ނޭޝަނަލް އިންޓެގްރިޓީ ކޮމިޝަން(އެންއައިސީ)ގެ މެންބަރު ކަމަށް އައްޔަން ކުރުމަށް ރައިސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވާފައިވާ އިލެކްޝަންސް ކޮމިޝަންގެ ކުރީގެ ރައީސް އަހްމަދު ސުލައިމާން އަދި ރާއްޖެ އިން ޖަޕާނަށް ކަނޑައަޅާ ސަފީރުގެ ގޮތުގައި އިބްރާހިމް އުވައިޝް އަށް ރުހުން ދިނުމަށް މަޖިލީހުން ފާސްކޮށްފި އެވެ.
ސުލައިމާނަށް ރުހުން ދިނުމާ ގުޅޭ ގޮތުން މަޖިލީހުގެ މިނިވަން މުއައްސަސާތަކުގެ ކޮމެޓީގައި ވަނީ އެ މައްސަަލަ ދިރާސާކޮށް އޭނާއަށް ރުހުން ދިނުމަށް މިދިޔަ ހޯމަ ދުވަހު ފާސްކޮށްފަ އެވެ. މިއަދުގެ މަޖިލީހުގައި ސުލައިމާނަށް ރުހުން ދިނުމަށް 31 މެންބަރުން ވަނީ ވޯޓް ދީފަ އެވެ. މިއަދުގެ ޖަލްސާގައި ވެސް އިދިކޮޅު އެއްވެސް މެންބަރެއް ބައިވެރިވެފައެއް ނުވެ އެވެ.
އެންއައިސީ އަށް އައްޔަން ކުރުމަށް ގާބިލު ބޭފުޅެއް ކަމަށް ކަނޑައަޅަނީ ކޮމިޓީން ކަނޑައަޅާފައިވާ މިންގަނޑުން މާކްސް ދިނުމުން އެވްރެޖް 75 ޕަސެންޓް އަށް ވުރެ މަތިން މާކްސް ލިބޭ ބޭފުޅުންނެވެ. ސުލައިމާނަކީ އެންއައިސީ އަށް އައްޔަން ކުރުމަށް ގާބިލް ބޭފުޅެއްތޯ ބެލުމަށް ނެގި ވޯޓުގައި ކޮމިޓީގެ މެމްބަރުން ދީފައި ވަނީ 75.89 ޕަސެންޓް މާކުހެވެ.
ސުލައިމާނަށް އެ ވަރަށް މާކްސް ލިބިވަޑައިގަތީ އޭނާގެ ތައުލީމާއި ތަމްރީނާއި މަސައްކަތުގެ ތަޖުރިބާ އާއި ގާބިލުކަމާއި ހުނަރަށް ބެލުމަށް ފަހު ކޮމެޓީގެ މެމްބަރުން މާކްސް ދެއްވުމުންނެވެ.
ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ނިންމި މައްސަލާގައި އެ ކޮމިޝަނަށް ބޮޑެތި ފާޑުކިޔުންތަކެއް އަމާޒުވެފައި ވަނިކޮށް ސުލައިމާން އިސްތިއުފާ ދެއްވީ މިދިޔަ މަހުގެ 31 ވަނަ ދުވަހު އެވެ.
ނޭޝަނަލް އިންޓަގްރީ ކޮމިޝަނަކީ ފުލުހުންނާއި އިމިގްރޭޝަން އޮފިސަރުންނާއި ކަރެކްޝަނަލް ސާވިސް އަދި ކަސްޓަމްސް އޮފިސަރުން ކުރާ ޖިނާއީ ކުށްތައް ތަހުގީގު ކުރުމުގެ ބާރު ލިބިގެންވާ ކޮމިޝަނެކެވެ.
ނޭޝަނަލް އިންޓަގްރިޓީ ކޮމިޝަނުގެ މަސްއޫލިއްޔަތުތަކުގެ ތެރޭގައި ގާނޫނު ތަންފީޒު ކުރާ އިދާރާތަކާއި އެ އިދާރާތަކުގެ މުވައްޒަފުން ކުރާ ގާނޫނާ ހިލާފު އަމަލުތައް ބަލައި ތަހުގީގު ކުރުން ހިމެނެ އެވެ. އަދި އެފަދަ އަމަލެއް ކަމަށް ތުހުމަތު ކުރެވޭ އަމަލެއް އެއްވެސް ފަރާތަކުން ހިންގައިފި ކަމަށް ނުވަތަ ހިންގަން އުޅޭ ކަމަށް ތުހުމަތުކޮށް، އެފަދަ މައްސަލައެއް ހުށަހަޅައިފި ނަމަ އެކަމެއް ވެސް ބަލައި ތަހުގީގު ކުރަން އެ ކޮމިޝަނަށް ލާޒިމުވާނެ އެވެ.
ޖަޕާނަށް ކަނޑައަޅާ ސަފީރުގެ ގޮތުގައި އުވެއިޝް އަށް ރުހުން ދިނުމަށް ވަނީ ސަރުކާރު ކޯލިޝަންގެ 32 މެންބަރުން ވޯޯޓް ދެއްވައިފަ އެވެ.