މިދިޔަ އަހަރު ނެރުނު ކޮމެޑީ ފިލްމް "ނޯޓީ 40"ގެ ފޮލޯއަޕް "40 ޕްލަަސް" އަންނަ އޯގަސްޓް މަހުގެ އެއް ވަނަ ދުވަހަށް ތާވަލް ކޮށްފައިވާ ކަމަށް ފިލްމުގެ ޑައިރެކްޓަރު ޔޫސުފް ޝަފީއު (ޔޫއްޕެ) ބުނެފިއެވެ.
ޔޫއްޕެ ސަންއަށް ބުނީ މިހާރު ކުރަމުން އަންނަ މަސައްކަތަކީ ޕޯސްޓް ޕްރޮޑަކްޝަންގެ މަސައްކަތް ކަމަށާއި ފިލްމު އޯގަސްޓް މަހުގެ އެއް ވަނަ ދުވަހަށް ރިލީޒްކުރުމަށް މަސައްކަތް ކުރަމުންދާ ކަމަށެވެ.
ރާއްޖޭގެ ސިޔާސީ މަސްރަހުގެ ކަންކަން ހުރި ގޮތަށް ބަލާފައި ފިިލްމު ފަސްކޮށްލަން ޖެހުމަކީ އެކަށީގެންވާ ކަމެއްކަމަށް ވެސް ޔޫއްޕެ ބުންޏެވެ.
"ދެވަންސޫރަ ވެސް މި އެޅުވުނީ ސިޔާސީ މަސްރަހު ހަލަބޮލި ދުވަސްވަރެއްގައި. އޭގެ އަސަރު ފިލްމުގެ ވިޔަފާރިއަށް ވަނީ ކޮށްފައި. އެހެންވެ ފޯޓީ ޕްލަސް ރިލީޒްކުރާނީ ރާއްޖޭގެ ސިޔާސީ މަސްރަހަށް ބަލާލާފައި،" ޔޫއްޕެ ބުންޏެވެ.
ތ. ބުރުނީގައި ޝޫޓް ކުރި އެ ފިލްމަކީ ޔޫއްޕެގެ އަމިއްލަ ސްކްރީން ޕްލޭއަކަށް ތައްޔާރުކުރާ ފިލްމެކެވެ. މެއިން ކާސްޓުންގެ ގޮތުގައި ފެނިގެން ދާނީ، ނޯޓީ40ގެ ވެސް ލީޑުން ފެނިގެން ދިޔަ، ޔޫއްޕެ، އަހްމަދު ސައީދު، މުހައްމަދު މަނިކު އަދި އަލީ ސީޒަން އެވެ.
އެ ފިލްމުގައި އަލަށް ތައާރަފްވާ ހަތަރު ތަރިން ވެސް ފެންނާނެ އެވެ. އެ ތަރިންގެ މަސައްކަތާމެދު ވަރަށް ހިތްހަމަ ޖެހޭކަމަށް ޔޫއްޕެ ބުންޏެވެ.
ކުޅަދާނަ ބަޠަލާ ފާތިމަތު އާޒިފާ (އަޒޫ)، ޝީލާ ނަޖީބު، އަލީ އާޒިމް (ދޮންއައްޔަ)، މުޙައްމަދު ފައިސަލް އަދި ޔޫއްޕެގެ "ދެވަންސޫރަ"އިން ފިލްމީ ދާއިރާއަށް މުޅިން އަލަށް ތައާރަފްވާ މަރިޔަމް ޝިފާ ވެސް ފޯޓީ ޕްލަސް ގައި ހަރަކާތްތެރިވާނެ އެވެ.
ބޮޑު ކްރޫ އަކާއެކު މަސައްކަތް ކުރި މި ފިލްމަކީ "މިއަހަރު އޮލިމްޕަސް ސިނަމާއަށް ވެސް އަންނާނެ އެންމެ ބުރަ މަސައްކަތް ކޮށްފައިވާ ދިވެހި ފިލްމަށް ވާނެ" ކަމަށް ފިލްމުގެ ޕްރޮޑިއުސަރު އިސްމާއިލް ޝަފީގު ސަން އަށް ކުރިން ދިން އިންޓަވިއުއެއްގައި ބުންޏެވެ.