ހަރޭރޭ (28 ނޮވެމްބަރު): ރޮބަޓް މުގާބޭގެ އުފަންދުވަހަކީ ކޮންމެ އަހަރަކު ރަސްމީ ބަންދު ދުވަހެއްގެ ގޮތުގައި ޒިމްބާބުވޭ އިން ކަނޑައަޅައިފި އެވެ.
ކޮންމެ އަހަރެއްގެ ވެސް 21 ފެބްރުއަރީ އަކީ ބަންދު ދުވަހެއް ކަމަށާއި އެ ދުވަސް މިހާރު ހަމަޖައްސައިފައި ވަނީ "ރޮބަޓް ގެބްރިއެލް މުގާބޭ ނޭޝަނަލް ޔޫތު ޑޭ" އަށެވެ. މުގާބޭގެ އުފަންދުވަސް ރަސްމީ ބަންދު ދުވަހެއްގެ ގޮތުގައި ހަމަޖެއްސީ ވެރިކަން ކުރާ ޒާނޫ- ޕީއެފް ޕާޓީގެ ޔޫތު ލީގުން އެކަމަށް ދާއީދު ކުރިފަހުންނެވެ.
ރޮބަޓް މުގާބޭ ވެރިކަން ދޫކޮށްލި ފަހުން އޭނާ އަށް ވަނީ ހާއްސަ އެތައް އިނާޔަތްތަކެއް ދޭން ނިންމައިފަ އެވެ. އެގޮތުން އެމަނިކުފާނަށް 10 މިލިއަން ޑޮލަރު ދޭ ގޮތަށް ހަމަޖައްސާފައިވާ އިރު ފުރިހަމަ މުސާރަ އާއި ސިއްހީ ފަރުވާ އާއި ސެކިޔުރިޓީ ވެސް މުގާބޭ އަށް ދިނުމަށް ވަނީ އެ ގައުމުން ނިންމައިފަ އެވެ.
މުގާބޭ ވެރިކަން ދޫކޮށްލުމުން ފައިސާގެ ބޮޑު އަދަދެއް ހުށަހެޅި އިރު އެމަނިކުފާނަށް ދައުވާ ނުކުރެވޭނެ ގޮތް ވެސް ވަނީ ޒިމްބާބުވޭގެ ސަރުކާރުން ހަދައިފަ އެވެ.
ތިރީސްހަތް އަހަރު ވަންދެން ޒަމްބާބުވޭގެ ވެރިކަން ކުރެއްވި މުގާބޭގެ ވެރިކަން ނިމުމަކަށް އައީ އެ ގައުމުގެ އަސްކަރިއްޔާ އިން މުގާބޭގެ ވެރިކަން ނިމުމަކަށް ގެނަައުމަށް ބަޣާވާތެއް ގެނެސްފައިވަނިކޮށެވެ.
މައުލޫމާތު: ދަ ހެރަލްޑް