ބޮލީވުޑްގެ ބަތަލާ ޖިއާ ޚާންގެ މަރާ ގުޅިގެން ޖިއާގެ ލޯބިވެރިޔާ އަދި ބޮލީވުޑްގެ ތަރި ސޫރަޖް ޕަންޗޯލީގެ މައްޗަށް ކުރާ ދައުވާގެ ޝަރީއަތް އިއްޔެ ފަށައިފިއެވެ.
ސޫރަޖްގެ މައްޗަށް ދައުވާކޮށްފައިވަނީ އިންޑިއާގެ ޕީނަލް ކޯޑުގެ 306 ވަނަ މާއްދާގެ ދަށުންނެވެ. އެއީ އަމިއްލައަށް މަރުވާން ހިތްވަރު ލިބުނީ ސޫރަޖްގެ ސަބަބުންކަމަށް ބުނެއެވެ.
ޖިއާގެ މަރުގެ ޒިންމާ ނަގަންޖެހޭނެ މީހަކީ ސޫރަޖް ކަމަށް ޖިއާގެ މަންމަ ވަނީ ބުނެފައެވެ. ޖިއާގެ މަރުގެ މައްސަލަ ކޯޓަށް ހުށަހެޅީ މަންމައެވެ. ކޯޓަށް ހުށަހެޅި މައްސަލަ ހުށަހެޅި އިރު ބުނެފައިވަނީ ޖިއާ މަރުވީ އަމިއްލައަށް ނޫން ކަމަށާއި ޖިއާ ލޯބީގެ ގޮތުން ގުޅިގެން އުޅުނު ސޫރަޖް ޕަންޗޯލީ އޭނާ މަރާލީ ކަމަށެވެ. މީގެ ކުރިން ސޫރަޖް އާ ދެކޮޅަށް ހުށަހެޅި މައްސަލަ ކުރިއަށް ނުގެންދެވިފައިވަނީ އޭނާ އާ ދެކޮޅަށް ހެކި ހުށަހެޅިފައި ނުވާތީއެވެ.
މި މައްސަލައިގެ އަޑުއެހުމެއް މިމަހުގެ 21 އަށް ވަނީ ތާވަލުކޮށްފައެވެ. ސޫރަޖްގެ ދިފާއީ ހެކިން ހުށަހެޅުން އެ އަޑުއެހުމުގައި އޮންނާނެއެވެ.
ޖިއާ މަރުވެފައި އޮއްވާ ފެނުނީ 2013 ވަނަ އަހަރުގެ ޖޫންމަހުގެ ތިންވަނަ ދުވަހުއެވެ. ޖިއާގެ ކޮޓަރިން ފެނުނު ނޯޓެއްގައި ބުނެފައިވަނީ އޭނާ މަރުވީ ސޫރަޖް އާ ހެދިކަމަށެވެ.
ޖިއާ މަރުވީ ސޫރަޖުގެ ދަރިއަކަށް ބަލިވެ އިނުމުން އެ ދަރިފުޅު އެބޯޓް ކުރުމަށް ސޫރަޖު އެންގުމުން ކަމަށާއި ސޫރަޖްގެ ފަރާތުން ޖިއާއަށް އަނިޔާ ލިބިފައިވާ ކަމަށްވެސް ޖިއާގެ މަންމަ ވަނީ މީގެ ކުރިން ބުނެފައެވެ.