އިނގިރޭސި ޕްރިމިއާ ލީގުގައި ރޭ ކުޅުނު މެޗުގައި ލިވަޕޫލުން ކްރިސްޓަލް ޕެލެސް ބަލިކުރި އިރު، ޓީމުގެ ތަރި މުހައްމަދު ސަލާހް އަނެއްކާވެސް ޕްރިމިއާ ލީގުގެ ރެކޯޑަކާ ހަމަކޮށްފިއެވެ.
ރަށުން ބޭރުގައި ރޭ ލިވަޕޫލް ކުޅުނު މެޗުން އެޓީމު މޮޅުވީ ފަހަތުންއަރައި 2-1ގެ ނަތީޖާއަކުންނެވެ. މެޗުގައި ލިވަޕޫލުން ޖެހި ދެވަނަ ގޯލް އެޓީމަށް ކާމިޔާބުކޮށްދިނީ ސަލާހެވެ.
މިހާތަނަށް ލީގުގައި ކުޅުނު 32 މެޗުގެ ތެރެއިން 21 މެޗެއްގައި ސަލާހް ގޯލް ޖަހައިފައިވާ އިރު، ރޭގެ މެޗުގައި ޖެހި ގޯލަކީ އޭނާ މިސީޒަންގައި ޖެހި 29 ވަނަ ލީގު ގޯލެވެ. ކުޅުނު 38 މެޗުގެ އިނގިރޭސި ލީގުގެ ސީޒަނެއްގައިި ކުޅުނު 21 މެޗުގައި ގޯލު ޖެހި ހަމައެކަނި ކުޅުންތެރިންނަކީ ސަލާހްގެ އިތުރުން ރޮބިން ވެން ޕާސީއާއި ކްރިސްޓިއާނޯ ރޮނާލްޑޯއެވެ. ލިވަޕޫލަށް އަދި ސީޒަންގައި ބާކީ ހަ މެޗު އޮތް އިރު، ސަލާހަށް އެ ރެކޯޑު މުގުރާލުމުގެ ފުރުސަތު ބޮޑެވެ.
ލިވަޕޫލާއި ކްރިސްޓަލް ޕެލެސް ވާދަކުރު މެޗުގެ ތެރެއިން: އެ މެޗު 2-1ގެ ނަތީޖާއަކުން ކާމިޔާބުކުރީ ލިވަޕޫލް --- ފޮޓޯ/ އޭޕީ
މެޗުގެ 13 ވަނަ މިނެޓުގައި ޕެލެސްއިން ވަނީ ލީޑު ނަގައިފައެވެ. ލިވަޕޫލްގެ ކީޕަރު ލޮރިސް ކެރިއަސް، ޕެލެސްގެ ފޯވަޑް ވިލްފްރެޑް ޒަހާއަށް ކުރި ފައުލަކާ ގުޅިގެން ޕެލެސްއަށް ލިބުނު ޕެނެލްޓީ ކާމިޔާބުކޮށް ލީޑު ނަގައިދިނީ ލޫކާ މިލިވޮޖެވިކެވެ.
ލީޑު ނެގުމަށްފަހު ފުރަތަމަ ހާފްގައި ޕެލެސްގެ ފަރާތުން ފެނިގެން ގޮސްފައިވަނީ ވަރުގަދަ ކުޅުމެކެވެ. މިސީޒަންގައި މޮޅު ކުޅުމެއް ދައްކަމުން އަންނަ ލިވަޕޫލްގެ ފޯވަޑްލައިން ހިފެހެއްޓުމަށް ޕެލެސްގެ ޑިފެންސުން ބުރަކޮށް މަސައްކަތް ކުރިކަން ފާހަގަކޮށްލެވިފައިވެއެވެ. އެހެން ނަމަވެސް ހާފް ނިމެން ދަނިކޮށް ލިވަޕޫލްގެ ފަރާތުން ދެ ހަމަލާއެއް ފެނިގެން ގޮސްފައިވެއެވެ. ސަލާހްގެ އިތުރުން ރޮބާޓޯ ފިރްމީނޯގެ ފަރާތުން ފެނިގެންދިޔަ ހަމަލާތަކުގެ ހުރަހަކަށްވީ ޕެލެސްގެ ކީޕަރު ވޭން ހެނަސީއެވެ.
ދެވަނަ ހާފަށް ނުކުމެ މެޗުގެ 49 ވަނަ މިނެޓުގައި ލިވަޕޫލުން ވަނީ ނަތީޖާ ހަމަހަމަ ކޮށްފައެވެ. ލިވަޕޫލްގެ ތަޖުރިބާކާރު މިޑްފީލްޑަރު ޖޭމްސް މިލްނާ ނަގައިދިން ހުރަސް ގޯލް ތެރެއަށް ފޮނުވާލީ ސަޑިއޯ މާނޭއެވެ. މާނޭގެ ގޯލަށްފަހު ލިވަޕޫލްގެ ފަރާތުން މޮޅު ކުޅުމެއް ފެނިގެންދިޔަކަން ފާހަގަކޮށްލެވުނެވެ. ހާއްސަކޮށް ކުރިއަށް ކުޅެމުންދިޔަ މާނޭއާއި ސަލާހް އަދި ފިރްމީނޯގެ ގުޅުން ފުރިހަމަކަން ފާހަގަކުރެވުނެވެ.
ލިވަޕޫލާއި ކްރިސްޓަލް ޕެލެސް ވާދަކުރު މެޗުގެ ތެރެއިން: އެ މެޗު 2-1ގެ ނަތީޖާއަކުން ކާމިޔާބުކުރީ ލިވަޕޫލް --- ފޮޓޯ/ އޭޕީ
ދެވަނަ ހާފްގައި މޮޅަށް ކުޅެމުންދިޔަ ލިވަޕޫލުން ލީޑު ނެގީ މެޗުގެ 84 ވަނަ މިނެޓުގައެވެ. ލިވަޕޫލްގެ ޒުވާން ޑިފެންޑަރު އެންޑީ ރޮބަޓްސަންގެ ހުރަސް، ކޮންޓްރޯލް ކޮށްލުމަށްފަހު ގޯލްގެ ތެރެއަށް ފޮނުވާލީ ސަލާހެވެ.
މެޗުން މޮޅުވެ އިނގިރޭސި ލީގު ތާވަލުގެ ތިންވަނައިގައި ލިވަޕޫލް އޮތީ ކުޅުނު 32 މެޗުން 66 ޕޮއިންޓާ އެކުގައެވެ. ދެވަނައިގައި އޮތް ޔުނައިޓެޑަށް ލިބިފައިވަނީ 32 މެޗުން 68 ޕޮއިންޓެވެ. އެއްވަނައިގައި މެންޗެސްޓާ ސިޓީ އޮތީ 16 ޕޮއިންޓްގެ ލީޑެއްގައެވެ.