ހަނަފަސްކަން އާންމުވެ، ފެން ލިބުން ދަތިވުމަކީ ދުނިޔޭގައި ހަމަނުޖެހުން އިތުރުވެ، ސުލްހަ ގާއިމުކުރުމަށް އެޅޭ ހުރަހަކަށް ވާނެކަމަށް ފޮރިން މިނިސްޓަރު ޑރ. މުހައްމަދު އާސިމް ވިދާޅުވެއްޖެއެވެ.
އެމެރިކާގެ ނިއު ޔޯކްގައި ކުރިއަށް ދިޔަ "އިންޓަނޭޝަނަލް ޑެކޭޑް ފޯރ އެކްޝަން: ވޯޓަރ ފޯރ ސަސްޓެއިނަބަލް ޑިވެލޮޕްމެންޓް" އިފްތިތާހުކުރުމުގެ ހަފްލާގައި، އެލަޔަންސް އޮފް ސްމޯލް އައިލެންޑް ސްޓޭޓްސް (އެއޯސިސް)ގެ ފަރާތުން ތަގުރީރުކުރައްވަމުން، ރާއްޖޭގެ ފޮރިން މިނިސްޓަރު ޑރ. އާސިމް ވިދާޅުވީ ފެނަކީ ދުނިޔޭގެ ދިރުންތަކުގެ އަސްލު ކަމަށާއި، ދުނިޔޭގެ މޫސުން ރެގިއުލޭޓުކުރުމުގައި ވެސް ފެނަކީ މުހިންމު ދައުރެއް އަދާކުރާ އެއްޗެއް ކަމަށެވެ.
"އިންޓަނޭޝަނަލް ޑެކޭޑް ފޯރ އެކްޝަން: ވޯޓަރ ފޯރ ސަސްޓެއިނަބަލް ޑިވެލޮޕްމެންޓް 2018-2020" އަކީ ދެމެހެއްޓެނިވި ތަރައްގީގެ ލަނޑުދަނޑިތަކުގެ ތެރޭގައި ހިމެނޭ، ފެނާ ގުޅޭ ކަންކަން ހާސިލުކުރުމަށް އިތުރަށް އެއްބާރުލުންދިނުމާ ގުޅޭ ހަރަކާތެކެވެ.
ޑރ. އާސިމް ވިދާޅުވި ގޮތުގައި ހަނަފަސްކަމާއި، ފެން ނުލިބުމަކީ ހަމަނުޖެހުމަށް މަގުފަހިވެ، ދުނިޔޭގައި ސުލްހަ ގާއިމުކުރުމަށް އެޅޭނެ ހުރަހެކެވެ. އަދި ކުރިއަށް އަންނަން ހުރި އަހަރުތަކުގެ ތެރޭގައި މިކަންކަން ދުނިޔެއަށް ފެނިގެން ދާނެކަމަށް މިނިސްޓަރު އާސިމް ވިދާޅުވިއެވެ.
އަދި ފެނާއި ގުޅުންހުރި ގުދުރަތީ ކާރިސާތައްވެސް އިތުރުވާނެ ކަމަށް ބެލެވޭ ކަމަށާއި، އެކަމުގެ އަސަރު އެންމެ ބޮޑަށް ކުރާނީ އެންމެ ކުޑަކޮށް ތަރައްގީވެފައިވާ ގައުމުތަކާއި، ތަރައްގީވަމުން އަންނަ ކުދި ޖަޒީރާ ގައުމުތަކަށް ކަމަށްވެސް ފޮރިން މިނިސްޓަރު ވިދާޅުވިއެވެ.
މިނިސްޓަރު އާސިމް ވިދާޅުވީ ކުދި ތަރައްގީވަމުން އަންނަ ކުދި ގައުމުތަކުގައި ސާފު ފެން ލިބުމަށް ހުރަސްތަކެއް އެބަ ހުރި ކަމަށެވެ. އަދި މޫސުމަށް އަންނަ ބަދަލުތަކާ ގުޅިގެން ކުރިމަތިވާ ގޮންޖެހުންތަކެއްވެސް ހިމެނޭކަމަށް ޑރ. އާސިމް ވިދާޅުވިއެވެ.
މިނިސްޓަރު ވިދާޅުވީ އެ ހަރަކާތުގެ ސަބަބުން އދގެ ނިޒާމުގެ ތެރެއިން މެމްބަރު ގައުމުތަކާއި އެހެން ގައުމުތަކުން އެކުގައި މަސައްކަތްކޮށް، ސާފު ބޯފެން ހޯދުމަށް ކުރިމަތިވެފައިވާ ހުރަސްތައް ނައްތާލުމުގެ ލަނޑުދަނޑި ހާސިލުކުރާނެކަމަށް އުންމީދުކުރައްވާ ކަމަށެވެ.