ހެޕަޓައިޓިސް އޭގެ ޖަރާސީމު ހިމެނޭ އުފެއްދުމެއް ކަމަށްވާ ކްރިއޭޓިވް ގޯމޭ ބްރޭންޑުގެ ގަނޑުކުރި މިކްސްޑްބެރީސް ހިމެނޭ ޖޫހެއް ރާއްޖެއިން ފެނިއްޖެ ކަމަށް ފުޑް އެންޑް ޑްރަގް އޮތޯރިޓީ (އެފްޑީއޭ) އިން މިއަދު ނެރުނު ބަޔާނުގައި ބުނެފި އެވެ.
އެފްޑީއޭ އިން ބުނީ އެ އުފެއްދުންތައް ހޯދައި، ރާއްޖޭގެ ބާޒާރުން އެތަކެތި ނެގުމުގެ މަސައްކަތް ކުރަމުންދާ ކަމަށެވެ.
ފަނަރަ ޖެނުއަރީ 2021 އަށް މުއްދަތު ހަމަވާ އެ ވައްތަރުގެ ޖޫސް ޕެކެޓަކީ ހެޕަޓައިޓިސް އޭގެ ޖަރާސީމުން ތަޣައްޔަރުުވުމުގެ ފުރުސަތު އޮތްކަމަށް އޮސްޓްރޭލިއާ އަދި ނިއުޒީލެންޑްގެ ކާބޯތެކެތީގެ ރައްކާތެރިކަމާ ބެހޭ ކޮމެޓީން ކަނޑައަޅައިފައިވާ އެއްޗެއް ކަމަށް ވެސް އެފްޑީއޭ އިން ބުންޏެވެ. އަދި އެ ގައުމުތަކުގެ ބާޒާރުން ވެސް އެ ވައްތަރުގެ ޖޫސް ނަގަން ފަށައިފައިވާ ކަމަށް ވެސް އެފްޑީއޭ އިން ބުންޏެވެ.
ރާއްޖޭގައި އެ ވައްތަރުގެ އުފެއްދުން ވިއްކުން މަނާކޮށްފައިވާ ކަމަށް ވެސް އެފްޑީއިން ބުންޏެވެ.
ރާއްޖޭގެ އެއްވެސް ހިސާބެއްގައި އެ ވައްތަރުގެ އުފެއްދުން ވިއްކާކަން ފާހަގަ ކުރެވިއްޖެ ނަމަ އެފްޑީއޭގެ ނަންބަރު 3014361 އާ މައުލޫމާތު ހިއްސާ ކުރުމަށް ވެސް އެ އޮތޯރިޓީން ވަނީ އިލްތިމާސް ކޮށްފަ އެވެ.