އާއިލީ މައްސަލަތަކާއި ގެވެށި އަނިޔާގެ މައްސަލަތަކުގައި ހިލޭ ގާނޫނީ ލަފާ ފޯރުކޮށްދޭ "ފެމިލީ ލީގަލް ކްލިނިކް"ގެ ޚިދުމަތް އަންނަ ހަތްފާގައި އައްޑޫ ސިޓީގައި ފެށުމަށް ތައްޔާރުވެއްޖެ އެވެ.
ފެމިލީ ލީގަލް ކްލިނިކުން ބުނީ އެ ޖަމިއްޔާގެ ފަރާތުން ހިލޭ ސާބަހަށް ފޯރުކޮށްދޭ ގާނޫނީ ލަފާދިނުމުގެ ޚިދުމަތްތައް އައްޑޫ ސިޓީގައި ފަށާނީ މާޗު މަހުގެ 19 ވާ ހޯމަ ދުވަހުގެ ރޭ ކަމަށެވެ.
ފެމިލީ ލީގަލް ކްލިނިކުން ބުނާ ގޮތުގައި އައްޑޫގައި އެޖަމިއްޔާގެ ޚިދުމަތް ލިބޭނީ ކޮންމެ ހޯމަ ދުވަހެއްގެ ރޭ ބާއްވާ ލީގަލް ކޮންސަލްޓޭޝަން ބައްދަލުވުންތައް މެދުވެރިކޮށް ކަމަށެވެ.
"އައްޑޫގައި ދިރިއުޅޭ ރައްޔިތުން ގާނޫނީ ވަކީލެއްގެ އެހީތެރިކަން ހޯދުމަށް އެދި ގުޅާނީ ރަސްމީ ބަންދު ނޫން ކޮންމެ ދުވަހެއްގެ ހެނދުނު 9:00 އިން 15:00 އަށް އަޅުގަނޑުމެންގެ އައްޑޫ ހޮޓްލައިން 9989881 އަށެވެ،" ފެމިލީ ލީގަލް ކްލިނިކުން ބުންޏެވެ.
އައްޑޫ ސިޓީގައި މި ޚިދުމަތް ފަށަނީ، ކޮލޮމްބޯގައި ހުންނަ އެމެރިކާ އެމްބަސީގެ ހިލޭ އެހީއާ އެކު ހިންގާ ޕްރޮޖެކްޓެއްގެ ދަށުންކަމަށް ފެމިލީ ލީގަލް ކްލިނިކުން ބުންޏެވެ.
އަދި އައްޑޫގައި ގާނޫނީ ދާއިރާއިން މަތީ ތައުލީމު ހާސިލުކުރަމުންދާ ދަރިވަރުންނާއި އައްޑޫ ސިޓީ މަރަދޫގައި ހިންގާ ލޯ ފާމް "ލޯކްރާފްޓް"ގެ ވަކީލުންނާއި މުވައްޒަފުން ހިމެނޭ ގޮތަށް ޖުމްލަ 17 ފަރާތެއް ތަމްރީނުކޮށްފައިވާ ކަމަށް ވެސް އެޖަމިއްޔާއިން ބުނެ އެވެ.
އެޖަމިއްޔާ އިން ބުނީ ފެމިލީ ލީގަލް ކްލިނިކުގެ ޚިދުމަތް އައްޑޫގައި ތައާރަފުކުރުމުގެ އިތުރުން، އެ ސިޓީގެ ކޮންމެ އަވަށަކަށް އަމާޒުކޮށްގެން، އާއިލާއާ ބެހޭ ގާނޫނާއި ގެވެށި އަނިޔާ ހުއްޓުވުމުގެ ގާނޫނުގެ ދަށުން ލިބޭ ހައްގުތަކާއި ކަމާ ބެހޭ ކޯޓު ފޯމުތައް ފުރާނެ ގޮތާބެހޭ މައުލޫމާތު ދީ، އާންމުން ހޭލުންތެރިކުރުމުގެ ޕްރޮގްރާމުތަކެއް ހިންގާނެ ކަމަށެވެ.
ރާއްޖޭގައި އުޅޭ ގާނޫނީ ވަކީލުންގެ 99 ޕަސަންޓު ވަކީލުން މަސައްކަތް ކުރަނީ މާލޭގަ އެވެ.