ހޮންކޮންގުން ރާއްޖެއާ އެކު ފްރީ ޓްރޭޑް އެގްރީމެންޓެއް ހެދުމުގެ ޝައުގުވެރިކަން ފާޅުކޮށްފި

ހޮންގްކޮންގާއި ރާއްޖެއާ ދެމެދު ފްރީ ޓްރޭޑް އެގްރީމެންޓެއް ހެދުމުގެ މަސައްކަތް ދާދި އަވަހަށް ފަށާނެ ކަމަށް އެގައުމުގެ ސަރުކާރުން ހާމަކޮށްފި އެވެ.

ހޮންގްކޮންގްގެ ސަރުކާރުގެ ތަރުޖަމާނަކު މިއަދު ބުނީ، ރާއްޖޭގެ އިތުރުން، ހުޅަނގު އޭޝިއާގައި، ޔޫރަޕު ކައިރީގައި އޮންނަ ޖޯޖިއާއާ އެކު ވެސް ފްރީ ޓްރޭޑް އެގްރީމެންޓް ހަދަން ބޭނުންވާ ކަމަށެވެ.

"މި ދެ ގައުމަކީ ވެސް، ތަރައްގީ ވާނެ ކަމުގެ ބޮޑު އުންމީދެއް އޮތް ދެ މާކެޓު. ދެގައުމުގެ އިގްތިސާދާ އެކު ވެސް ފްރީ ޓްރޭޑް އެގްރީމެންޓެއް ހަދައިފި ނަމަ ހޮންގްކޮންގަށް ވަރަށް ފައިދާ ކުރާނެ. އަދި ހޮންގްކޮންގްގެ ފްރީޓްރޭޑް ނެޓްވޯކް އެސަރަހައްދުތަކުގެ އެހެން ގައުމުތަކަށް ފުޅާކުރުމަށް އެހީތެރިވެދޭނެ،" ހޮންގްކޮންގް ސަރުކާރުގެ ތަރުޖަމާނަކު މިއަދު ވިދާޅުވި އެވެ.

ހޮންގްކޮންގް ސަރުކާރުން މިއަދު ވަނީ، ރާއްޖެއާއި ޖޯޖިއާއާ އެކު ފްރީޓްރޭޑް އެގްރީމެންޓް ހެދުމުގެ ރަސްމީ ޑޮކިއުމެންޓް ވެސް އާންމުކޮށްފަ އެވެ.

ޑޮކިއުމެންޓުގައި ބުނެފައިވާ މައިގަނޑު ކަންކަން

• ޓެރިފް ދަށް ކުރުން ނުވަތަ ކަނޑާލުން:
  • މިހާރު ހޮންގްކޮންގްއިން ރާއްޖެއަށް އެތެރެކުރާ މުދަލަށް 20.8 ޕަސަންޓުގެ ޓެރިފް ދައްކަންޖެހޭ. ހޮންގްކޮންގްއިން ބުނީ އެގްރީމެންޓު ހެދިއްޖެ ނަމަ ރާއްޖޭގެ ޕްރޮޑަކްޓުތަކަށް ހޮންގްކޮންގްއިން ކަނޑައަޅާފައިވާ ޓެރިފް ކަނޑާލާނެ ކަމަށް. އަދި ރާއްޖެއިން އެގައުމުގެ ޕްރޮޑަކްޓްތަކަށް ކަނޑައަޅާފައިވާ ޓެރިފް ކުޑަކުރުމަށް ނުވަތަ އުވާލުމަށް މަޝްވަރާ ކުރާނެ ކަމަށް.
• މާކެޓަށް ވަނުމާއި އޮޕަރޭޓް ކުރުމުގެ ފަސޭހަކަން:
  • ހޮންގްކޮންގްގެ ޚިދުމަތްތަކާއި، ޚިދުމަތް ފޯރުކޮށްދޭ ސަޕްލަޔަރުންނަށް ރާއްޖެއާއި ޖޯޖިއާގެ މާކެޓުތަކަށް ވަނުމަށް ފަސޭހަކަން ހޯދަން މަޝްވަރާ ކުރާނެ ކަމަށް ހޮންގްކޮންގްއިން ބުނޭ.
• އިންވެސްޓް ކުރުމާއި މަސައްކަތް ކުރުމުގެ ފަސޭހަކަން:
  • އެއްގައުމުން އަނެއް ގައުމުގައި އިންވެސްޓް ކުރުމަށާއި، އެކަން ކުރުމަށް ރަނގަޅު މާހައުލެއް ގާއިމުކުރުމަށް މަޝްވަރާ ކުރާނެ ކަމަށް ހޮންގްކޮންގްއިން ބުނޭ.
• ހުރަސްތައް ނައްތާލުމާ، ކަސްޓަމްސް ޕްރޮސީޖާ ފަސޭހަކުރުން:
  • ދެގައުމުގެ ދެމެދުގައި އޮންނަ ވިޔަފާރި ގުޅުމަށް އެޅޭ އެހެނިހެން ހުރަސްތައް ނައްތާލުމަށާއި، ވިޔަފާރި ހަރުދަނާ ކުރުމަށް މިންގަނޑުތަކެއް ގާއިމުކުރުމަށާއި، ކަސްޓަމްސް މެދުވެރިކޮށް މުދާ އެތެރެކުރުމާއި ބޭރުކުރުމުގެ މަސައްކަތް ފަސޭހަ ކުރެވޭނެ ގޮތެއް ހަމަޖެއްސުމަށް މަޝްވަރާ ކުރާނެ ކަމަށް ހޮންގްކޮންގްއިން ބުނޭ.

ހޮންގްކޮންގުން ބުނާ ގޮތުގައި މިދިޔަ އަހަރު ރާއްޖެއާ އެގައުމާ ދެމެދު 276 މިލިޔަން ޑޮލަރުގެ ވިޔަފާރި ކުރެވިފައި ވެ އެވެ. އަދި 2011 ވަނަ އަހަރުން ފެށިގެން މިދިޔަ އަހަރާ ހަމައަށް، ދެގައުމުގެ ދެމެދުގައި އޮތް ވިޔަފާރި ވަނީ 38 ޕަސަންޓު ކުރިއަރާފަ އެވެ.