މިފަހަރު ރިޔާސީ އިންތިހާބުގައި އިލެކްޝަންސް ކޮމިޝަނުން ބޭނުން ކުރާ ވޯޓާސް ލިސްޓުގައި ފޮޓޯ ނުޖަހަން އެ ކޮމިޝަނުން ނިންމައިފިއެވެ.
މީގެ ކުރިން ބޭއްވި އިންތިހާބުތަކުގައި އިލެކްޝަންސް ކޮމިޝަނުން ބޭނުންކޮށްފައިވަނީ ފޮޓޯ ޖެހި ވޯޓަސް ލިސްޓެވެ. އަދި ވޯޓުލާ މަރުކަޒުގައި ހިއްޕާފައި ހުންނަ ލިސްޓުގައިވެސް ނަމާ އައިޑީކާޑު ނަމްބަރާއި، އެޑްރެސް އަދި ފޮޓޯ ޖަހާފައި ހުރެއެވެ،
އިލެކްޝަނުން މިއަދު ކުރި ޓްވީޓެއްގައި ބުނެފައި ވަނީ މިފަހަރު އެ ކޮމިޝަނުން ބޭނުން ކުރާ ވޯޓަސް ލިސްޓުގައި ފޮޓޯ ނުޖަހަން ނިންމާފައިވާ ކަމަށެވެ.
ވޯޓުލާ މަރުކަޒުގައި ހިއްޕާ ވޯޓާސް ލިސްޓުގައިވެސް ފޮޓޯ ނުޖަހަން ނިންމާފައިވާ ކަމަށް އަކްރަމް ވިދާޅުވި އެވެ. އެގޮތަށް ނިންމީ ވަރަށް ގިނަ ފަރާތްތަކުން ފޮޓޯ އާންމު ކުރާތީ އެކަމުގެ ޝަކުވާ ކޮމިޝަނަށް ހުށަހެޅުމުން ކަމަށް ވިދާޅުވިއެވެ.
"މޫނުބުރުގާ އަޅާ ފަރާތްތަކުންވެސް ޝަކުވާ ހުށަހެޅި މޫނު ފެންނަ ގޮތަށް ހުންނަ ފޮޓޯ އާންމުކުރާތީ. އަދި ބައެއް ފަރާތްތަކުން ބުރުގާ ނާޅާ ހުރިއިރު ނަގާފައި ހުރި ފޮޓޯ އާންމު ކުރެވޭތީވެސް ޝަކުވާ ހުށަހެޅި" އަކްރަމް ވިދާޅުވިއެވެ.
އެހެންވެ އެ ހުރިހާ ކަމަކަށް ބެލުމަށް ފަހު ވޯޓުލާ މަރުކަޒުގައި ހިއްޕާ ވޯޓާސް ލިސްޓުގައިވެސް ފޮޓޯ ނުހިމަނަން ނިންމާފައިވާ ކަމަށް އަކުރަމް ވިދާޅުވިއެވެ. އެހެން ނަމަވެސް ގާނޫނުގައި ވޯޓަށް ލިސްޓުގައި ހިމަނަން ބުނެފައިވާ ހުރިހާ މައުލޫމާތެއް ހުންނާނެ ކަމަށް ވިދާޅުވިއެވެ.
ރިޔާސީ އިންތިހާބުގެ ވޯޓާސް ލިސްޓު ޝަކުވާ ހުށަހަޅަން ފުރުސަތު ހުޅުވާލުމަށް ފަހު މިހާރު ޝަކުވާތައް އިސްލާހުކޮށް، ލިސްޓެއް އާންމުކޮށްފައެވެ. އާންމުކޮށްފައެވެ. އިންތިހާބު ބާއްވާނެކަމަށް އިލެކްޝަނުން އިއުލާނުކޮށްފައި ވަނީ ސެޕްޓެމްބަރު 23އެވެ.
އިންތިހާބަށް ކުރިމަތިލުމުގެ ފުރުސަތު މި މަހު ފަހުކޮޅު ހުޅުވާލާނެ ކަމަށް އިލެކްޝަނުން ވަނީ ބުނެފައެވެ.