ކުޑަކުދިންނަށް އަމާޒުކޮށްގެން ކޮޕީ އިސްމާއިލް ރަޝީދު (ކޮޕީ އިއްސެ) އަހުމަދު ޒިޔާ އަދި މުހައްމަދު ރިފްއަތު ޕްރޮޑިއުސްކޮށްފައިވާ ފިލްމު "ކަނޑު އިބިލީސް" ގެ ޕޯސްޓަރު ލޯންޗުކޮށްފިއެވެ.
ހދ. ކުޅުދުއްފުށީގައި 100 ޕަސެންޓު ޝޫޓްކޮށްފައިވާ މި ފިލްމުގެ ޕޯސްޓަރު ރިލީޒްކޮށްދިނީ ފިލްމުގެ ކޭޓަރިން ޕާޓްނާ ބްލޫބޭގައި މިރޭ ބޭއްވި ކުޑަ ހަފްލާއެއްގައި، ފިލްމީ ދާއިރާގައި 50 އަށް ވުރެ ގިނަ ފިލްމު ޑައިރެކްޓް ކޮށްފައިވާ އަމްޖަދު އިބްރާހިމް (އަމްޖޭ) އެވެ.
ޕޯސްޓަރު ރިލީޒްކުރުމުގެ ހަފްލާގައި އަމްޖޭ ވަނީ ކުޑަކުދިންގެ ފިލްމެއް އުފެއްދީތީ، ފިލްމުގެ ޕްރޮޑިއުސަރުންނަށް ޝުކުރު އަދާކޮށްފައެވެ. އަދި ކުޑަކުދިންގެ ފިލްމު އުފެއްދުމުގައި ދެމި ތިބުމަށް އަމްޖޭ ވަނީ އިލްތިމާސްކޮށްފައެވެ.
ކަނޑު އިބިލީސްގެ ޕޯސްޓަރު ޑިޒައިންކޮށްފައިވަނީ މަނިކް އާޓްސް އިންނެވެ. ފިލްމުގެެ ކޮންމެ ކެރެކްޓާ އަކަށް ޕޯސްޓަރެއް ހަދާނެކަމަށް މަނިކް އާޓްސް އިން ބުނެއެވެ.
މިރޭގެ ހަފްލާގައި ފިލްމުގެ އެއް ޕްރޮޑިއުސަރު ޒިޔާ ބުނީ ފިލްމު ރިލީޒްކުރާނެ ދުވަސް ވަރަށް އަވަހަށް އިއުލާނު ކުރާނެ ކަމަށެވެ. ފިލްމު އެންމެ ފުރަތަމަ ރިލީޒްކުރާނީ ކުޅުުދުއްފުށީގައެވެ. އެއަށްފަހު އަތޮޅު ތެރޭގެ އެހެން ރަށްރަށުގައި ފިލްމު އަޅުވާނެ ކަމަށާއި މާލެ އާއި ހުޅުމާލޭގައި ފިލްމު ދައްކާނީ ރާއްޖެތެރޭގައި ފިލްމު އެޅުވުމަށްފަހު ކަމަށް ޒިޔާ ބުންޏެވެ.
ކަނޑު އިބިލީސްގެ ޓްރެއިލާ މި ހަފްތާގެ ކުރީކޮޅު ވަނީ ރިލީޒްކޮށްފައެވެ. ފިލްމުގެ ޕްރޮމޯޝަނަލް ގިނަ ހަރަކާތްތަކެއް ކުރިއަށް ގެންދަން ނިންމާފައިވާއިރު ފިލްމުގެ ޕްރޮމޯޝަން އަށް ބިދަބިން ބޮޑުބެރު ގުރޫޕުން ހަދާފައިވާ ލަވައިގެ ވީޑިއޯ ވަރަށް އަވަހަށް ރިލީޒް ކުރާނެ އެވެ. ބިދަބިން އަކީ މި ފިލްމުގ ޕާފޯމިން ޕާޓްނަރެވެ.
ފިލްމުގެ ޕޯސްޓް ޕްރޮޑަކްޝަންގެ ހުރިހާ މަސައްކަތެއް މިހާރު ނިންމާލާފައިވާއިރު ޕްރޮމޯޝަނަލް ހަރަކާތްތަކެއް ކުރިއަށް ގެންދަންވެސް ވަނީ ނިންމައިފައެވެ. އެގޮތުން ކަނޑު އިބިލީސް ގެ ޕާފޯމމިން ޕާޓްނާ ބިދަބިންގެ ހަރަކާތްތަކާއެކު ރަސްފަންނު، އާޓިފިޝަލް ބީޗް އަދި ހުޅުމާލޭގައި ހަރަކާތްތަކެއް ކުރިއަށް ގެންދަން ވަނީ ނިންމައިފައެވެ.
ކަނޑު އިބިލީސްގެ މީޑިއާ ޕާޓްނަރަކީ ސަން މީޑިއާ ގްރުޕެވެ.