ގައުމީ ބާސްކެޓްބޯޅަ މުބާރާތުގެ ތަށި، ޓީރެކްސް ބީސީން ދިފާއުކޮށްފި އެވެ.
މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އިން އިންތިޒާމުކޮށްގެން ކުރިއަށްގެންދިޔަ ގައުމީ ބާސްކެޓްބޯޅަ މުބާރާތުގެ ތަށި ޓީރެކްސް އިން ދިފާއުކުރީ ފައިނަލުގައި ކިންގްސް ބީސީ ބަލިކުރުމަށްފަހު އެވެ.
ޒުވާނުންގެ މަރުކަޒު އެތެރޭ ކޯޓުގައި ރޭ ކުޅުނު ގައުމީ މުބާރާތުގެ ފިރިހެން ޑިވިޝަންގެ ފައިނަލުގައި ޓީރެކްސްއާ ދެކޮޅަށް ނުކުތް ކިންގްސް އަކީ ޓީރެކްސް ބަލިކޮށް، މިއަހަރުގެ ގައުމީ ބާސްކެޓްބޯޅަ ލީގު ކާމިޔާބުކުރި ޓީމެވެ.
ރޭ ކުޅުނު ގައުމީ މުބާރާތުގެ ފައިނަލް މެޗުގައި ކިންގްސްގެ މައްޗަށް ޓީރެކްސް އިން ކުރި ހޯދާފައި ވަނީ 63-71 ޕޮއިންޓުންނެވެ. އެ މެޗުގެ މޮޅު ކުލުންތެރިޔާގެ މަގާމަށް ހޮވިފައި ވަނީ ޓީރެކްސްއަށް 25 ޕޮއިންޓް ހޯދައިދިން ޑޫސަން އޮޔެނޮވިޗް އެވެ.
ފިރިހެން ޑިވިޝަންގެ 21 އަހަރުން ދަށުގެ އެންމެ އުންމީދީ ކުޅުންތެރިޔަކަށް ދަ ބައުސްގެ އަހްމަދު މުއާވިން ހޮވުނު އިރު، އެންމެ މޮޅު ކުޅުންތެރިޔަކަށް ހޮވުނީ ޓީރެކްސްގެ ޑޫސަން އޮޔެނޮވިޗް އެވެ.
އެ މުބާރާތުގެ އަންހެން ޑިވިޝަންގެެ ފައިނަލުގައި ޖިބިލީ އެސްސީ ބަލިކޮށް، ސައިކްލޯން ބީސީން ވަނީ އެ ޑިވިޝަންގެ ތަށި ދިފާއުކޮށްފަ އެވެ. މިއަހަރުގެ ގައުމީ ލީގު ޗެމްޕިއަންކަން ވެސް ސައިކްލޯން ހޯދީ ޖިބިލީ ބަލިކޮށްގެންނެވެ.