ނިމިގެންދިޔަ ސީޒަނަށްފަހު އާސެނަލްގެ ކޯޗުކަމުގެ މަގާމުން ވަކިވި އާސެން ވެންގާ، މަސައްކަތެއް ނެތުމުގެ ސަބަބުން ފޫހިކަން އިހުސާސްވެފައިވާ ކަމަށާއި އެކަން ނައްތާލުމަށް ބޮޑު ކްލަބަކާ ހަވާލުވާން ބޭނުންވާ ކަމަށް ވެންގާ ބުނެފިއެވެ.
މިދިޔަ ސީޒަނަށްފަހު އާސެނަލްގެ ކޯޗުކަމުން ވެންގާ ދުރުވެފައިވަނީ 22 އަހަރުގެ މުއްދަތަކަށް އެކްލަބުގެ ކޯޗުކަމުގެ މަގާމު އަދާކުރުމަށްފަހުއެވެ. އޭނާގެ ބަދަލުގައި އާސެނަލާ ހަވާލުވެފައިވަނީ އުނައި އެމެރީއެވެ.
އާސެނަލްގެ ކޯޗުކަމުން ވެންގާ ވަކިވުމަށްފަހު އެހެން ކްލަބަކާ ހަވާލުވުމުގެ ވިސްނުން އޭނާ ގެންގުޅޭނީ ޗުއްޓީގައި ދުވަސްތަކެއް ހޭދަކުރުމަށްފަހު ކަމަށް ކުރިން ބެލެވުނެވެ.
"އަހަރެންނަކީ މަޖާކޮށް، ބީޗުގައި ވަގުތު ހޭދަކުރަން ބޭނުންވާ މީހެއް ނޫން. ގައިގައި އަށަގަނެފައިވާ ކަމެއްގެ ސަބަބުން ވަރަށް އަވަހަށް އަހަރެން ފޫހިވާން ފަށައިފި. އަހަރެން ބޭނުންވަނީ ބޮޑު ބޮޑު ކްލަބަކާ ހަވާލުވެ، އެކްލަބެއްގެ ސަޕޯޓަރުންނަށް ހާއްސަކަމެއް ގެނެސްދޭން،" ވެންގާ ބުންޏެވެ.
އާސެނަލްގެ ކޯޗުކަމުގައި ހޭދަކުރި 22 އަހަރުގެ ތެރޭގައި ވެންގާ ވަނީ އެކްލަބަށް ތިން ފަހަރު އިނގިރޭސި ޕްރިމިއާ ލީގާއި، ހަތް ފަހަރު އެފްއޭ ކަޕް ހޯދައިދީފައެވެ. ނަމަވެސް 2004 ވަނަ އަހަރަށްފަހު ވެންގާއަށް ޕްރިމިއާ ލީގު ހޯދައިދެވިފައެއް ނުވެއެވެ.