މެންޗެސްޓާ ސިޓީއަށް މި ސީޒަންގައި މޮޅު ކުޅުމެއް ދެއްކި ލެރޮއީ ސާނޭ ބާކީކޮށް، ޖަރުމަނުން އެ ގައުމުގެ ވޯލްޑް ކަޕް ސްކޮޑު އިއުލާންކޮށްފިއެވެ.
މިމަހު 14 ވަނަ ދުވަހު ރަޝިޔާގައި ފެށުމަށް ހަމަޖެހިފައިވާ ވޯލްޑް ކަޕަށް ތައްޔާރަމުންދާ ޖަރުމަނުން ކުރިން އިއުލާން ކުރި 27 ކުޅުންތެރިންގެ ސްކޮޑުގައި ސާނޭ ހިމެނުނު ނަމަވެސް، ޖަރުމަނުގެ ކޯޗު ޔޯކިމް ލޯވް މިއަދު އިއުލާން ކުރި 23 ކުޅުންތެރިންގެ ސްކޮޑުން އޭނާގެ ނަން ވަނީ އުނިކޮށްފައެވެ.
ނުވަ މަސް ދުވަހު އަނިޔާގައި ހުރުމަށްފަހު މިދިޔަ ހަފްތާ ތެރޭގައި ކުޅެން ނުކުތް ޖަރުމަނުގެ ކެޕްޓަން، ގޯލްކީޕަރު މެނުއަލް ނޯޔާއަށް ޓީމުން ޖާގަ ދީފައިވާ އިރު، ޗެލްސީގެ ޑިފެންޑަރު އެންޓޯނިއޯ ރުޑިގާއާއި ސިޓީގެ މިޑްފީލްޑަރު އިލްކޭ ގުންޑޮގާން އަދި އާސެނަލްގެ މެސުޓް އޮޒިލްވެސް ޖަރުމަނު ސްކޮޑުގައި ހިމެނެއެވެ.
މި އަހަރުގެ އިނގިރޭސި ޕްރިމިއާ ލީގުގެ އެންމެ މޮޅު ކުޅުންތެރިޔާއަށްވެސް ވާދަކުރި ސާނޭ ވަނީ ސިޓީއަށް ސީޒަންގައި ކުޅުނު 49 މެޗުން 14 ގޯލް ޖަހައި 19 އެސިސްޓް ހަދައިދީފައެވެ.
ޖަރުމަނުގެ ވޯލްޑް ކަޕް ސްކޮޑު:
ގޯލްކީޕަރުން: މެނުއަލް ނޯޔާ (ބަޔާން މިއުނިކް)، މާކް އެންޑްރޭ ޓާ ސްޓެގަން (ބާސެލޯނާ)، ކެވިން ޓްރެޕް (ޕީއެސްޖީ)
ޑިފެންޑަރުން: ޖެރޯމް ބޯޓެންގް (ބަޔާން މިއުނިކް)، މެތިއަސް ގިންޓާ (ބުރީޝިޔާ މޮންޗެންގްލެޑްބެޗް)، ޖޯނަސް ހެކްޓަރ (ކޮލޯން)، މެޓްސް ހަމުލްސް (ބަޔާން މިއުނިކް)، ޖޯޝުއާ ކިމިޗް (ބަޔާން މިއުނިކް)، މާވިވް ޕެލެޓެންހާޑް (ހާތާ ބާލީން)، އެންޓޯނިއޯ ރުޑިގާ (ޗެލްސީ)، ނިކަލަސް ސުލޭ (ބަޔާން މިއުނިކް)
މިޑްފީލްޑަރު: ޖޫލިއަން ބްރަންޑިތު (ބަޔާން ލެވަކޫސެން)، ޖޫލިއަން ޑްރެގްޒްލާ (ޕީއެސްޖީ)، ލިއޮން ގޮރެޓްސްކާ (ޝާލްކޭ)، އިލްކޭ ގުންޑޮގާން (މެންޗެސްޓާ ސިޓީ)، ސެމީ ކެދީރާ (ޔުވެންޓަސް)، ޓޯނީ ކްރޫސް (ރެއާލް މެޑްރިޑް)، މެސުޓް އޮޒިލް (އާސެނަލް) ސެބެސްޓިއަން ރުޑީ (ބަޔާން މިއުނިކް)
ފޯވަޑުން: މާރިއޯ ގޮމޭޒް (ސްޓަޓްގާޑް)، ތޯމަސް މުލާ (ބަޔާން މިއުނިކް)، މާކޯ ރޫސް (ބުރީޝިއާ ޑޯޓުމަންޓް) ޓިމޯ ވާނާ (ރެޑްބުލް ލެއިޕްޒިގް)