް ރާއްޖޭގެ 12 އަތަޮޅަކުން 31 ރަށަކުން 50 ދަރިވަރުން މިހާރު ހޮވައިފައިވާ ކަމަށްވެސް ނަޒީފް ވިދާޅުވިއެވެ.
Minister @aishathshiham greeted by officials @TVEC_mv at the opening ceremony of Technical Vocational Education Center at B. Kihaadhoo. @EducationMV #ufaaveri #vocationaleducation #Learningbydoing #live pic.twitter.com/9tp3V11UDj
— Ufaa MoE (@UfaaMv) August 9, 2018
އެ ސެންޓަރުގައި މިވަގުތު ކިޔަވައިދޭ ކޯސްތައް
- އެންޖިން ރިޕެއާ އެންޑް މެނޭޖްމަންޓް
- އޭސީ އެންޑް ރެފްރިޖިރޭޝަން ރިޕެއާ
- އިލެކްޓްރިޝިއަން
ނަޒީފް ވިދާޅުވީ އެ ސެންޓަރުގައި މިވަގުތު ކިޔަވައިދެނީ 18 ހަފްތާފެ ސެޓްފިކެޓް ކޯސްތަކެއް ކަމަށެވެ. އެހެންނަމަވެސް ކުރިއަށް އޮތް ތަނުގައި އެޑްވާންސް ކޯސްތައް ކިޔަވައިދޭނެ ކަމަށްވެސް އޭނާ ވިދާޅުވިއެވެ.
"އަސްލު ފަސޭހައިން ކުދިންނަށް ވަދެވޭ ކަހަލަ ކޯސްތައް މިހާރު ކުރިއަށް ގެންދަނީ. އަޅުގަނޑުމެން މި ކޯސްތައް މި އަމާޒު ކުރަނީ ސްކޫލް ނިންމާފައި ތިބޭ ކުދިންނާ ސްކޫލު ނުނިންމާ ކުދިންގެ އިތުރުން ސެޓްފިކެޓް ނެތް ކުދިންނަށް،" ނަޒީފް ވިދާޅުވިއެވެ.