އާއިޝަތު ފަރީހާ އަދި މުހައްމަދު ޝަމްއޫން
އިނގިރޭސި އެފްއޭކަޕްގައި މެންޗެސްޓާ ޔުނައިޓެޑަށް ލިބުނު ނާކާމިޔާބީއަށްފަހު، އެލެކްސިސް ސަންޗޭޒް ޗުއްޓީ ހޭދަކޮށްލުމަށް ރާއްޖެ އަތުވެއްޖެއެވެ.
އެފްއޭ ކަޕް ފައިނަލްގައި ޔުނައިޓެޑުން ޗެލްސީ އަތުން ބަލިވީ 1-0ގެ ނަތީޖާއަކުންނެވެ. މެޗުގައި ޗެލްސީގެ ގޯލް ޖަހައިދިނީ އެޑިން ހަޒާޑެވެ.
އެ މެޗާއެކު ޔުނައިޓެޑަށް ސީޒަން ނިމުމާއެކު ސަންޗޭޒް ރާއްޖެ އައިސްފައިވަނީ މިއަދުއެވެ. އޭނާ ޗުއްޓީ ހޭދަުރާނީ ޝަވެލް ބްލަންކް ރަންދެލި ރިސޯޓުގައެވެ.
ޗިލީއަށް ނިސްބަތްވާ އުމުރުން 29 އަހަރުގެ ފޯވަޑް ވަނީ ބާސެލޯނާ އަދި އާސެނަލްއަށް ވެސް ކުޅެފައެވެ. ދެހާސް ސާދަވަނަ އަަހަރުން ފެށިގެން އާސެނަލަށް 100 އަށް ވުރެ ގިނަ މެޗު ކުޅެދީފައިވާ ސަންޗޭޒް ޔުނައިޓެޑަށް ބަދަލުވީ މިދިޔަ ޖަނަވަރީ މަހުގެ ޓްރާންސްފާ ސީޒަންގައެވެ. ސީޒަންގައި ޔުނައިޓެޑުން ތާވަލުގެ ދެވަނައިގައި ސީޒަން ނިންމާލި އިރު، އޭނާއާއި ޔުނައިޓެޑަށް ސީޒަން ނިންމާލަން ޖެހުނީ ޓްރޮފީއަކާ ނުލައެވެ.
މިހާތަނަށް ގައުމީ ޓީމަށް 119 މެޗު ކުޅެދީފައިވާ ސަންޗޭޒްއަށް 2014 ވަނަ އަހަރުގެ ވޯލްޑްކަޕް ވެގެންދިޔައީ ކާމިޔާބު ވޯލްޑް ކަޕަކަށެވެ. ސްޕެއިންއާ އެއް ގްރޫޕެއްގައި ޗިލީ ހިމެނުނު އިރު، ޗިލީން ވަނީ ގްރޫޕް ސްޓޭޖުން ސްޕެއިން ކަޓުވައިލައި ގަދަ 16އަށް ދަތުރުކޮށްފައެވެ.
ގަދަ 16އިން ޗިލީ ކެޓީ ޕެނެލްޓީ ޖަހައިގެން ބްރެޒިލް އަތުން ބަލިވެގެންނެވެ. ދެކުނު އެމެރިކާގެ ޗެމްޕިއަނުން ގޮތުގައި މިދިޔަ އަހަރުގެ ކޮންފެޑެރޭޝަންސް ކަޕްވެސް ކުޅުނު ޗިލީއަށް މިފަހަރުގެ ވޯލްޑް ކަޕް ކޮލިފިކޭޝަން ނިމުނީ ހިތިކޮށެވެ. ކޮލިފިކޭޝަން އެންމެ ފަހު މެޗުގައި ބްރެޒިލް އަތުން ޗިލީ ބަލިވެފައިވާ އިރު، ޗިލީއަށް ވޯލްޑް ކަޕް ކޮލިފިކޭޝަންގެ ފުރުސަތު ގެއްލުނީ ހަނި ފުރުސަތަކުންނެވެ.