ތިލަފުށި ތަރައްގީ ކުރުމަށް އޭޑީބީގެ އެހީގައި 126 މިލިއަން ޑޮލަރުގެ މަޝްރޫއެއް ހިންގަން ނިންމާފައިވާކަމަށް އެންވަޔަރަންމެންޓް މިނިސްޓަރު ޠާރިޤު އިބްރާހިމް ވިދާޅުވެއްޖެއެވެ.
އެންވަޔަރަންމެންޓް މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މިނިސްޓަރު ވިދާޅުވީ މި މަޝްރޫއު ކުރިއަށް ގެންދާނީ ފިޔަވަހިތަކަކަށް ބަހާލައިގެން ކަމަށެވެ. އެގޮތުން ތިލަފުށީގެ ބިން ހިއްކައި، ވޭސްޓް މެނޭޖުމެންޓް ސެންޓަރެއް ގާއިމްކުރާނެ ކަމަށް މިނިސްޓަރު ވިދާޅުވިއެވެ.
އެންވަޔަރަންމެންޓް މިނިސްޓަރު ޠާރިޤު އިބްރާހިމް މިއަދުގެ ޕްރެސް ކޮންފަރެންސްގައި ވާހަކަ ދައްކަވަނީ --- ސަން ފޮޓޯ: މުހައްމަދު އަފްރާހު
އޭޑީބީގެ އެހީގައި ކުރިއަށްގެންދާ މި މަޝްރޫއުގެ ދަށުން ވޭސްޓް ޓްރާންސްފާ ސެންޓަރެއް ގާއިމް ކުރާއިރު، މި މަސައްކަތަށް ކޮންސަލްޓެންޓުން މިހާރު ހޯދާފައިވާ ކަމަށާއި، ޑިޒައިންގެ މަސައްކަތް ގާތްގަނޑަކަށް ނިމިފައިވާކަމަށް މިނިސްޓަރު ވިދާޅުވިއެވެ. އަދި އަންނަ މަހުގެ ތެރޭ މަސައްކަތް ޓެންޑަރަށް ހުޅުވާލާނެ ކަމަށްް މިނިސްޓަރު މިއަދު ވިދާޅުވިއެވެ.
ތިލަފުށި---
ތިލަފުށި ތަރައްގީކުރުމުގެ ޕްރޮޖެކްޓުގެ ދަށުން އިންސިނިރޭޓަރެއް ގެނެސް އެ އިންސްޓޯލު ކުރަމުންދާކަން މިނިސްޓަރު ފާހަގަ ކުރެއްވިއެވެ.
"އެންމެ ފުރަތަމަ އެ އިންސިނިރޭޓަރުން ނައްތާލާނީ ނުރައްކާތެރި ކުނި. އޭގެ ތެރޭގައި ހޮސްޕިޓަލުތަކުން އުފެދޭ މެޑިކަލް ވޭސްޓުވެސް ހިމެނޭނެ،" އޭނާ ވިދާޅުވިއެވެ.
މިނިސްޓަރު ވިދާޅުވީ މީގެ ކުރިން މިފަދަ ކުނި ނައްތާލުމަށް އެއްވެސް މެކޭނިޒަމެއް ގާއިމް ކުރެވިފައި ނުވާ ކަމަށެވެ.
އެންވަޔަރަމެންޓް މިނިސްޓަރު ތޯރިގް އިބްރާހިމް މިއަދުގެ ޕްރެސް ކޮންފަރެންސްގައި ވާހަކަ ދައްކަވަނީ --- ސަން ފޮޓޯ: މުހައްމަދު އަފްރާހު
މިނިސްޓަރު ވިދާޅުވީ، އަމާޒަކީ އަހަރު ނިމުމުގެ ކުރިން ތިލަފުށީގައި ކުނި އެންދުން ހުއްޓާލުން ކަމަށެވެ. އެ މަސައްކަތް ކުރުމަށް ކުނި ބަހައްޓާނޭ ބެއިލާ ގެނައުމުގެ މަސައްކަތް ކުރަމުންދާ ކަމަށާއި ބޮޑު އިންސިނިރޭޓަރު ބަހައްޓައިގެން އެއިން އެ ކުނިތައް ނައްތާލާނެ ކަމަށް މިނިސްޓަރު ވިދާޅުވިއެވެ.
އަހަރު ނިމުމުގެ ކުރިން ރާއްޖޭގެ ހުރިހާ ރަށެއްގައިވެސް ވޭސްޓް މެނޭޖްމެންޓް ސެންޓަރުތައް ގާއިމް ކުރުމަށް މަސައްކަތް ކުރަމުންދާ ކަމަށް މިނިސްޓްރު ވިދާޅުވިއެވެ. އެ މަސައްކަތް ކުރަނީ ވޯލްޑް ބޭންކުގެ އެހީގައި ކަމަށްވެސް މިނިސްޓަރު ވިދާޅުވިއެވެ.