ހޮންގްކޮންގާ ރާއްޖެ އާ ދެމެދު ކުރިއަށް ގެންދިޔަ މިނިވަން ވިޔަފާރީގެ މަޝްވަރާތައް ކާމިޔާބުކަމާއެކު ނިންމާލައިފިއެވެ.
އިކޮނޮމިކް މިނިސްޓަރު މުހައްމަދު ސައީދު މިއަދު ކުރެއްވި ޓްވީޓެއްގައި ވަނީ އެ މަޝްވަރާތައް ކާމިޔާބު ކަމަށާއި، ވަރަށް އަވަހަށް މިނިވަން ވިޔަފާރިގެ އެއްބަސްވުމުގައި ސޮއިކުރެވޭނެ ކަމުގެ އިޝާރާތެއް ދެއްވައިފައެވެ.
"ހޮންގް ކޮންގާއެކު ފެށޭ މިނިވަން ވިޔަފާރީގެ އެއްބަސްވުމުގެ ސަބަބުން ރާއްޖޭގެ އިގްތިސާދަށް، ޚާއްސަކޮށް މާލޯ ބާޒާރަށާއި ފަތުރުވެރިކަމުގެ ސިނާއަތަށް ބޮޑެތި ކުރިއެރުންތައް އަންނާނެ" ކަމަށް މިނިސްޓަރު ވިދާޅުވިއެވެ.
މިނިވަން ވިޔަފާރީގެ އެއްބަސްވުމުގެ ފަހު މަޝްވަރާތަކަށް ރާއްޖޭގެ އިކޮނޮމިކް ޑިވެލޮޕްމެންޓް މިނިސްޓަރު މުހައްމަދު ސައީދު ހޮންކޮންގަށް ވަޑައިގަތީ މިމަހުގެ 23 ވަނަ ދުވަހުއެވެ.
ހޮންގްކޮންގާ ރާއްޖެއާ ދެމެދު މިނިވަން ވިޔަފާރީގެ އެއްބަސްވުމެއް އެކުލަވާލުމަށް ނިންމީ، އެގައުމުން އިސްވެ އެކަމަށް ޝައުގުވެރިކަން ފާޅުކުރުމުންނެވެ.
ދެހާސް ސޯޅަވަނަ އަހަރުގެ ކުރީކޮޅު ހޮންގްކޮންގުން ޝައުގުވެރިކަން ފާޅުކުރަން ބުނީ، ރާއްޖެއަކީ ތަރައްގީ ވާނެކަމުގެ ބޮޑު އުންމީދެއް އޮތް މާކެޓެއް ކަމަށާއި، ފްރީ ޓްރޭޑް އެގްރިމެންޓަކާ އެކު ހޮންގްކޮންގްއާ ރާއްޖެއަށްވެސް ފައިދާތަކެއް ކުރާނެ ކަމަށެވެ.
ހޮންގްކޮންގާ ރާއްޖެއާ ދެމެދު އަހަރަކު ގާތްގަނޑަކަށް 300 މިލިޔަން ޑޮލަރުގެ ވިޔަފާރި ކުރެވެއެވެ.
މިނިވަން ވިޔަފާރީގެ އެއްބަސްވުމުގެ ދަށުން ދެގައުމުގެ ދެމެދުގައި ޓެރިފް ދަށްކުރުން ނުވަތަ ކަނޑާލުމާއި، މާކެޓަށް ވަނުމާއި އޮޕަރޭޓް ކުރުމަށް ފަސޭހަކުރުމުގެ އިތުރުން އިންވެސްޓް ކުރުމަށް ފަސޭހަކުރުމާއި ކަސްޓަމްސް ޕްރޮސީޖާގެ ހުރަސްތައް ނައްތާލުން ފަދަ ކަންކަމަށް މަގުފަހިވެގެން ދާނެ ކަމަށް ހޮންގްކޮންގުން މީގެ ކުރިން ވަނީ ބުނެފައެވެ.
ހޮންގްކޮންގާ ރާއްޖެއާ ދެމެދު ފްރީ ޓްރޭޑް އެގްރިމެންޓް އެކުލަވާލުމުގެ ފަހު މަޝްވަރާތައް ކާމިޔާބުކަމާއެކު ނިންމާލާފައި ވާއިރު މިދިޔަ އަހަރުގެ ޑިސެމްބަރު މަހު ރާއްޖެއިން ވަނީ ޗައިނާއާ އެކު މިނިވަން ވިޔަފާރީގެ އެއްބަސްވުމެއްގައި ސޮއިކޮށްފައެވެ.