މީގެ 16 އަހަރު ކުރިން އަނިޔާވެރި ގޮތަކަށް މަރާލާފައި އޮއްވާ ފެނުނު އަޒްލީނާ ނަފީސްގެ މަރުގެ ހާދިސާ އަސްލަކަށް ބަލައިގެން ހަދަން ނިންމާފައިވާ ފިލްމު "ލީނާ" ގެ ޝޫޓިންއަށް މިމަހުގެ 25 ގައި ފުރާނެއެވެ.
ޝޫޓިން ކުރިއަށްގެންދާނީ އއ. އުކުޅަހުގައެވެ. ގާތްގަނޑަކަށް މަސްދުވަހުގެ ތެރޭ ޝޫޓިން ނިންމާ، މިއަހަރުގެ އޭޕްރީލް މަހުގެ ފަހުކޮޅު ފިލްމު ބެލުންތެރިންނާ ހަމައަށް ގެނައުމަށް ފިލްމުގެ ޑައިރެކްޓަރު އަބްދުﷲ މުއާޒު އަންނަނީ މަސައްކަތް ކުރަމުންނެވެ.
ރާއްޖެ ސިއްސުވާލި ބޮޑު ހާދިސާއެއް އަސްލަކަށް ބަލައިގެން އުފައްދާ މި ފިލްމުގައި "ވިލަން"ގެ ރޯލު އަދާކުރާނީ ކާކުތޯ މިއީ މިހާރު އުފެދޭނެ ބޮޑު ސުވާލެވެ. މީގެ ކުރިން ފިލްމުގެ ލީޑު އެކްޓަރު ނުވަތަ ވިލަންގެ ރޯލަށް އަހުމަދު އަޒްމީލް (އަޒޭ) ވެސް ހަމަޖެއްސިއެވެ. ނަމަވެސް ފިލްމުގެ ކާސްޓުންގެ ތެރޭ އަޒޭގެ ނަމެއް މިހާރު ނެތެވެ.
އަހްމަދު ޒަރީރުގެ ސްކްރީން ޕްލޭއަކަށް ހަދާ މި ފިލްމުގައި ޓައިޓަލް ރޯލު ކުޅޭނީ މިހާރު ދިވެހި ސިނަމާގައި ހުރި އެންމެ ޑިމާންޑު ބޮޑު ތަރި މަރިޔަމް އައްޒައެވެ.
އައްޒަގެ އިތުރުން ފިލްމުގެ ކާސްޓުންގެ ތެރޭ ހިމެނެނީ އަލީ އާޒިމް (ދޮން އައްޔަ) އާއި މަރިޔަމް ހަލީލް (ރަވީ މަންމަ) އަދި އަހުމަދު ނިމާލު، އަހުމަދު ސައީދު، ނުުޒުހަތު ޝުއައިބު އަދި ޒީނަތު އައްބާހެވެ.
ފިލްމުގައި ދޮން އައްޔަ ކުޅޭނީ ލީނާގެ ލޯބިވެރިޔާގެ ރޯލެވެ. މަރިޔަމް ހަލީމްއަކީ ލީނާގެ މަންމައެވެ. ނުޒުހަތު (ނުޒޫ) ކުޅޭނީ ލީނާގެ ބެސްޓް ފްރެންޑްގެ ބައެވެ. ސައީދު އަދާކުރާނީ ކައުންސިލުގެ ރައީސްގެ ރޯލެވެ.
ކާސްޓުން އިއުލާނު ކުރުމާއެކު ދެން އަނެއްކާވެސް ސުވާލު އުފެދެނީ ވިލަންއަކީ ކާކުތޯއެވެ. ނިމާލްއާއި ސައީދުއަކީ މީގެ ކުރިން ދިވެހި ސިނަމާއިން ފެނިގެން ގޮސްފައިވާ ފިލްމުތަކުގައި "ވިލަން"ގެ ރޯލުން ފެނުނު ތަރިންނެވެ. މި ދެތަރިންނަށް އެފަދަ ރޯލެއް އަދާކުރެވިދާނެ ކަމާމެދު ޝައްކު ކުރާނެ ބަޔަކު ތިބޭނެހެން ހިއެއް ނުވެއެވެ.
ފިލްމުގައި ކެމިއޯ ރޯލުތަކުންވެސް ފިލްމީ ދާއިރާގެ މަގުބޫލު މޫނުތައް ފެންނާނެއެވެ. އަދި އެއީ ކޮން ބައެއް ކަމެއް ނުނިންމާ ކަމަށް މުއާ ބުންޏެވެ.
މި ފިލްމުގެ އެސިސްޓެންޓް ޑައިރެކްޓަރެއްގެ ގޮތުގައި ނިމާލު ހަރަކާތްތެރިވާނެއެވެ. ޕްރޮޑިއުސަރުންނަކީ މުއާ އަދި ސައްޔާހު އައްބާހެވެ. ސްކްރީން ޕްލޭ ލިޔުނީ އަހުމަދު ޒަރީރެވެ.
މި ފިލްމާމެދު މުއާ ކުރާ އުންމީދުތައް ބޮޑެވެ. ހާއްސަކޮށް ފިލްމަކީ އޭނާގެ ފުރަތަމަ ޑައިރެކްޝަނަށް ވާތީއެވެ.
"މިއީ މުޖްތަމައުގައި މިހާރު ވެސް ހިނގާ މައްސަލަތަކަށް އަލިއަޅުވާލާނެ ފިލްމެއް. އިންސާނީ ހުދޫދުގެ ބޭރުން މި ހިނގާ މީހުން މެރުމާއި މާރާމާރި ފަދަ ކަންތައް، މީހުންނަށް އިހުތިރާމް ނުކުރުން ފަދަ ކަންތަކަށް ވަރަށް ބޮޑަށް ފޯކަސްކޮށްފައި އިންނާނެ،" ލީނާގެ އެއް ޕްރޮޑިއުސަރު މުއާ މީގެ ކުރިން ދިން އިއްޓަވިއުއެއްގައި ބުންޏެވެ.