އަންނަ ހުކުރު ދުވަހު ބޭއްވުމަށް ހަމަޖެހިފައިވާ "ރާޅު ގުޑި" ކައިޓް ބޯޑިން ޓުއާގެ އޮންލައިން މީޑިއާ ޕާޓުނަރަކަށް ސަން މީޑިއާ ގުރޫޕް ހަމަޖައްސައިފިއެވެ.
"ރާޅު ގުޑި" ކައިޓް ބޯޑިން ޓުއާ ރާވާ ހިންގުމުގައި ހަރަކާތްތެރިވަނީ މާފުށީ ޑައިވާސް އެންޑް ވޯޓާސްޕޯޓްސްއާއި ސްލޯޓޭޕް ޕްރޮޑަކްޝަންއެވެ. އިންތިޒާމް ކުރާ ފަރާތާއެކު ސަން މީޑިއާ ގުރޫޕުން މިއަދު ވަނީ އޮންލައިން މީޑިއާ ޕާޓްނަރުގެ އެއްބަސްވުމުގައި ސޮއިކޮށްފައެވެ.
"ރާޅު ގުޑި" އިވެންޓްގެ ފަރާތުން އެގްރީމެންޓުގައި ސޮއިކުރެއްވީ އިވެންޓްގެ ޕްރޮޖެކްޓް މެނޭޖަރު މުހައްމަދު ފައިސަލްއެވެ. ސަން މީޑިއާ ގުރޫޕްގެ ފަރާތުން ސޮއިކުރެއްވީ އެސިސްޓެންޓް މާކެޓިން މެނޭޖަރު އަހުމަދު މުސްލިމެވެ.
"ރާޅު ގުޑި" ކައިޓް ބޯޑިން ޓުއާ އަކީ ވިލިމާލެއިން ފެށިގެން ކައިޓްސާފްކޮށް ކ. މާފުއްޓަށް ދިއުމަށް އާންމުކޮށް ހުޅުވާލައިގެން ބާއްވާ ޗެލެންޖެކެވެ.
"ރާޅު ގުޑި" އިވެންޓްގެ މަގުސަދަކީ ރާއްޖެ އިޝްތިހާރު ކުރުމުގެެ އިތުރުން ރާއްޖޭގައި ކައިޓްސާފިން އިތުރަށް ޕުރޮމޯޓް ކުރުން ކަމަށް އިވެންޓްގެ ޕްރޮޖެކްޓް މެނޭޖަރު ފައިސަލް ވިދާޅުވެއެވެ.
"މީގެ ތިންއަހަރު ކުރިންވެސް އަޅުގަނޑުމެން ޖައްސާފަ އިންނާނެ މި އިވެންޓް. މިއީ ރާއްޖޭގައި ކައިޓްސާފިން އިތުރަށް ޕްރޮމޯޓް ކުރުމަށާއި ޒުވާނުން އިތުރަށް މިކަމަށް ޝައުގުވެރި ކުރުމާއި ދިވެހިރާއްޖެ އިޝްތިހާރު ކުރުމަށް ކުރިއަށް ގެންދާ އިވެންޓެއް،" އެގްރީމަންޓްގައި ސޮއިކުރުމަށްފަހު ވާހަކަ ދައްކަމުން ފައިސަލް ވިދާޅުވިއެވެ.
ފައިސަލް ވިދާޅުވީ އެ އިވެންޓުގައި ކައިޓްސާފް ކުރާ ކޮންމެ މީހަކަށްވެސް ބައިވެރި ވެވޭނެ ކަމަށެވެ. އަދި މިހާތަނަށް ގާތްގަނޑަކަށް 50 ވަރަކަށް ސާފަރުން ބައިވެރިވެފައިވާ ކަމަށްވެސް އޭނާ ވިދާޅުވިއެވެ.
"ހުކުރު ދުވަހު އިވެންޓް އޮންނަ ވަކި ގަޑިއެއް އެނގޭނީ ވައި ޖެހޭގޮތަށް ބަލާފަ. މިހާރު މި ރާވަނީ 9:00 ގައި އެތުލީޓުން އައިސް އެތަނުން ރަޖިސްޓްރީ ވާން ފަށާ ގޮތަށް. 50 އަށްވުރެ ގިނަ އެތުލީޓުން ބައިވެރިވާނެ ކަމަށް މިބަލަނީ. ކުޑަކުދިންވެސް ހިމެނޭނެ. ބ. ގޮއިދޫން ފާހަގަ ކޮށްލެވުނު ހަންޓޭވެސް ބައިވެރިވާނެ،" ފައިސަލް ވިދާޅުވިއެވެ.
ސަން މީޑިއާ ގުރޫޕްގެ ފަރާތުން ވާހަކަ ދައްކަވަމުން އެ ކުންފުނީގެ އެސިސްޓެންޓް މާކެޓިން މެނޭޖަރު އަހުމަދު މުސްލިމް ވިދާޅުވީ ސަން މީޑިއާއަށް މިފަދަ ފުރުސަތެއް ދެއްވިކަމަށްޓަކައި "ރާޅު ގުޑީ"ގެ މެނޭޖުމަންޓަށް ޝުކުރު އަދާކުރާ ކަމަށާއި، އިވެންޓްގެ އެންމެ ފުރިހަމަ މައުލޫމާތު އާންމުންނާއި ހަމައަށް ސަން އޮންލައިންއިން ގެނެސްދޭނެ ކަމަށެވެ.
ރާޅު ގުޑި އިވެންޓުގެ ބައިވެރިން ފަރިތަކުރުން ތަކުގައި --- ފޮޓޯ/ ސްލޯޓޭޕް
އަންނަ ހުކުރު ދުވަހު އޮންނަ މި އިވެންޓް ފެށޭނީ ވިލިމާލެއިންނެވެ. ގާތް ގަނޑަކަށް ދޮޅު ގަނޑިއިރު ތެރޭ ކައިޓްސާފިންގައި މާފުއްްޓަށް ދެވޭނެ ކަމަށް އިވެންޓް އިންތިޒާމް ކުރާ ފަރާތުން ލަފާކޮށްފައިވާއިރު، ވިލިމާލެއާއި މާފުށީގެ ދުރުމިނަކީ ގާތް ގަނޑަކަށް 25 ކިލޯ މީޓަރެވެ.
ދެހާސް ސޯޅަވަނަ އަހަރުވެސް މާފުށީ ޑައިވާސް އެންޑް ވޯޓަރސްޕޯޓްސް އިން އިންތިޒާމުކޮށްގެން ކައިޓް ސާފިންގައި ދުނިޔޭގެ ޗެމްޕިއަންކަން ދެ ފަހަރު ހޯދާފައިވާ އަދި އެއް އަހަރު ޔޫރަޕުގެ ޗެމްޕިއަންކަން ހޯދި، ޔޫރީ ޒޫންއާއެކު ވަނީ "ރާޅު ގުޑީ"ގެ އިވެންޓެއް ކާމިޔާބު ކަމާއެކު ކުރިއަށް ގެންގޮސްފައެވެ.