އިންޑިއާގެ ގައުމީ ޓީމުން އެންމެފަހުން ކުޅުނު އިންޓަކޮންޓިނެންޓަލް ކަޕް މެޗުގައި އެޓީމަށް ސަޕޯޓްކުރަން ދަނޑަށް ވަދެފައިވަނީ އެންމެ 2،569 ސަޕޯޓަރުންނެވެ. އިންޑިއާގެ ކްލަބު ފުޓުބޯޅަ މިދިޔަ ދެ އަހަރެއްގެ ތެރޭގައި ކުރިއަރާފައިވާ ވަރަށް ބަލާ އިރު، މިއީ ހައިރާންވާން ޖެހޭ އަދަދެކެވެ.
އާންމުކޮށް އިންޑިއާގެ ރައްޔިތުންގެ އެއް ނަންބަރު ކުޅިވަރަކީ ކްރިކެޓް ނަމަވެސް، ފަހަކަށް އައިސް ފުޓުބޯޅަ ގައުމީ ޓީމުން ހޯދަމުންދާ ކާމިޔާބީތަކުގެ ސަބަބުން އެ ގައުމުގެ ރައްޔިތުން ފުޓުބޯޅައަށް ލޯބިކުރަން ފެށިތަން ފެނިގެންދިޔައެވެ. އަންނަ އަހަރު އެގައުމުން އޭޝިއަން ކަޕް ކުޅުމަށް ތައްޔާރުވަމުންދާ އިރު، މިއަހަރު ސާފް ޗެމްޕިއަންޝިޕަށްވެސް އިންޑިއާގެ އުންމީދުތައް ހުރީ ތަށްޓަށެވެ.
ފީފާ ރޭންކިންގެ 97 ވަނައިގައި މިވަގުތު އޮތް އިންޑިއާއިން ފުޓުބޯޅައިގައި ކާމިޔާބީތަކަކާ ދިމާއަށް ދަތުރު ފަށާފައިވާ އިރު، ގައުމީ ޓީމަށް ހާއްސަކޮށްގެން މިހާރު ކުޅޭ އިންޓަކޮންޓިނެންޓަލް މުބާރާތަކީ ގައުމީ ޓީމު އިޝްތިހާރު ކޮށްލުމުގެ މުބާރާތެކެވެ.
އިންޑިއާއިން ފުރަތަމަ މެޗުގައި 5-0ގެ ނަތީޖާއަކުން ޗައިނީސް ޓައިޕޭ ބަލިކުރި އިރު، ދެން އެ މުބާރާތުގައި ބައިވެރިވާ ޓީމުތަކަކީ ކެންޔާއާއި ނިއުޒިލޭންޑެވެ.
އިންޑިއާއިން އެ މުބާރާތުގައި ކުޅުނު ފުރަތަމަ މެޗު މުމްބާއީގައި ކުޅެފައިވާ އިރު، މެޗުގައި ކެޕްޓަން ސުނިލް ޗެތުރީ ވަނީ ހެޓްރިކް ހަދައިފައެވެ. ޗެތުރީގެ ހެޓްރިކާއެކު އޭނާ މާ ބޮޑަށް އުފާފާޅުކޮށްފައި ނުވާ އިރު، މެޗަށްފަހު ޗެތުރީގެ ޓްވިޓާގައި އޭނާ ވަނީ އިންޑިއާގެ ފުޓުބޯޅަ ސަޕޯޓަރުންނަށް ހާއްސަ މެސެޖެއް ދީފައެވެ.
"އިންޑިއާގެ ގައުމީ ޓީމާ ދޭތެރޭ އުންމީދު ގެއްލި، އިންޑިއާގެ ފުޓުބޯޅައަށް ނަފުރަތުކުރާ ހުރިހާ ސްޕޯޓަރުން ކައިރީވެސް ބުނަން އޮތީ ދަނޑަށް ވަދެ ކުޅުން ބަލާލާށޭ. ގޭގައި ތިބެ އިންޓަނެޓްގައި، މީސްމީޑިއާގައި ޓީމަށް ފުރައްސާރަކޮށް، ޖޯކު ޖެހުމަކީ އެންމެ ރަނގަޅުގޮތެއް ނޫން. ދަނޑަށް ވަދެ ކުޅުންތެރިންނާ ދިމާއަށް ފާޑުވެސް ކިޔަންވާނީ،" ޗެތުރީގެ މެސެޖުގައި އޭނާ ބުނެފައިވެއެވެ.
This is nothing but a small plea from me to you. Take out a little time and give me a listen. pic.twitter.com/fcOA3qPH8i
— Sunil Chhetri (@chetrisunil11) June 2, 2018
ޗެތުރީގެ މެސެޖުގައި އިންޑިއާގެ ފުޓުބޯޅައަށް ނަފުރަތުކޮށް، ޔޫރަޕްގެ ފުޓުބޯޅައަށް ސަޕޯޓްކުރާ ސަޕޯޓަރުންނަށް ވެސް ހާއްސަ މެސެޖެއް ދީފައިވެއެވެ.
"ގިނަ ފަހަރު ބުނަނީ އިންޑިއާގެ ފުޓުބޯޅައަކީ ރަނގަޅު ލެވެލްއެއްގެ ފުޓުބޯޅައެއް ނޫނޭ. ގަބޫލުކުރަން... ޔޫރަޕްގެ ލެވެލްއާ އަޅާވެސް ނުކިޔޭނެ. އެކަމަކު އިންޑިއާގެ ޓީމުން މިކުރާ ހުރިހާ މަސައްކަތަކީ ސަޕޯޓަރުން ދަނޑަށް ވަދެ ތިބޭ ވަގުތުގައި އެންމެ އެކަށޭނެ ކުޅުމެއް ދެއްކޭތޯ ކުރާ މަސައްކަތް. މަސައްކަތުން ރަނގަޅު ފުޓުބޯޅައެއް ކުޅެވޭނީ،" ޗެތުރީ ބުންޏެވެ.
ޗެތުރީގެ އަސަރުގަދަ މެސެޖަށް އިންޑިއާގެ އެންމެ މަގުބޫލު ކްރިކެޓް ކުޅުންތެރިޔާ ވިރާތު ކޯލީވެސް ތާއީދުކޮށްފައިވާ އިރު، އޭނާ ބުނެފައިވަނީ ހުރިހާ ކުޅިވަރަކަށްވެސް ސަޕޯޓް ދޭން ޖެހޭނީ ގައުމީ ލެވެލްއަށް ކަމަށެވެ.
ފުޓުބޯޅައިގައި އިންޑިއާގެ ގައުމީ ޓީމު 2015 ވަނަ އަހަރު އޮތީ ވޯލްޑް ރޭންކިންގެ 166 ވަނައިގައެވެ. އޭގެފަހުން އެޓީމުގެ ގައުމީ ޓީމަށް ބޮޑެތި ކުރިއެރުންތަކެއް އައިސްފައިވާ އިރު، އަންނަ ހޯމަ ދުވަހު ކެންޔާއާ ދެކޮޅަށް އިންޑިއާއިން ކުޅޭ މެޗު ވެގެންދާނީ ކެޕްޓަން ޗެތުރީ ގައުމީ ޖާޒީގައި ކުޅޭ 100 ވަނަ މެޗަށެވެ.
މިހާތަނަށް ގައުމީ ޓީމާއެކު ކުޅުނު 99 މެޗުން ޗެތުރީ ވަނީ 59 ގޯލް ޖަހައިފައެވެ. ގައުމީ ޓީމަށް މިހާރު ކުޅޭ ކުޅުންތެރިންގެ ތެރެއިން ގައުމީ ޓީމަށް އެންމެ ގިނަ ގޯލް ޖެހި ކުޅުންތެރިންގެ ލިސްޓްގެ ތިންވަނައިގައި އޭނާ އޮތް އިރު، ލިސްޓްގައި ޗެތުރީއަށްވުރެ ކުރީގައި އޮތީ ކްރިސްޓިއާނޯ ރޮނާލްޑޯއާއި ލިއޮނަލް މެސީއެވެ.