މެޗަކުން ބަލިނުވެ، ސްޓިންގާސް އިން ދެ ވަނަ ޑިވިޝަންގެ ލީގު ޗެމްޕިއަންކަން ހޯދައިފި

މެޗަކުން ބަލިނުވެ، ސްޓިންގާސް ބާސްކެޓްބޯލް ކްލަބުން ގައުމީ ބާސްކެޓްބޯޅަ ލީގުގެ ދެ ވަނަ ޑިވިޝަންގެ ޗެމްޕިއަންކަން ހޯދައިފި އެވެ.

މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އިން އިންތިޒާމް ކޮށްގެން ކުރިއަށް ގެންދިޔަ އެ މުބާރާތުގެ ދެ ވަނަ ޑިވިޝަންގެ ޗެމްޕިއަންކަން ސްޓިންގާސް އިން ހޯދީ ކުޅުނު އަށް މެޗު ކާމިޔާބުކޮށް، 16 ޕޮއިންޓް ހޯދައިގެންނެވެ.

ގައުމީ ބާސްކެޓްބޯޅަ ލީގުގެ ދެ ވަނަ ޑިވިޝަންގެ ރަނަރަޕް ކްލަބު އެޗްޑީސީ --- ފޮޓޯ/ އެމްބީއޭ

ލީގުގެ ދެ ވަނަ ހޯދައި ރަނަރަޕްކަން ހޯދީ ކްލަބު އެޗްޑީސީ އެވެ. އެ ޓީމުން ވަނީ ފަސް މެޗު ކާމިޔާބުކޮށް 13 ޕޮއިންޓް ހޯދައިފަ އެވެ. ތިން ވަނައިގައި ނިންމާލި އެލްކިޔު ސްޕޯޓްސް ކްލަބުން ހަތަރު މެޗު ކާމިޔާބުކޮށް 12 ޕޮއިންޓް ހޯދި އިރު، ހަތަރު ވަނާގައި ނިންމާލި ރެޑް ވިންގްސް ބާސްކެޓްބޯލް ކްލަބުން ވަނީ ތިން މެޗު ކާމިޔާބުކޮށް 11 ޕޮއިންޓް ހޯދައިފަ އެވެ. އަދި ފަސް ވަނައިގައި ނިންމާލި ކީންސް ބާސްކެޓްބޯލް ކްލަބަށް މެޗެއް ކާމިޔާބު ކުރެވިފައެއް ނުވެ އެވެ.

ދެ ވަނަ ޑިވިޝަންގެ އެންމެ މޮޅު ކުޅުންތެރިޔާގެ މަގާމު ހޯދީ އެޗްޑިސީގެ ޝިރުފާން އަހުމަދެވެ. މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ހިމެނުނީ އެލްކިޔުގެ އަހްމަދު ނާއިފް ރަޝީދާއި ރެޑްވިންގްސްގެ އާދަމް ޔާފިއު އިބްރާހީމާއި ސްޓިންގާސްގެ މުހައްމަދު ޝައުފް މިންތާޒާއި ރެޑްވިންގްސްގެ މުހައްމަދު އަޝްމަލް އަހްމަދު އަދި ސްޓިންގާސްގެ މުހައްމަދު ސަބީހު ތައުފީގެވެ. ދެ ވަނަ ޑިވިޝަންގެ ނިންމުމުގެ ނިންމުމުގެ ރަސްމިއްޔާތު ޝަރަފްވެރި ކޮށްދެއްވީ މޯލްޑިވްސް ސްޕޯޓްސް ކޯޕަރޭޝަންގެ މެނޭޖިން ޑިރެކްޓަރު އަބްދުއްރައްޒާގު އިބްރާހިމް އެވެ.

ގައުމީ ބާސްކެޓްބޯޅަ ލީގުގެ ދެ ވަނަ ޑިވިޝަންގެ އެންމެ މޮޅު ކުޅުންތެރިޔާގެ މަގާމަށް ހޮވުނު ކްލަބު އެޗްޑީސީގެ ޝިރުފާން އަހްމަދަށް ސްޕޯޓްސް ކޯޕަރޭޝަންގެ އެމްޑީ ރައްޒާގު ޓްރޮފީ ހަވާލު ކޮށްދެއްވަނީ --- ފޮޓޯ/ އެމްބީއޭ

އެ މުބާރާތުގެ ފުރަތަމަ ޑިވިޝަން ކުރިއަށްދާނީ އަންނަ ބުދަ ދުވަހުން ފެށިގެން މިފެށޭ މަހުގެ 17 ވަނަ ދުވަހު އެވެ. އެ މުއްދަތުގެ ތެރޭގައި ފުރަތަމަ ޑިވިޝަންގެ ފިރިހެން އަދި އަންހެން ބައި ކުރިއަށްދާނެ އެވެ.