ސިފައިންގެ ކޯޕަރޭޓިވް ސޮސައިޓީ (ސިފްކޯ) އާއި ސިފައިންގެ ވެލްފެއާ ކުންފުނި ސިވެކް އެއްކޮށްލައިގެން މުޅިން އާ ކުންފުންޏެއް އުފެއްދުމުގެ މަސައްކަތް ފަށާފައިވާ ކަމަށް ޑިފެންސް މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ.
ސިފައިންގެ ހިދުމަތުގެ އަގު ވަޒަންކުރުމަށް ރޭ ކަޅުތުއްކަލާ ކޮށީގައި ބޭއްވި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރު ވިދާޅުވީ، ސިފައިންގެ ވެލްފެއާ ކަންކަމާއި ސިފައިންގެ ތަރައްގީއަށް ކުރާ ކަންކަމަށް ލޯނު ހޯދަން ބަލާއިރު، ސިފްކޯ އަކީ ކުންފުންޏަކަށް ނުވުމުން ދަތިތަކާއި ކުރިމަތިވާ ކަމަށެވެ.
ސިފްކޯއިން ހަދާ ސިފައިންގެ ފުލެޓް މަޝްރޫއު ފަދަ މަޝްރޫއުތައް އެންމެ ބޭނުންވާ ތާރީހަށް ނުނިމި ދަތިތަކަކާ ކުރިމަތިވާ އެއް ސަބަބަކީ ވެސް އެއީ މިނިސްޓަރު ވިދާޅުވި އެވެ.
"ސިފްކޯއާ ސިވެކް އެއްކޮށްލުމަށް އަޅުގަނޑުވާނީ ލަފާދޭ މަޖިލީހަށް ހުށަހަޅާފައި. މިކަމާ ބެހޭ ގޮތުން އިކޮނޮމިކް މިނިސްޓްރީއާ ވެސް ވާހަކަދެކެވި، އަދި މިއީ އެންމެ ރަގަނޅު މޮޑެލް އެއްކަމުގައި ވެދާނެ ކަމަށް ބެލެވޭ ކަމަށް އިރުޝާދު ލިބި، މިހާރު އެ މަސައްކަތްތައް އަޅުގަނޑުމެން މިދަނީ ކުރަމުން،" މިނިސްޓަރު ރޭ ދެއްކެވި ވާހަކަފުޅުގައި ވިދާޅުވި އެވެ.
މިނިސްޓަރު އާދަމް ޝަރީފް ވިދާޅުވީ، އެގޮތުން އެއް ކުންފުންޏެއް ހެދުމުން ލޯނުތައް ހޯދުމަށާއި ސިފައިންގެ ވެލްފެއާއަށް އެކި ގޮތްގޮތުން ފަސޭހަ ވެގެންދާނެއެވެ.
ސިފައިންގެ އާއިލާތަކަށް ހާސްކޮށްގެން ހަދާ ސިފްކޯ ހިޔާ ފުލެޓް މަޝްރޫއު ނުނިމި ގިނަ ދުވަސް ވަމުން އަންނަނީ ފައިސާ ލިބޭނެ އިންތިޒާމްތައް ހަމަޖެހިފައި ނެތުމުންކަން ފާހަގަކުރައްވައި މިނިސްޓަރު ވިދާޅުވީ، މިހާތަނަށް ވެސް އެ މަޝްރޫއު ހުއްޓުމެއްނެތި ކުރިއަށްދަނީ ރައީސްގެ ހާއްސަ އިނާޔަތްތަކަކާއެކު ކަމަށެވެ.
އަދި ވިދާޅުވީ، އަމާޒަކީ މިއަހަރު ނިމުމުގެ ކުރިން ސިފްކޯ ފުލެޓްތައް ވެސް ނިންމާލެވޭނެ ގޮތްތަކެއް ހޯދުން ކަމަށެވެ.
"އެ މަސައްކަތް (ސިފްކޯ ހިޔާ މަޝްރޫއު) އެކި ގޮތްގޮތުން ފައިސާ ހޯދައިގެން ނިންމަވާނެކަން ސަރުކާރުން ޔަގީންކޮށްދޭ. މިހާރުގެ އަމާޒަކީ މިއަހަރު ނިމުމުގެ ކުރީން ފުލެޓްތަކުގެ މަސައްކަތް ނިންމާލުން. މިހާތަނަށް އެ މަޝްރޫއުއަށް ސަރުކާރުގެ ފަރާތުން 329 މިލިއަން ރުފިޔާ ލޯނުގެ އެހީގެ ގޮތުގައި ވަނީ ހަރަދުކުރެވިފައި،" މިނިސްޓަރު ވިދާޅުވިއެވެ.