ދަ އިންޓަނޭޝަނަލް ޔޫތް ކޮމިޓީ (އައިވައިސީ) އިން މި އަހަރު ލަންކާގައި ބޭއްވުމަށް ހަމަޖެހިފައިވާ ސައުތު އޭޝިއަން ޔޫތު ސަމިޓް (ސޭސް)އަށްދާ ރާއްޖޭގެ ވަފުދުގައި ބައިވެރިވުމުގެ ފުރުސަތު ރަފީ ޖަމިއްޔާ އިން ހުޅުވާލައިފި އެވެ.
ދުނިޔޭގެ އެކިކަންކޮޅުތަކުގައި އުޅޭ ޒުވާނުންނަށް އެއްބާރުލުން ދީ، އެމީހުންގެ ހާލަތު ރަނގަޅު ކުރުމަށް މަސައްކަތްކުރާ ބައިނަލްއަގްވާމީ ޒުވާނުންގެ ޖަމިއްޔާ، އައިވައިސީ އިން ސޭސް ބާއްވަން ފެށީ މިދިޔަ އަހަރު އެވެ.
އިންޑިއާގެ އިރުމަތީ ސްޓޭޓެއް ކަމަށްވާ އޮޑިޝާގައި މިދިޔަ އަހަރު ބޭއްވި ސޭސްގެ ފުރަތަމަ ސަމިޓަށް ފަހު، މި އަހަރުގެ ސަމިޓް ބާއްވަން ހަމަޖެހިފައި ވަނީ ސްރީ ލަންކާގެ، ކޮލަމްބޯގަ އެވެ. އަންނަ ސެޕްޓެމްބަރު 17 އިން 20 އަށް ބާއްވާ ސަމިޓް އޮންނާނީ ބީއެމްއައިސީއެޗް ކޮލަމްބޯގަ އެވެ.
އައިވައިސީގައި ރާއްޖެ ތަމްސީލު ކުރާ ރަފީ ޖަމިއްޔާ އިން ބުނީ، ލަންކާގައި ބާއްވާ ދެވަނަ ސައުތު އޭޝިއަން ޔޫތު ސަމިޓަށްދާ ދިވެހި ވަފުދުގައި ބައިވެރިވާން ބޭނުންވާ ދިވެހި ޒުވާނުންނަށް އަންނަ ހަފްތާގެ ހޯމަ ދުވަސް (18 ޖޫން)އާ ހަމައަށް ފުރުސަތު ހުޅުވާލާފައިވާ ކަމަށެވެ.
އެގޮތުން ސަމިޓްގައި ބައިވެރިވުމުގެ ފުރުސަތު ހުޅުވާލާފައި ވަނީ، ރަފީ ޖަމިއްޔާގެ މެމްބަރެއްގެ ގޮތުގައި ރަޖިސްޓްރީވެފައިވުމާ އެކު އުމުރުން 17 އަހަރާއި 35 އަހަރާ ދެމެދުގެ ޒުވާނުންނަށެވެ. ރަފީ ޖަމިއްޔާގައި ރަޖިސްޓްރީވެފައި ނުވާ ނަމަ، ރަޖިިސްޓްރީ ވުމުގެ ފުރުސަތު އޮންނާނެ ކަމަށް އެ ޖަމިއްޔާ އިން ބުންޏެވެ.
ރަފީ އިން ބުނީ، ސަމިޓްގައި ބައިވެރިވުމަށް އެ ޖަމިއްޔާ އަދި އެ ޖަމިއްޔާގެ ޕާޓްނަރުންގެ ފަރާތުން ވެސް އެއްވެސް ސްކޮލަޝިޕް ފުރުސަތެއް ދެވެން ނެތް ކަމަށާއި އެހެންކަމުން ސަމިޓްގައި ބައިވެރިވުމުގެ ފީ ހަމަޖައްސަން ޖެހޭނީ ބައިވެރިއަކު އަމިއްލައަށް ކަމަށެވެ.
ނަމަވެސް ބައިވެރިވާނެ ކަމުގެ ޔަގީންކަން ދިނުމުން ސްޕޮންސަރެއް ހޯދުމަށް ސަޕޯޓިން ލެޓާ ޖަމިއްޔާގެ ފަރާތުން ފޯރުކޮށްދޭނެ ކަމަށް ރަފީ އިން ބުނެ އެވެ.