ސައިކްލޯން ބީސީ އިން ގައުމީ ބާސްކެޓްބޯޅަ މުބާރާތް ވެސް ކާމިޔާބުކޮށްފި އެވެ.
އެ މުބާރާތުގެ އަންހެން ޑިވިޝަންގެ ޗެމްޕިއަންކަން ސައިކްލޯނުން ހޯދީ ޒުވާނުންގެ މަރުކަޒު އެތެރޭ ކޯޓުގައި މިއަދު ހަވީރު ކުޅުނު ފައިނަލް މެޗުގައި ޖިބިލީ އެސްސީ ބަލިކޮށްގެންނެވެ.
ސައިކްލޯނުން ވަނީ މިއަހަރުގެ ގައުމީ ބާސްކެޓްބޯޅަ ލީގުގެ ޗެމްޕިއަންކަން ވެސް ހޯދައިފަ އެވެ. ލީގު ޗެމްޕިއަންކަން ސައިކްލޯނުން ހޯދި އިރު، ޖިބިލީ އެސްސީ އަކީ ރަނަރަޕެވެ. މިއަދު ނިމިގެންދިޔަ ގައުމީ ބާސްކެޓްބޯޅަ މުބާރާތުގެ ރަނަރަޕް ޓީމަކީ ވެސް ޖިބިލީ އެވެ.
މިއަދު ހަވީރު ކުޅުނު 36 ވަނަ ގައުމީ ބާސްކެޓްބޯޅަ މުބާރާތުގެ ފައިނަލުގައި ޖިބިލީގެ މައްޗަށް ސައިކްލޯނުން ކުރި ހޯދާފައި ވަނީ 60-32 ޕޮއިންޓުންނެވެ. އެ މެޗުގެ މޮޅު ކުޅުންތެރިޔާގެ މަގާމަށް ހޮވިފައި ވަނީ ސައިކްލޯނުގެ ނަތާސާ މިޖަޓޮވިޗް އެވެ.
އެ މުބާރާތުގެ 21 އަހަރުން ދަށުގެ އެންމެ މޮޅު ކުޅުންތެރިޔަކަށް ހޮވުނީ ރެޑްވިންގްސް ބީސީގެ ލަޔާން އަލީ ރަޝީދެވެ. މުބާރާތުގެ އެންމެ މޮޅު ކުޅުންތެރިޔާގެ މަގާމަށް ހޮވުނީ ރެޑްވިންގްސްގެ ޖެލެނާ ބުޑްމީރް އެވެ.