ކޮމިޝަނަރު އޮފް ސްޕޯޓްސްގެ މަގާމުން އަހްމަދު ނަޝީދު (ޑޭވް) އިސްތިއުފާ ދެއްވައިފި އެވެ.
ޑޭވް ވަނީ މަގާމުން އިސްތިއުފާ ދެއްވިކަން "ސަން" އަށް ކަށަވަރުކޮށްދެއްވާފައެވެ.
އޭނާ ވިދާޅުވީ އިސްތިއުފާ ދެއްވީ ދިރިއުޅުމުގެ ކަންކަން ހުރި ގޮތުން އިތުރަށް އެމަގާމުގައި ޚިދުމަތް ކުރެވެން ނެތުމުން ކަމަށެވެ.
ފާއިތުވި މުއްދަތުގެ ތެރޭގައި ރާއްޖޭގެ ކުޅިވަރު ކުރިއެރުވުމަށް މަސައްކަތްތަކެއް ކުރެވުނުކަމަށް ގަބޫލު ކުރާ ކަމަށާއި ރާއްޖޭގެ ފުރަތަމަ ކަމިޝަނަރު އޮފް ސްޕޯޓްސް އަށް ވުމަކީ ލިބު ފަޚުރެއް ކަމަށް އޭނާ ވިދާޅުވިއެވެ.
" މަގާމުން އިސްތުފާދީފިން. މިވަގުތު ދިރިއުޅުމުގެ ހާލަތު ހުރިގޮތުން އިތުރަށް ނެތީ މަގާމުގައި ހުރެވެން. އެއްވެސް މައްސަލައެއް ދިމައެއްނުވޭ. ސަރުކާރަށް ޚިދުމަތްކުރުމުގައި ދެމި ހުންނާނަން. އެހެން މަގާމަކުން ފެނިދާނެ،" ޑޭވް ވިދާޅުވިއެވެ.
ޑޭވް ވިދާޅުވީ ރާއްޖޭގެ ހުރިހާ ޒުވާނުންނާއި ކުޅިވަރު ކުރިއެރުން އެދޭ ކަމަށެވެ. އަދި މަގާމްގައި ހުރިއިރު އެއްވެސް މީހަކަށް ބޭއިންސާފުން ކަމެއް ކުރެވިފައިވާނަމަ އެކަމަށް މައާފަށް އެދޭ ކަަމަށެވެ.
ކޮމިޝަނަރު އޮފް ސްޕޯޓްސްގެ މަގާމަށް އައްޔަންކޮށްފައިވަނީ މިދިޔަ އަހަރުގެ އޭޕްރީލް މަހުގެ 24 ވަނަ ދުވަހުއެވެ.