ގެޓްސެޓް ލޯނު ލިބުނު 37 ޒުވާނުންގެ ގެޓްސެޓް ނަންބަރު މިނިސްޓްރީ އޮފް އިކޮނޮމިކް ޑިވެލޮޕްމެންޓުން އާންމު ކޮށްފިއެވެ.
އެ މިނިސްޓްރީން ގެޒެޓްކޮށްފައިވާ އިއުލާނެއްގައި ބުނެފައިވަނީ، ޒުވާން ވިޔަފާރިވެރިންނަށް އަމާޒުކުރެވިގެން ސަރުކާރުން ކުރިއަށް ގެންދަވާ ލޯން އެހީގެ ދަށުން މިއަހަރު ގެޓްސެޓް ލޯނު ލިބުނު 37 ޒުވާނުންނަށް ލޯނު ހަވާލުކުރުމުގެ ކަންތައް މިނިސްޓްރީގެ ފަރާތުން ކުރިއަށް ގެންދާނެ ކަމަށެވެ.
ލޯނު ލިބުނު ފަރާތްތަކުގެ ނަންތައް އިކޮނޮމިކް މިނިސްޓްރީން އާންމުކޮށްފައެއް ނުވެއެވެ.
ޒުވާން ވިޔަފާރި ވެރިން އުފެއްދުމަށް މި ސަރުކާރުން ފަށާފައިވާ ގެޓްސެޓް ޕްރޮގްރާމްގެ ދަށުން މިއަހަރުވެސް ޖުމްލަ 25 މިލިއަން ރުފިޔާގެ ލޯނު ދޫކުރާނެއެވެ. ގެޓްސެޓް ލޯނުގެ އިންޓްރެސްޓަކީ ސުންޕަސެންޓާ އަށް ޕަސެންޓާ ދެމެދުގެ އަދަދެކެވެ. މި ލޯނު އަނބުރާ ދެއްކުމަށް ގްރޭސް ޕީރިއަޑަކާއެކު ނުވަ އަހަރު ލިބޭނެއެވެ. ލޯނުގެ ގޮތުގައި ކޮންމެ ފަރާތަކަށްވެސް ތިން ލައްކަ އާއި އަށް ލައްކައާއި ދެމެދުގެ އަދަދެއް ދޭނެއެވެ. ގެޓްސެޓް ޕްރޮގްރާމަށް ފަސް އަހަރު ތެރޭ ކަނޑައަޅާފައި ވަނީ 200 މިލިއަން ރުފިޔާ އެވެ.