ކުޑަކުދިންނަށް ހާއްސަކޮށްގެން ކޮޕީ އިސްމާއިލް ރަޝީދު، އަހުމަދު ޒިޔާ އަދި މުހައްމަދު ރިފްއަތު ޕްރޮޑިއުސްކުރި ފިލްމު ކަނޑުއިބިލީސްގެ ޓްރެއިލާ ލޯންޗުކޮށްފިއެވެ.
މިރޭ ބްލޫބޭ ގައި ބޭއްވި ކުޑަ ހަފްލާއެއްގައި ޓްރެއިލާ ލޯންޗްކޮށްދިނީ މަޝްހޫރު ކޮމެޑިއަން ޔޫސުފް ރަފީއު (ޔޫސޭ) އެވެ. ބްލޫބޭ އަކީ ފިލްމުގެ ކޭޓަރިން ޕާޓްނަރެވެ.
މި ހަފްލާގައި ވާހަކަ ދައްކަމުން ޔޫސޭ ބުނީ ފިލްމީ ދާއިރާގައި ހޭދަކުރި ދިގު މުއްދަތުގައި ނުލިބޭ ޝަރަފެއް މިރޭ ލިބުނު ކަމަށެވެ. އެގޮތުން ފިލްމެއްގެ ޓްރެއިލާ ރިލީޒްކުރާނެ ފުރުސަތު އަދި ލިބުނީ އަލަށް ކަމަށް ޔޫސޭ ބުންޏެވެ.
ކަނޑު އިބިލީސް އަކީ ކުޅުދުއްފުށީގެ 100 އަށް ވުރެ ގިނަ ކުދިން ބައިވެރިކޮށްގެން އުފައްދާފައިވާ ފިލްމެކެވެ. ފިލްމުން އިއްސެ އާއި ޒިޔާވެސް ފެންނާނެއެވެ. ލީޑް ރޯލުތަކުން ފެންނާނީ ކުޅުދުއްފުށީގެ ދެ ކުދިންނެވެ.
މިރޭގެ ހަފްލާގައި ކަނޑު އިބިލީސް ޓީމުން ބުނީ ފިލްމުގެ ޕްރޮމޯޝަނަލް ލަވައިގެ ވީޑިއޯ ވަރަށް އަވަހަށް ރިލީޒްކުރާނެ ކަމަށެވެ. މިއީ ކުޑަކުދިންނާއި ބޮޑެތި މީހުންނަށްވެސް ބަލައިލެވޭނެ ތަފާތު ފިލްމެއް ކަމަށް އެ ޓީމުން ބުނެއެވެ.
ފިލްމުގެ ޕޯސްޓް ޕްރޮޑަކްޝަންގެ ހުރިހާ މަސައްކަތެއް މިހާރު ނިންމާލާފައިވާއިރު ޕްރޮމޯޝަނަލް ހަރަކާތްތަކެއް ކުރިއަށް ގެންދަންވެސް ވަނީ ނިންމައިފައެވެ. އެގޮތުން ކަނޑު އިބިލީސް ގެ ޕާފޯމމިން ޕާޓްނާ ބިދަބިންގެ ހަރަކާތްތަކާއެކު ރަސްފަންނު، އާޓިފިޝަލް ބީޗް އަދި ހުޅުމާލޭގައި ހަރަކާތްތަކެއް ކުރިއަށް ގެންދަން ވަނީ ނިންމައިފައެވެ.
ފިލްމުގެ ޕޯސްޓާ ބުރާސްފަތި ދުވަހު ރިލީޒްކުރާނެއެވެ. ފިލްމު އަޅުވާނެ ތާރީޚެއް ވަރަށް އަވަހަށް ހާމަ ކުރާނެ ކަމަށް ފިލްމު ޕްރޮޑަކްޝަން ޓީމުން ބުނެެއެވެ. ފިލްމު އެންމެ ފުރަތަމަ ޕްރެމިއާ ކުރާނީވެސް ކުޅުދުއްފުށީގައެވެ.
ކަނޑު އިބިލީސްގެ މީޑިއާ ޕާޓްނަރަކީ ސަން މީޑިއާ ގްރުޕެވެ.