ދިހަ އަހަރުވީ އަންހެނުންގެ މެރަތަން ރެކޯޑު މަރިޔަމް އަބްދުލް ކަރީމް (މަރީ) މުގުރާލި އިރު، ޝިފާޒް މުހައްމަދު ދަހަމަހައްޓަމުންދިޔަ ފިރިހެނުންގެ މެރަތަން ރެކޯޑު އޭނާ އާކޮށްފިއެވެ.
މަރީއާއި ޝިފާޒް، މެރަތަން ރެކޯޑު ގާއިމްކޮށްފައިވަނީ މިއަދު ކުރިއަށްދިޔަ ދުބާއީ މެރަތަންގައި ދުވެގެންނެވެ.
މަޝްހޫރު ފިޒިކަލް އިންސްޓްރަކްޓަރު މަރީ، އަންހެނުންގެ މެރަތަން ރެކޯޑު މުގުރާލާފައިވަނީ ތިން ގަޑިއިރާއި 34 މިނެޓާއި އެއް ސިކުންތުން ރޭސް ފުރިހަމަކޮށްގެންނެވެ. އެއީ ކުރީގެ ރެކޯޑަށްވުރެ 14 މިނެޓް އަވަސް ވަގުތެކެވެ. މިއަދު މުގުރާލި މެރަތަން ރެކޯޑުގެ އިތުރުން މަރީއަކީ އަންހެނުންގެ ފަސް ކިލޯމީޓަރާއި، ދިހަ ކިލޯމީޓަރާއި، 20 ކިލޯމީޓަރު އަދި ހާފް މެރަތަންގެ ރެކޯޑު ވެސް އޮންނަ ދުވުންތެރިޔާއެވެ.
ކުރިން އަންހެނުންގެ މެރަތަން ރެކޯޑު އޮންނަނީ ޒުލޭހާ އަލީ އަތުގައެވެ. އޭނާ އެ ރެކޯޑު ގާއިމްކޮށްފައިވަނީ 2007 ވަނަ އަހަރުގެ ޑިސެމްބަރު މަހުއެވެ. ޒުލޭހާ އެ ރޭސް ފުރިހަމަކޮށްފައިވަނީ ތިން ގަޑިއިރާއި 48 މިނެޓާއި 11 ސިކުންތުންނެވެ.
ޝިފާޒް، އޭނާގެ އަމިއްލަ މެރަތަން ރެކޯޑު އާކޮށްފައިވަނީ ދެ ގަޑިއިރާއި 39 މިނެޓާއި 40 ސިކުންތުން ރޭސް ފުރިހަމަކޮށްގެންނެވެ. ކުރިން އޭނާ ރެކޯޑު ހަދާފައިވަނީ މިދިޔަ އަހަރުގެ ސެޕްޓެމްބަރު މަހު ނޭޕާލްގައި ކުރިއަށްދިޔަ 11 ވަނަ ކަތަމަންޑޫ މެރަތަންގައި ދުވެގެންނެވެ.
ޝިފާޒަކީ ގައުމީ ހާފް މެރަތަން ރެކޯޑުވެސް އޮންނަ ދުވުންތެރިޔާއެވެ. އޭނާ ވަނީ މިދިޔަ އަހަރުގެ ތެރޭގައި ދެ ފަހަރަށް ގައުމީ ހާފް މެރަތަން ރެކޯޑު އާކޮށްފައެވެ. 2006 ވަނަ އަހަރު އަހްމަދު ޝަރަފް ގާއިމްކުރި ހާފް މެރަތަން ރެކޯޑު ޝިފާޒް، މިދިޔަ އަހަރުގެ މެއި މަހުގެ ތެރޭގައި މުގުރާލި އިރު، އެ ރެކޯޑަށް މަހެއް ނުވަނީސް އޭނާގެ އަމިއްލަ ރެކޯޑު އާކުރިއެވެ.