މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން ރާއްޖޭގެ ފަތުރުވެރިކަމުގެ ދާއިރާގައި ދޭ އެންމެ ޝަރަފުވެރި އެވޯޑު "މޯލްޑިވްސް ޓްރެވަލް އެވޯޑު 2017" ގެ އެންމެ ފަހު އިވެންޓް ގާލާ އެންޑް އެވޯޑު ހަފްލާއާއެކު ނިންމާލައިފިއެވެ.
ދެހާސް ބާރަ ވަނަ އަހަރުން ފެށިގެން ރާއްޖޭގައި ދެމުން އަންނަ އެ އެވޯޑު މީގެ ކުރިން އޮންނަނީ އެންމެ އެޑިޝަނަކަށެވެ. މި އަހަރު އެ އެވޯޑު ތިން އެޑިޝަނަކަށް ބަހާލައިގެން ކުރިއަށްގެންދަން ނިންމީ، މިދިޔަ އަހަރު ޓްރެވަލް އެވޯޑު ހަފްލާގައެވެ.
މިދިޔަ އަހަރު ބޭއްވި މަޓާޓޯ މޯލްޑިވްސް ޓްރެވަލް އެވޯޑްސްގެ ގާލާގައި މަޓާޓޯގެ ރައީސް އަބްދުﷲ ގިޔާޒް ވާހަކަދައްކަވަނީ --- ސަން ފައިލް ފޮޓޯ
އެއީ "ޓްރެވަލް އެވޯޑްސް ޕީޕަލްސް އެޑިޝަން" އާއި ޓްރެވަލް އެވޯޑްސްގެ "ގެސްޓް ހައުސް އެޑިޝަން" އަދި "މޯލްޑިވްސް ޓްރެވަލް އެވޯޑްސް ގްރޭންޑް ގާލާ" އެވެ.
މޯލްޑިވްސް ޓްރެވަލް އެވޯޑުގެ އެންމެ ފުރަތަމަ އެޑިޝަން "ޓްރެވަލް އެވޯޑްސް ޕީޕަލްސް އެޑިޝަން" ބާއްވައިފަ ވަނީ ޖުލައި މަހުގެ 13 ވަނަ ދުވަހު އަދާރަން ހުދުރަންފުށީ ގައެވެ. އެ އެވޯޑުގައި ޓޫރިޒަމް ދާއިރާގައި މަސައްކަތް ކުރާ ފަރާތްތަކުގެ ތެރެއިން 10 ފަރާތެއް ފާހަގަކޮށް އަގުވަޒަން ކުރުމުގެ އެވޯޑުވަނީ ދީފައެވެ.
މަޓާޓޯ މޯލްޑިވްސް ޓްރެވަލް އެވޯޑްސްގެ ޕީޕަލްސް އެޑިޝަން: އަދާރަން ހުދުރަންފުށީގައި ކުރިޔަށް ގެންދިޔަ ހަފްލާގައި ރާއްޖޭގެ ފަތުރުވެރިކަމުގެ ދާއިރާގައި ފާހަގަކުރެވޭ 10 ފަރާތަކަށް ޕާސަން އޮފް ދަ އިޔާ އެވޯޑު ދީފައިވޭ --- ސަން ފޮޓޯ/ ޔާމިން ސައީދުމޯލްޑިވްސް ޓްރެވަލް އެވޯޑުގެ ދެވަނަ އެޑިޝަން ބާއްވައިފައި ވަނީ މިދިޔަ އޮކްޓޯބަރު މަހުގެ 30 ވަނަ ދުވަހު މާފުށީގައެވެ. އެ އެޑިޝަނުގައި 15 ފަރާތަކަށް އެވޯޑުދީފައިވާއިރު 96 ނޮމިނޭޝަން ހުށަހަޅާފައިވެއެވެ. އަދި ނޮމިނީޒްއަށް ވޯޓުލުމަށް ހުޅުވާލި ފުރުސަތުގައި 82000 ވޯޓު އޮންލައިކޮށް އަދި އެސްއެމްއެސް މެދުވެރިކޮށް ލިބިފައިވެއެވެ.
ރާއްޖޭގެ ފަތުރުވެރިކަމުގެ ދާއިރާގައި ދޭ އެންމެ ޝަރަފުވެރި އެވޯޑު، މަޓާޓޯ މޯލްޑިވްސް ޓްރެވަލް އެވޯޑްސް ގެސްޓްހައުސް އެޑިޝަން 2017 އެވޯޑް ހަފްލާގެ ތެރެއިން---ސަން ފޮޓޯ/ އަފްރާހް
ބުރާސްފަތި ދުވަހުގެ ރޭ މަޓާޓޯ މޯލްޑިވްސްއިން ބާއްވާފައިވަނީ މިއަހަރުގެ ޓްރެވަލް އެވޯޑުގެ އެންމެބޮޑު އެންމެ ޝަރަފުވެރި "މޯލްޑިވްސް ޓްރެވަލް އެވޯޑްސް ގްރޭންޑް ގާލާ" ހަފްލާއެވެ. ގާލާ އެޑިޝަނުގެ 27 އެވޯޑަކަށް 430 ނޮމިނޭޝަން ހުށަހަޅައި ވޯޓު ލުމަށް ހުޅުވާލި ފުރުސަތުގައި 100000 އަށްވުރެ ގިނަ ވޯޓުވަނީ ލިބިފައެވެ. އެ ހަފްލާ ބާއްވާފައިވަނީ އަދާރަން ހުދުރަންފުށީގައެވެ.
އަދާރަން ސެލެކްޓް ހުދުރަންފުށީގައި ކުރިއަށްދިޔަ، މަޓާޓޯ މޯލްޑިވްސް ޓްރެވަލް އެވާރޑްސް ގާލާ 2017 އިވެންޓްގެ ތެރެއިން---ސަން ފޮޓޯ/ މުހައްމަދު އަފްރާޙް
ބުރާސްފަތި ދުވަހުގެ ރޭ ނިންމާލި މަޓާޓޯއިން މޯލްޑިވްސް ޓްރެވަލް އެވޯޑުގެ ކަންކަން ކާމިޔާބު ކަމާއެކު ކުރިއަށްގެންދިއުމަށް ރާއްޖެއާއި ރާއްޖޭން ބޭރުގެވެސް އެތަށް ފަރާތްތަކެއްގެ އެހީތެރިކަން މަޓާޓޯއަށް ލިބިފައިވާކަމަށް އެ ޖަމްއިއްޔާ އިން ބުންޏެވެ. އެގޮތުން މިއަހަރުގެ އެވޯޑު ކުރިއަށްގެންގޮސްފައިވަނި ދުނިޔޭގެ އެންމެ ބޮޑު ޓްރެވަލް އޮންލައިން ޕޯޓަލް ކަމަށްވާ ޓްރިޕް އެޑްވައިޒާ އާއި ގުޅިގެންނެވެ.
މޯލްޑިވްސް ޓްރެވަލް އެވާރޑްސް ގާލާ 2017---ސަން ފޮޓޯ/ މުހައްމަދު އަފްރާހް
މަޓާޓޯ ޓެރެވަލް އެވޯޑަކީ ކާމިޔާބު އެވޯޑަކަށް ހެދުމަށް ބޭރުގެ ގައުމުތަކުގައި އިޝްތިހާރު ކުރުމުގެ ގޮތުން އެ ޖަމްއިއްޔާ އިން ވަނީ އިންޑިއާގެ ޕީއާރު ކުންފުންޏެއްކަމަށްވާ ތިންކް ސްޓްރޯބެރީޒް ކިޔާ ކުންފުންޏަކާ ގުޅިގެން ޓްރެވަލް އެވޯޑު އިޝްތިހާރު ކުރުމުގެ މަސައްކަތް ކޮށްފައެވެ. އަދި މި މަހުގައި ލަންޑަންގައި ކުރިއަށްގެންދިޔަ ޑަބްލިއު ޓީއެމް ފެއާގައި ބައިވެރިވެ މަޓާޓޯއިންވަނީ ލަންޑަންގެ މަގުތަކުގައިވެސް ޓްރެވަލް އެވޯޑު އިޝްތިހާރުކޮށްފައެވެ.
ތިންކް ސްޓްރޯބެރީސްއާ އެކު މަޓާޓޯއިން ސޮއި ކުރަނީ -- ފޮޓޯ: މަޓާޓޯ
މިއަހަރުގެ ޓްރެވަލް އެވޯޑު ރޭގައި ނިންމާލުމުގެ ކުރިން މަޓާޓޯއިންވަނީ އަންނަ އަހަރުގައިވެސް ޓްރެވަލް އެވޯޑު ބާއްވާނެކަން އިއުލާނުކޮށްފައެވެ. އަދި މި އަހަރަށް ވުރެ ފުރިހަމަކަމާއި ކާމިޔާބު ކަމާއެކީގައި އެ އެވޯޑު ހަފްލާވެސް ކުރިއަށްގެންދާނެ ކަމަށް މަޓާޓޯއިން ބުންޏެވެ.