ޑާކްރެއިން އެންޓަޓެއިންމަންޓް އިން މި އަހަރު ގެނެސްދިން ފުރަތަމަ ފިލްމު ވަކިން ލޯބިންގެ މި މަހު އޮންނަ ފަހު ދެ ޝޯގެ ޓިކެޓް ވިއްކަން ފަށައިފި އެވެ.
ފިލްމުގެ ޕްރޮޑިއުސަރު މުހައްމަދު އަލީ (މޮގާ) މިއަދު ބުނީ މި މަހުގެ 22 އަދި 23 ވަނަ ދުވަހުގެ ރޭ އޮންނަ ދެ ޝޯގެ ޓިކެޓް މިހާރު އޮލިމްޕަހުން ލިބެން ހުންނާނެ ކަމަށެވެ.
ޓިކެޓްގެ އަގު 100 ރުފިޔާ އަށް ވިއްކަމުންދާއިރު ފިލްމު އަޅުވާނީ ރޭގަނޑު 9:00ގައި ކަމަށް ވެސް އޭނާ ބުންޏެވެ.
އައިޝަތު ފުއާދު ތައުފީގުގެ ސްކްރީން ޕްލޭ އަކަށް ތައްޔާރު ކުރި ވަކިން ލޯބިންގެ ޑައިރެކްޓަރަކީ އެންމެ ފަހުން ބޭއްވި އަށް ވަނަ ދިވެހި ފިލްމު އެވޯޑްސްގައި އެންމެ މޮޅު ޑައިރެކްޓަރަކަށް ހޮވުނު އަލީ ޝިފާޢު (ޗިއްޕެ) އެވެ.
ވަކިން ލޯބިންގެ ދެވަނަ ބައިގެ ލީޑް ތަރިންގެ ގޮތުގައި ފެނިގެންދާނީ ޖުމައްޔިލް ނިމާލް، މަރިޔަމް މަޖުދާ އަދި ނުޒުހަތު ޝުއައިބު އެވެ.
ފިލްމު މި މަހު ފަސް ވަނަ ދުވަހު ޕްރީމިއާ ވަނީކޮށްފަ އެވެ. ޑާކްރެއިން އެންޓަޓެއިންމަންޓް އިން ބުނީ ވަކިން ލޯބިންގެ ސީކުއަލް އެއް 2020 ވަނަ އަހަރު ފެނިގެން ދާނެ ކަމަށެވެ.
މިއީ ރާއްޖެ ފަދަ ވަރި ގިނަ މުޖުތަމައަކަށް މުހިއްމު މެސެޖެއް ދޫކޮށްލި ފިލްމެކެވެ. މުޖުތަމައު އާ ގުޅޭ ރަހަތަކެއް އެކުލެވިގެން އުފައްދާފައިވާ އިބްރަތެއް ހާސިލްވެގެންދިޔަ ފިލްމެކެވެ.