ބޮޑު އީދު ބަންދާ ދިމާކޮށް ޝެޑިއުލްކުރި މޯލްޑިވިއަންގެ ގިނަ ފްލައިޓްތައް ފުލްވެފައިވާ ކަމަށް އެ ކުންފުނިން ބުނެފި އެވެ.
މޯލްޑިވިއަން ހިންގާ އައިލެންޑް އޭވިއޭޝަނުގެ ހެޑް އޮފް އެޑްމިނިސްޓްރޭޝަން އަލީ ނަޝާތު "ސަން" އަށް ވިދާޅުވީ ގިނަ ފްލައިޓްތައް ފުލްވި އިރު، ޑިމާންޑަށް ބެލުމަށް ފަހު ފްލައިޓްތައް އިތުރު ކުރާނެ ކަމަށެވެ.
"އަޅުގަނޑުމެން އަބަދުވެސް ޑިމާންޑަށް ބަލާފަ ދަތުރުތައް އިތުރު ކުރަން. މިފަހަރު ވެސް، ޑިމާންޑް ބޮޑު ތަންތަނަށް އިތުރު ދަތުރުތައް ކުރާނެ،" ނަޝާތު ވިދާޅުވި އެވެ.
ގައުމީ އެއާލައިން މޯލްޑިވިއަނުން މިހާރު ވެސް ގިނަ ރަށްރަށަށް ދުވާލަކު ފަސް ވަރަކަށް ދަތުރު ކުރާ ކަމަށް އޭނާ ވިދާޅުވި އެވެ.
"ޑިމާންޑަށް ބަލާފަ އަޅުގަނޑުމެން އެ އަދަދު ބައެއްފަހަރު އެބަ އިތުރުކުރަން ހަ ދަތުރު، ހަތް ދަތުރަށް ވެސް،" ނަޝާތު ވިދާޅުވި އެވެ.
ކަލަންޑަރުގައިވާ ގޮތަށް ހައްޖުމަހުގެ ފުރަތަމަ ދުވަސް މި މަހުގެ 12 ވަނަ ދުވަހަށް ވެއްޖެ ނަމަ، ހައްޖު ދުވަސް ވާނީ 20 ވަނަ ދުވަހަށެވެ. އަދި އީދު ދުވަސް ވަނީ ޖެހިގެން އަންނަ 21 ވަނަ ދުވަހަށެވެ.
ސަރުކާރުން ނިންމާފައިވަނީ ކަލަންޑަރާ އެއްގޮތަށް ހައްޖު މަސް ފެށިއްޖެ ނަމަ، މި މަހުގެ 19ވާ އާދިއްތަ ދުވަހަކީ ބަންދު ދުވަހެއް ކަމަށެވެ. އަދި 17 އާއި 18 އަކީ ހުކުރާއި ހޮނިހިރު ކަމުން، އާދިއްތަ ދުވަސް ސަރުކާރުން ބަންދު ކުރުމާ ގުޅިގެން، މި ފަހަރުގެ އީދު ބަންދަށް ޖުމްލަ ނުވަ ދުވަސް ލިބޭނެ އެވެ. އީދު ބަންދަށް ފަހު ސަރުކާރު ހުޅުވޭނީ 26ވާ އާދިއްތަ ދުވަހު އެވެ.
އީދު ބަންދާ ދިމާކޮށް ރާއްޖޭގެ އެތެރޭގެ އުދުހުންތަކުގެ ޑިމާންޑް ބޮޑުވި އިރު، އަވައްޓެރި ގައުމުތަކަށް އެއާލައިންތަކުން ކުރާ ދަތުރުތަކުގެ ޑިމާންޑް ވެސް ވަނީ ވަރަށް ބޮޑުވެފަ އެވެ.