ޓެނިސް އެސޯސިއޭޝަން އޮފް މޯލްޑިވްސްއިން އިންތިޒާމް ކޮށްގެން ބާއްވާ 48 ވަނަ ނިޕޯން ނޭޝަނަލް ޓެނިސް ޗެމްޕިއަންޝިޕް 2017 ގެ ކުޅުން ފަށައިފިއެވެ.
އެސްޓީއޯ އިން އިސްނަގައިގެން ކޮންމެ އަހަރަކު ވެސް ބާއްވަމުން އަންނަ އެ މުބާރާތް މި އަހަރު ޝަރަފުވެރި ކޮށްދެއްވީ މިނިސްޓަރ އޮފް ޔޫތް އެންޑް ސްޕޯޓްސް އިރުތިޝާމް އާދަމް އެވެ.
ނިޕޯން ނޭޝަނަލް ޓެނިސް ޗެމްޕިއަންޝިޕް 2017 ޔޫތް މިނިސްޓަރ އިރުތިޝާމް ފައްޓަވައި ދެއްވަނީ-- ފޮޓޯ: ޓެނިސް އެސޯސިއޭޝަން
މުބާރާތް ފެށުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރު އިރުތިޝާމް ވަނީ ޒުވާނުންނަށް ކުޅިވަރު ކުޅުމުގެ ފުރުސަތު ތަނަވަސް ކުރުމުގެ މުހިންމު ކަމުގެ މައްޗަށް އަލިއަޅުވާލާފައެވެ.
މިއަދުން ފެށިގެން އަންނަ ބުރާސްފަތި ދުވަހުގެ ނިޔަލަށް ކުރިއަށް ދާ މި މުބާރާތުގައި ތަފާތު އެކި އުމުރުފުރާތަކުން ޖުމްލަ 94 ކުޅުންތެރިން ވަނީ ބައިވެރިވެފައެވެ. އެގޮތުން 94 ކުޅުންތެރިންގެ ތެރޭގައި ހިމެނެނީ 50 އަންހެން ބައިވެރިންނާއި 44 ފިރިހެން ކުދިން ތަފާތު ކެޓަގަރީތަކުން ފެނިގެންދާނެއެވެ.
ނިޕޯން ނޭޝަނަލް ޓެނިސް ޗެމްޕިއަންޝިޕް 2017 ފެށުމުގެ ރަސްމިއްޔާތުގެ ތެރެއިން-- ފޮޓޯ: ޓެނިސް އެސޯސިއޭޝަން
މިއަދުގެ ފުރަތަމަ މެޗުގައި ބައްދަލު ކުރީ މެންސް އޯޕަން ކެޓަރަކީގެ އަބްދުﷲ ފާއިހް ފަޒީލް އާއި ހަސަން ޝާމް އެވެ. މި މެޗު 6-1 އަދި 6-0 އިން ކާމިޔާބު ކުރީ ފާއިހް އެވެ.
ޓެނިސް ޖިމް މިނިސްޓަރ އިރުތިޝާމް ހުޅުއްވައި ދެއްވަނީ-- ފޮޓޯ: ޓެނިސް އެސޯސިއޭޝަން
އެ މުބާރާތް ފެށުމުގެ ރަސްމިއްޔާތަށް ފަހު ޓެނިސް ޖިމް ވެސް ވަނީ ހުޅުވާފައެވެ. އެ ޖިމް ހުޅުއްވައިދެއްވީ ޝަރަފުވެރި މެހެމާން ޔޫތް މިނިސްޓަރު އިރުތިޝާމް އެވެ. ޓެނިސް ޖިމަކީ މިދިޔަ އަހަރު ޓެނިސް އެސޯސިއޭޝަނުންގެ އެކްޝަން ޕްލޭންގައި ނެޝަނަލް ޓެނިސް ސެންޓަރުގެ ކުޅުންތެރިންނާއި އެ އެސޯސިއޭޝަންގެ މެމްބަރުން ބޭނުން ކުރުމުގެ މަގްސަދުގައި އުފައްދާފައިވާ ޖިމެކެވެ.